އެންމެ ރަނގަޅު ގޮތަކީ މި ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހު ބަލިކުރުމަށް ފަހު، އިންތިހާބުވާ ރައީސް ޑރ. މުހައްމަދު މުއިއްޒު ވެސް އަވަހަށް ވެރިކަމުން ބޭލުން ކަމަށް، ދަ ޑިމޮކްރެޓްސްގެ ޕާލިމެންޓަރީ ގްރޫޕުގެ ލީޑަރު މެދުހެންވޭރު ދާއިރާގެ މެމްބަރު އަލީ އާޒިމު މިރޭ ވިދާޅުވެއްޖެ އެވެ.
ރިޔާސީ އިންތިހާބުގެ ދެވަނަ ބުރުގައި ތާއިދުކުރާ ކެންޑިޑޭޓެއް ކަނޑައެޅުމަށްޓަކައި އެމްޑީޕީ އާއި ޕީޕީއެމް/ޕީއެންސީއަށް ޑިމޮކްރެޓްސްއިން ހުށަހެޅި ހުށަހެޅުންތަކާ ގުޅޭ ގޮތުން މަޝްވަރާކުރަން ބޭއްވި އެ ބައްދަލުވުމުގައި އާޒިމް ވިދާޅުވީ އެކަނި ނުކުމެ "އެހެން ގޮތެއް" ހޯދެން އެބަ އޮތްތޯ ވިސްނަންޖެހޭ ކަމަށެވެ.
"އަޅުގަނޑު ދެކޭ ގޮތުގައި އެކަން އެބަ އޮތްވާން ތިބޭފުޅުންގެ ހިތްވަރާއެކު. މި އޮތް ގޮތަކީ އަޅުގަނޑު ދެކޭ ގޮތުގައި މި އަންނަ އިންތިހާބުގައި އިބްރާހިމް މުހައްމަދު ސޯލިހު ދެރަކުރުން ދެވަނަ ބުރުގައި. ދެރަކުރުން. ދެރަކޮށްފައި ވަރަށް އަވަހަށް މުއިއްޒު އަނެއްކާ ވެރިކަމުން ބޭލުން އަޅުގަނޑުމެން ކުރަންޖެހޭ ކަމަކީ،" އާޒިމް ވިދާޅުވި އެވެ.
ޑިމޮކްރެޓްސްއިން ބަރުލަމާނީ ނިޒާމަކަށް ވަކާލާތު ކުރަމުން ގެންދާއިރު، އާޒިމް ވިދާޅުވީ މިހާރު މިއޮތް ރިޔާސީ ނިޒާމެއްގައި ބަޔަކާ އެކުވެގެން ދިޔުމަކީ ފަސޭހަ ކަމެއް ނޫން ކަމަށެވެ. ސިޔާސީ ޕާޓީތަކުގެ ނިޒާމު އައިފަހުން ދަސްވި ކަމަކީ ރިޔާސީ ނިޒާމެއްގައި ކޯލިޝަން ހަދައިގެން ކިރިޔާ ވެސް ކާމިޔާބެއް ވެފައެއް ނެތް ކަމަށް އޭނާ ވިދޅާުވި އެވެ.
ވަކި ކޮޅެއް ނެގުމުގައި ދެން ވިސްނަން ޖެހެނީ ކެންޑިޑޭޓުގެ ޝަހުސިއްޔަތާ ކަމަށް އާޒިމް ވިދާޅުވި އެވެ.
"މިއަދާ ހަމައަށް ދުވަހަކު ވެސް އަޅުގަނޑު ނުދެކެން މި ދެ ކެންޑިޑޭޓުންނަށް ވުރެ ސިޔާސީ ގޮތުން ދޮގު ހަދާ ބަޔަކު،" އޭނާ ވިދާޅުވި އެވެ.
އެއަށް ފަހު އޭނާ ވިދާޅުވީ ކޮރަޕްޓުވެފައި ހުރި، ވައްކަން ކުރާ، މީހުން އަޅުވެތިކުރާ ބަޔަކާ އެއްކޮށް ދާކަށް ހެޔޮނުވާނެ ކަމަށެވެ،
"އެއްގޮތަކަށް ވެސް ވިސްނައިގެން ނުވާނެ،" އޭނާ ވިދާޅުވި އެވެ.
އާޒިމް މިގޮތަށް ހިޔާލުފާޅު ކުރެއްވިއިރު، ވިލުފުށީ ދާއިރާގެ މެމްބަރު ހަސަން އަފީފުގެ ހިޔާލަކީ ވެސް އެއްވެސް ކެންޑިޑޭޓެއްގެ ފަހަތަށް ނުގޮސް، ޕާޓީ ބޮޑުކުރަން މަސައްކަތް ކުރުމެވެ. ބައެއް މެމްބަރުންގެ ހިޔާލު މިހެން ހުރިއިރު، އިންޓަރިމް ކައުންސިލުގެ ބައެއް މެމްބަރުން ވިދާޅުވީ ޕާޓީން ނިންމާ ގޮތަކަށް އިހުތިރާމުކުރާނެ ކަމަށެވެ.
ރިޔާސީ އިންތިހާބުގެ ދެވަނަ ބުރުގައި ވާދަކުރާ އެމްޑީޕީ އާއި ޕީޕީއެމް/ޕީއެންސީއަށް ޑިމޮކްރެޓްސްއިން ހުށަހެޅި ހުށަހެޅުންތަކަށް އެއްބަސްވުމަށް އަންނަ ބުދަ ދުވަހުގެ ނިޔަލަށް ދަ ޑިމޮކްރެޓްސްގައި ވަނީ ދީފަ އެވެ.
