ރިޔާސީ ކެމްޕޭނުގައި ދިމާވި އެންމެ ބޮޑު ގޮންޖެހުމަކަށްވީ އިދިކޮޅުން ފެތުރި ދޮގުތަކަށް ރައްދުނުދެވުން ކަމަށާއި، ދެވަނަ ބުރުގައި ހާމަކުރެވެންހުރި ހުރިހާ އެއްޗެއް ހާމަކޮށް އިތުރަށް ހަގީގަތް އޮޅުންފިލުވައިދެއްވާނެ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ހޮނިހިރު ދުވަހުގެ ބޭއްވި ރިޔާސީ އިންތިހާބުގައި އަށް ކެންޑިޑޭޓުން ވާދަ ކުރެއްވިއިރު، ދެ ވަނަ ބުރަށް ދިޔައީ އެންމެ މަތިން ވޯޓު ހޯއްދެވި ޕީއެންސީގެ ކެންޑިޑޭޓު ޑރ. މުހައްމަދު މުއިއްޒާއި އެމްޑީޕީގެ ކެންޑިޑޭޓު ރައީސް އިބްރާހިމް މުހައްމަދު ސޯލިހެވެ.
އިންތިހާބަށް ފަހު މިއަދު ރާއްޖެ ޓީވީއަށް ދެއްވި ފޯން އިންޓަވިއުއެއްގައި ރައީސް ސޯލިހު ވިދާޅުވީ ގައުމުގެ މިނިވަންކަން ގެއްލުވާލަން ސަރުކާރުން މަސައްކަތް ކޮށްފައި ހުރިކަމަށް ބުނެ ދޮގުތައް އިދިކޮޅުން ކެމްޕޭނު ތެރޭގައި ފަތުރާފައިވާ ކަމަށެވެ.
ރައީސް ފާހަގަ އެ ކުރެއްވީ ދެ ވަނަ ދައުރަކަށް އެ މަނިކުފާނު އިންތިހާބު ވެއްޖެ ނަމަ، ރާއްޖެ އިންޑިއާގެ "ސްޓޭޓަކަށް" ވެގެންދާނެ ކަމަށް ފެތުރި ދޮގު ވާހަކަތަކަށެވެ. އިންޑިއާ އައުޓު ކެމްޕޭނުގައި ދެއްކި އެ ވާހަކަތައް ރައްޔިތުންނަށް ގަބޫލު ކުރެވޭ މިންވަރަށް ފެތުރި ކަމަށެވެ.
"އެއީ އެންމެ ބޮޑު ޗެލެންޖު ފުރަތަމަ ބުރުގައި، އިރާދަކުރެއްވިއްޔާ މި ބުރުގައި ހާމަކުރެވެން ހުރި ހުރިހާ އެއްޗެއް އަޅުގަނޑުމެން ރައްޔިތުންނަށް ހާމަކޮށްދޭނަން، އެއީ ދޮގު ކަމަށް، އޭގަ ރާއްޖޭގެ މިނިވަންކަމާއި ރާއްޖޭގެ ސަރަހައްދުގެ ބައެއް ގެއްލޭ ގޮތަށް އެއްވެސް ކަމެއް ކޮށްފަ ނޯންނާނެ ކަން،"
"އެ އެއްޗެހިތައް ކިޔައިދިނީމަ އަޅުގަނޑު ހިތުން ރައްޔިތުންނަށް ވިސްނޭނެ މިއީ އޮޅުވާލުމަކާއި ދޮގެއްގެ ތެރެއިން ކޮށްފަ ހުރި ކަންތައްތައް ކަން، އަޅުގަނޑު ހިތުން އެކަން ކުރެވޭނެ ދެވަނަ ބުރުގެ ތެރޭގަ."
ފުރަތަމަ ބުރުގެ ތަޖުރިބާއަށް ބަލާއިރު، ގިނަ ދާއިރާތަކެއްގައި، އެމްޑީޕީއަށް ވޯޓު ދޭނެ ކަމަށް ބުނެފައިވާ މީހުން ނެރެވިފައި ނެތް ކަމަށް ވެސް ރައީސް ސޯލިހު ވިދާޅުވި އެވެ.
އަދި އިތުރު ފަރާތްތަކާއެކު ކޯލިޝަން ހެދުމަށް މަޝްވަރާތައް ކުރަމުން ގެންދަވާ ކަމަށް ވެސް އެމަނިކުފާނު ވިދާޅުވި އެވެ.
ރައީސް ވަނީ ފުރަތަމަ ބުރުގައި އެމަނިކުފާނަށް ވޯޓުދިން 86،151 މީހުންނަށް ޝުކުރު އަދާކުރައްވާ ދެވަނަ ބުރުގައި އިތުރަށް މަސައްކަތް ކޮށް، އަނބުރާ އަނިޔާވެރިކަމުގެ ތެރެއަށް ރާއްޖެ ނުގެންދިއުމަށް ގޮވާލައްވާފަ އެވެ.
ފުރަތަމަ ބުރުގައި ރައީސް ސޯލިހަށް ލިބިވަޑައިގަތީ 39 އިންސައްތަ ވޯޓެވެ. އެންމެ ގިނަ ވޯޓު ލިބުނީ އިދިކޮޅު ޕީއެންސީގެ ކެންޑިޑޭޓު ޑރ. މުހައްމަދު މުއިއްޒަށެވެ. އޭނާއަށް ވޯޓުލީ މީހުންގެ 101،613 ލިބުނުއިރު އެއީ 46 އިންސައްތަ އެވެ.
ރިޔާސީ އިންތިހާބުގެ ދެވަނަ ބުރު އޮންނާނީ މި މަހުގެ 30 ގަ އެވެ.
