ސިޔާސީ ގޮތުން ފޯރި ގަދަ އައްޑޫ ސިޓީގައި ވޯޓުލުން, އެއްވެސް ހަމަނުޖެހުމަކާ ނުލާ ސުލްހަވެރިކަމާއެކު ކުރިއަށްދާ ކަމަށް އެ ސިޓީގެ މޭޔަރު އަލީ ނިޒާރު ވިދާޅުވެއްޖެ އެވެ.
ވޯޓުލުމަށްފަހު އައްޑޫ ޝަރަފުއްދީން ސްކޫލު ބޭރުގައި ހުންނަވައި މޭޔަރު ނިޒާރު މިއަދު 'އަދަދު'އަށް ވިދާޅުވީ ކަނޑައެޅިފައިވަ ގަޑީގައި ހުރިހާ ފޮއްޓެއްގެ ވެސް ވޯޓުލުން ފެށިގެން ކުރިއަށް ދާއިރު, ވޯޓުގެ ކަންކަން ކުރިއަށް ދަނީ ވަރަށް އަމާންކަމާއެކު ކަމަށެވެ.
"އައްޑޫއަށް ބަލާއިރު އައްޑުއަކީ މާލެ ފިޔަވައި, އެންމެ ސިޔާސީ ގޮތުން ޕާޓީތަކުގެ ފޯރި އެންމެ ގަދަ, ރަނގަޅަށް ކެމްޕޭން ކުރެވުނު ރަށް. އެހެން ނަމަވެސް އަޅުގަނޑަށް ފާހަގަކުރެވެނީ ވަރަށް ޕްރޮފެޝަނަލްކޮށް ކުރިއަށްދާކަން" ނިޒާރު ވިދާޅުވި އެވެ.
މާލެ ފިޔަވައި އެންމެ ސިޔާސީ ފޯރި ގަދައީ އައްޑޫގައިކަން ފާހަގަކުރައްވައި މޭޔަރު ވިދާޅުވީ ހުރިހާ ޕާޓީތަކުން ވެސް ވަރަށް ޕްރޮފެޝަނަލްކޮށް ކެމްޕޭނު ކުރުމަށްފަހު ވޯޓުލުމުގެ ކަންކަން ވެސް އެގޮތުގައި ކުރިއަށް ކުރިއަށްދާ ކަމަށެވެ. އަދި ވޯޓުލާ ނިމޭ ގަޑިއަށް ވެސް މިގޮތުގައި ކުރިއަށް ދާން އުއްމީދު ކުރައްވާ ކަމަށް އޭނާ ވިދާޅުވި އެވެ.
އައްޑޫ ސިޓީގައި އެކު ޖުމްލަ 21 ވޯޓު ފޮށި ބަހައްޓާފައި ވާއިރު, އޭގެ ތެރެއިން 15 ފޮށި ހުރީ ވެރިރަށް ހިތަދޫގަ އެވެ. މިހާތަނަށް އެއިން އެއްވެސް ފޮއްޓެއް ކައިރީގައި ހަމަނުޖެހުމެއް ހިނގާފައި ނުވާއިރު, ކިއު ދިގުވެ, ގިނަ ވަގުތު ކޮޅަށް ތިބެން ޖެހޭ ފަދަ ހާލަތެއްވެސް މެދުވެރި ނުވެ އެވެ.
ހުރިހާ ފޮއްޓެއްގެ ވޯޓުލުން ވެސް ކުރިއަށް ދަނީ ސުލްހަވެރިކަމާއެކު އެވެ.
އައްޑޫ ސިޓީ ހިތަދޫގައި ބަހައްޓަފައިވާ ވޯޓު ފޮށިތަކަށް ވޯޓުލީ އަދަދުތައް:
- ހިތަދޫ 1 - ހިތަދޫ ސްކޫލު: 204/852
- ހިތަދޫ 2 - ހިތަދޫ ސްކޫލު: 172/628
- ހިތަދޫ 3 - ހިތަދޫ ސްކޫލު: 112/463
- ހިތަދޫ 4 - ހިތަދޫ ސްކޫލު: 122/512
- ހިތަދޫ 5 - ހިތަދޫ ސްކޫލު: 136/453
- ހިތަދޫ 6 - ނޫރާނީ ސްކޫލު: 140/534
- ހިތަދޫ 7 - ނޫރާނީ ސްކޫލު: 138/553
- ހިތަދޫ 8 - ނޫރާނީ ސްކޫލު: 145/582
- ހިތަދޫ 9 - ނޫރާނީ ސްކޫލު: 149/620
- ހިތަދޫ 10 - ނޫރާނީ ސްކޫލު: 163/640
- ހިތަދޫ 11 - ޝަރަފުއްދީން ސްކޫލު: 123/723
- ހިތަދޫ 12 - ޝަރަފުއްދީން ސްކޫލު: 135/601
- ހިތަދޫ 13 - ޝަރަފުއްދީން ސްކޫލު: 168/603
- ހިތަދޫ 14 - ޝަރަފުއްދީން ސްކޫލު: 209/584
- ހިތަދޫ 15 - އައްޑޫ ހައި ސްކޫލު: 227/893
މިފަހަރުގެ ރިޔާސީ އިންތިހާބުގައި އެންމެ ވާދަވެރި އެއް ކެންޑިޑޭޓް, ރައީސް އިބްރާހިމް މުހައްމަދު ސޯލިހުގެ ރަނިންމޭޓު ކަމަށްވާ މުހައްމަދު އަސްލަމަކީ އައްޑޫ ބޭފުޅެކެވެ. އަދި ދަ ޑިމޮކްރެޓްސްގެ ކެންޑިޑޭޓް އިލްޔާސް ލަބީބްގެ އިތުރުން އެމްއެންޕީގެ ރަނިންމޭޓު ޑރ. އަހުމަދު އަދީލް ނަސީރަކީ ވެސް އައްޑޫއަށް ނިސްބަތްވާ ދެ ބޭފުޅުންނެވެ.
މާލެ ފިޔަވައި އެންމެ އާބާދީ ބޮޑު ސިޓީ އައްޑޫގައި ވޯޓު ލުމުގެ ހައްގު ލިބިގެންވާ 25,936 މީހުން އެބަތިއްބެވެ.
ރިޔާސީ އިންތިހާބުގެ ވޯޓުލުން ފެށީ މިއަދު ހެދުނު 8:00 ޖެހި އިރުއެވެ. އިލެކްޝަންސް ކޮމިޝަނުން ހާމަކޮށްފައިވާ ގޮތުގައި 10:00 އާ ހަމަޔަށް އޭގެ ތެރެއިން 12 ޕަސެންޓް މީހުން ވަނީ ވޯޓުލާފަ އެވެ. އެއީ 22،403 ފިރިހެނުންނާއި، 13،760 އަންހެނުންނާއެކު ޖުމުލަ 36،163 މީހުންނެވެ.
