ވެރިކަމުގެ ނިޒާމާ ގުޅޭ ގޮތުން ރައްޔިތުންގެ ފެންނަ ނުފެންނަ ވޯޓަކަށް ދިޔުމުގެ ކުރިން އެ ކަމުގެ އުސޫލުތަކާއި އެކަން ކުރިއަށް ގެންދާނެ ގޮތް ބަޔާން ކުރާ ގާނޫނެއް ފާސްކުރުން މުހިންމު ކަމަށް، ނިޒާމީ ބަދަލަކަށް ވަކާލާތުކުރާ ޑިމޮކްރެޓްސްގެ އިންގާލީ ޗެއާޕާސަން ހަސަން ލަތީފު މިއަދު ވިދާޅުވެއްޖެ އެވެ.
ޑިމޮކްރެޓްސްގެ ރިޔާސީ ކެންޑިޑޭޓު، މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބު ހުށަހެޅުއްވި ނިޒާމު ބަދަލުކުރުމުގެ ވޯޓެއް ނެގުމަށް ގޮވާލާ ގަރާރު ދިރާސާކުރުމަށް ބޭއްވި މުޅި މަޖިލިހުގެ ކޮމިޓީގައި ހަސަން ވިދާޅުވީ ގަރާރުގައިވާ ވޯޓުގެ ކުރިއަށް ގާނޫނީ ބައެއް މަސައްކަތްތައް ކުރަން ޖެހޭ ކަމަށެވެ.
ގާނޫނީ ވަކީލުކަން ވެސް ކުރައްވާ ހަސަން ފާހަގަ ކުރެއްވީ ގޮތުގައި ފެންނަ ނުފެންނަ ވޯޓު ދެ ގޮތަކަށް ނެގިދާނެ ކަމަށް ގާނޫނު އަސާސީގެ ދެ މާއްދާއެއްގައި ބަޔާންކުރާ ކަމަށެވެ. އެއީ ގާނޫނު އަސާސީގެ 262 ވަނަ މާއްދާގައި ރައީސަށް ލިބިދޭ ބާރާއި، ގާނޫނު އަސާސީގެ 70 ވަނަ މާއްދާގައި މަޖިލިހަށް ލިބިދޭ ބާރެވެ.
މަޖިލީހުގައި ހެންވޭރު ހުޅަނގު ދާއިރާ ތަމްސީލް ކުރައްވާ މެންބަރު ހަސަން ލަތީފު ވިދާޅުވީ ރައްޔިތުންގެ މަޖިލިހަށް ލިބިދޭ ބާރުން މި ވޯޓު ނެގުމަށް ފަހު ގެންނަ ގާނޫނީ ބަދަލުތައް ތަސްދީގު ކުރެއްވުމުގެ ބާރު ރައީސަށް އޮންނާތީ 262 ވަނަ މާއްދާއަށް އިސްތިސްނާ ބަޔާންކުރާ މައްދާއެއް ވެސް އިތުރު ކުރަން ޖެހޭ ކަމަށެވެ.
ހަސަން ދެން ވިދާޅުވީ ގާނޫނެއް ނެތި ވޯޓަކަށް ގޮސްފިނަމަ ފެންނަ ނުފެންނަ ވޯޓަށް ފަހު އަމަލުކުރަންވީ ގޮތްތަކާ މެދު ސުވާލުތަކެއް އުފެދުމުގެ ފުރުސަތު އެބަ އޮތް ކަމަށެވެ.
"ފެންނަ ނުފެންނަ ވޯޓެއްގެ ކަރުދާސް އެކުލަވާލާއިރު ގަބޫލު ކުރެވޭ، ދައުލަތުގެ ބާރުތަކަށް އަންނަ ބަދަލުތައް ބަޔާންކުރާ މާއްދާތައް ވެސް ޑްރާފްޓް ކުރެވިގެން ވޯޓަކަށް އެހިގެން، އަދި މި ކަން ގާނޫނެއްގެ ސިފައިގައި ރައްޔިތުންގެ މަޖިލިހުން ފާސްކުރެވިގެން ވޯޓަކަށް އަހަން ދިޔުމަށް،" ހަސަންގެ ހިޔާލު ހިއްސާކުރެއްވި އެވެ.
ރައްޔިތުންގެ މަޖިލީހުގައި ވެރިކަމުގެ ނިޒާމާ ގުޅޭ ގޮތުން ފެންނަ ނުފެންނަ ވޯޓެއް ނެގުމުގެ ބަހުސް ފެށިފައި މި ވަނީ، ރިޔާސީ އިންތިހާބުގެ ފުރަތަމަ ބުރުގައި ތިންވަނައަށް އެންމެ ގިނަ ވޯޓު ޑިމޮކްރެޓްސްއިން ހޯދާ ދެވަނަ ބުރުގެ ތާއީދު ދިނުމަށް އެމްޑީޕީއަށް އެ ޕާޓީން އެ ޝަރުތު ވެސް ހުށަހަޅާފައިވަނިކޮށެވެ.
މަޖިލިހުގެ މެޖޯރިޓީ ޕާޓީއަކީ އެމްޑީޕީ އެވެ. އެމްޑީޕީގެ 57 މެންބަރުން މަޖިލީހުގައި ތިއްބަވަ އެވެ. މައިނޯރިޓީ ޕާޓީއަކީ ޑިމޮކްރެޓްސް އެވެ. އެމްޑީޕީން ވަކިވެ އުފެއްދި އެ ޕާޓީގައި މަޖިލިހުގެ 13 މެންބަރަކު ހިމެނިވަޑައިގަންނަވަ އެވެ.
ބަރުލަމާނީ ނިޒާމެއް ގެނައުމަށް މި ވަގުތު ވަކާލާތު ކުރައްވަމުން ގެންދަވާ ސިޔާސީ އިސް ލީޑަރަކީ ޑިމޮކްރެޓްސްގެ ބާނީ އަދި މި ވަގުތު ރައްޔިތުންގެ މަޖިލީހުގެ ރައީސްގެ މަގާމު ވެސް ފުރުއްވާ މުހައްމަދު ނަޝީދެވެ.
މީގެ ކުރިން ނަޝީދުގެ ވެރިކަމުގައި ވެސް ނިޒާމު ބަދަލު ކުރުމަށް ތާއީދުކުރައްވައި ވާހަކަ ދައްކަވާފައި ވެ އެވެ. އަދި 2007 ގައި ބޭއްވި ފެންނަ ނުފެންނަ ވޯޓުގައި ވެސް ނަޝީދާއި އޭރު އެމަނިކުފާނު ލީޑުކުރައްވަމުން ގެންދެވި އެމްޑީޕީން ވެސް ތާއީދުކުރީ ބަރުލަމާނީ ނިޒާމަކަށެވެ.
ވެރިކަމުގެ ނިޒާމުގެ ބަދަލުތަކުގެ ވާހަކަ 2018 ގެ ރިޔާސީ އިންތިހާބާ ދިމާކޮށް ވެސް އެމްޑީޕީން ހުށަހެޅި އެވެ. ނަމަވެސް ކޯލިޝަންގެ ބައިވެރިންގެ ތެރޭގައި އެކަމުގެ ހިޔާލު ތަފާތުވުން ހުރުމުން ކޯލިޝަންގެ މެނިފެސްޓޯގައި އެ ކަން ހިމަނާފައެއް ނުވެ އެވެ.
