ރިޔާސީ އިިންތިހާބުގެ ފުރަތަމަ ބުރުގައި ލިބިވަޑައިގެންނެވި ނާކާމިޔާބީއަށް ފަހު ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ގައުމީ މަޖިލީހާ އެ ޕާޓީގެ އިސް ލީޑަރު އަދި ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހު މިވަގުތު ބައްދަލުކުރައްވަމުން އެބަގެންދަވަ އެވެ.
ހޮނިހިރު ދުވަހުގެ ބޭއްވި ރިޔާސީ އިންތިހާބުގައި އަށް ކެންޑިޑޭޓުން ވާދަ ކުރެއްވިއިރު، ދެ ވަނަ ބުރަށް ދިޔައީ އެންމެ މަތިން ވޯޓު ހޯއްދެވި ޕީއެންސީގެ ކެންޑިޑޭޓު ޑރ. މުހައްމަދު މުއިއްޒު އާއި ދެވަނައިގައި އޮތް ރައީސް ސޯލިހެވެ.
އިންތިހާބުގެ ދެވަނަ ބުރު ސެޕްޓެމްބަރު 30, ގައި އޮންނައިރު އެހެން ޕާޓީތަކާ ގުޅުމާ މެދު މި ބައްދަލުވުމުގައި މަޝްވަރާކުރާނެ ކަމަށް ބެލެވެ އެވެ.
އިއްޔެ ވެސް ބައެއް ޕާޓީތަކާ ވާހަކަ ދައްކާފައިވާ ކަމަށް ރައީސް މިއަދު ހެނދުނު ވިދާޅުވި އެވެ. އަދި, އެކުގައި ކުރިއަށްދާނެ ކަމުގެ ސިގުނަލް ބައެއް ބޭފުޅުން ދީފައިވާ ކަމަށް ރައީސް ވިދާޅުވި އެވެ.
އެމްޑީޕީގެ ގައުމީ މަޖިލީހުން މީގެކުރިން ފާސްކޮށްފައިވާ ގަރާރެއްގެ ދަށުން ކޯލިޝަން ހެދުމުގެ ބާރު އޮތީ ރިޔާސީ ކެންޑިޑޭޓަށް ދީފަ އެވެ.
ފުރަތަމަ ބުރުގައި ރައީސް ސޯލިހަށް ލިބިވަޑައިގަތީ 39 އިންސައްތަ ވޯޓެވެ. އެއީ, 86،151 ވޯޓެވެ އެންމެ ގިނަ ވޯޓު ލިބުނީ އިދިކޮޅު ޕީއެންސީގެ ކެންޑިޑޭޓު ޑރ. މުހައްމަދު މުއިއްޒަށެވެ. އޭނާއަށް ވޯޓުލީ މީހުންގެ 101،613 ލިބުނުއިރު އެއީ 46 އިންސައްތަ އެވެ.
އިންތިހާބުގެ ތިން ވަނަ ހޯއްދެވީ ދަ ޑިމޮކްރެޓްސްގެ ކެންޑިޑޭޓު އިލްޔާސް ލަބީބެވެ. އޭނާއަށް ލިބިވަޑައިގަތީ 15،528 ވޯޓެވެ. އެއީ ވޯޓުލީ އާބާދީގެ ހަތް ޕަސެންޓެވެ. އޭގެ އިތުރުން އުމަރު ނަސީރަށް 2.8 ޕަސެންޓު ވޯޓު އަދި ޖުމްހޫރީ ޕާޓީގެ ގާސިމް އިބްރާހިމަށް 2.4 ޕަސެންޓު ވޯޓު ލިބިވަޑައިގަތެވެ.
