ރިޔާސީ އިންތިހާބުގެ ދެވަނަ ބުރުގައި ދަ ޑިމޮކްރެެޓްސް އާއި ޖުމްހޫރީ ޕާޓީގެ ގިނަ އިސް ބޭފުޅުންގެ ތާއީދު ލިބިވަޑައިގަންނަވާނެ ކަމަށް ރައީސް އިބްރާހީމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރިޔާސީ އިންތިހާބަށް ކުރައްވާ ކެމްޕޭނުގައި މާލޭގައި ދޮރުންދޮރަށް ހިންގެވުމަށް ފަހު ނޫސްވެރިންނާ ވާހަކަ ދައްކަވަމުން ރައީސް ސޯލިހު ވިދާޅުވީ ޑިމޮކްރެޓްސްގެ ގިނަ ބަޔަކު މިހާރު އެމްޑީޕީއާ އެކު ނުކުމެ މަސައްކަތް ކުރަން އެބަ ތިބި ކަމަށެވެ. އެ މަނިކުފާނު ވިދާޅުވީ ގާތްގަނޑަކަށް އެންމެންގެ ތާއީދު ވެސް މިހާރު ލިބެމުން އަންނަ ކަމަށެވެ.
ރައީސް ސޯލިހު މިމޭރުމުން ވާހަކަފުޅު ދެއްކެވީ ޑިމޮކްރެޓްސްގެ ތާއީދު ރަސްމީ ގޮތެއްގައި ނުލިބުމަކީ ގޮންޖެހުމެއްތޯ ނޫސްވެރިޔަކު ސުވާލުކުރުމުންނެވެ. ޑިމޮކްރެޓްސްގެ ތާއީދު ލިބުނު ނަމަ، އިންތިހާބުގެ ފުރަތަމަ ބުރު ކާމިޔާބު ކުރަން ވަރަށް ފަސޭހަ ވެގެން ދިޔައީސް ކަމަށް އެ މަނިކުފާނު ވިދާޅުވި އެވެ.
"އެހެން ނަމަވެސް އަޅުގަނޑު ގަބޫލުކުރާ ގޮތުގައި މިހައިތަނަށް މިކުރެވުނު މަސައްކަތުން، ޑިމޮކްރެޓްސްގެ ބޮޑު ބައެއް އަޅުގަނޑުމެންނާ އެކީ މަސައްކަތްކުރަން މިހާރު ނުކުމެ ވެސް އެބަތިބި،" ރައީސް ވިދާޅުވި އެވެ.
ޖުމްހޫރީ ޕާޓީގެ އިސް ބައެއް ބޭފުޅުން ރައީސަަށް ތާއީދުކުރާކަން މިހާރު ވެސް އިއުލާނުކޮށްފައި ވާއިރު އެމަނިކުފާނު ވިދާޅުވީ ޖޭޕީގެ ކައުންސިލްގެ ވަރަށް ގިނަ ބޭފުޅުން އެމަނިކުފާނުގެ ކެމްޕޭނާ ގުޅެން މިހާރު ވެސް މަސައްކަތްކުރަމުން އަންނަ ކަަމަށެވެ.
"މިއަދު ވެސް ތިޔަބޭފުޅުންނަށް އޭގެ ބައެއް ބޭފުޅުންގެ އެންޑޯޒްމެންޓްތައް ފެނިފައި ވާނެ އަދި ކުރިއަށް މިއޮތް ހައެއްކަ ގަޑިއިރުގެ ތެރޭގައި ފެންނާނެ، ޖޭޕީގެ މެޖޯރިޓީ ކަހަލަ ގޮތަކަށް އެމްޑީޕީއާ އެކީގައި މަސައްކަތްކުރާ ގޮތަށް މިހާރު އޮތީ،" ރައީސް ވިދާޅުވި އެވެ.
ރިޔާސީ އިންތިހާބުގެ ފުރަތަމަ ބުރުގައި ތިން ވަނަ އަށް އެންމެ ގިނަ ވޯޓު ލިބުނީ ދަ ޑިމޮކްރެޓްސް އަށެވެ. އެޕާޓީ އަކީ އެމްޑީޕީގެ ރިޔާސީ ޕްރައިމަރީ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ނާކާމިޔާބުވުމުން އުފެދުނު ދެބަސްވުމުގައި އެމްޑީޕީގެ އޭރުގެ އިސް ބައެއް ބޭފުޅުން އެޕާޓީން ވަކިވެވަޑައިގެން އުފެއްދި ޕާޓީ އެކެެވެ.
