މިފަހަރުގެ ރިޔާސީ އިންތިހާބުގައި ވޯޓު ލުމުގެ ހައްގު ލިބޭ އާބާދީގެ 90 ޕަސެންޓު ވޯޓު ލާން ނުކުންނާނެ ކަމަށް ބެލެވޭ ކަމަށް އެމްޑީޕީގެ ކެންޑިޑޭޓު އަދި މިހާރުގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
"އަޅުގަނޑުގެ ހިތުން މި އިންތިހާބުގައި 88 ޕަސެންޓާ 90 ޕަސެންޓާ ދޭތެރޭގައި ވޯޓު ލާނެ ކަމަށް އަޅުގަނޑު މި ޔަގީންކުރަނީ. އަޅުގަނޑަށް ޓްރެންޑް ފެންނަނީ އެގޮތަށް،" އިންތިހާބުގައި ވޯޓު ދެއްވުމަށްފަހު ނޫސްވެރިންނާ ވާހަކަ ދައްކަވަމުން ރައީސް ވިދާޅުވި އެވެ.
ރައީސް ވިދާޅުވީ މިހާތަނަށް ފެންނަން ހުރި ޓްރެންޑުތަކުން ދައްކާ ގޮތުގައި މި ފަހަރުގެ އިންތިހާބުގައި ވޯޓު ލާން ކުރިން އިންތިހާބެއްގައި ނުނިކުންނަހާ މީހުން ނިކުންނާނެ ކަން ޔަގީންކުރާ ކަމަށެވެ.
މިފަހަރުގެ އިންތިހާބުގައި ވޯޓުލުމުގެ ހައްގު ލިބެނީ 282،395 މީހަކަށެވެ. މީގެ ތެރެއިން 90 އިންސައްތަ މީހުން ވޯޓު ލައިފި ނަމަ މި އިންތިހާބު ވެގެން ފެހި ގާނޫނު އަސާސީއަށް އަމަލުކުރަން ފެށި ފަހުން މިހާތަނަށް ރާއްޖޭގައި އެންމެ ގިނަ ބަޔަކު ވޯޓު ލާ އިންތިހާބަށެވެ.
އިންތިހާބާ ގުޅޭ ގޮތުން ރައީސް ސޯލިހު އިތުރަށް ވިދާޅުވީ، މިއީ މިހާތަނަށް ރާއްޖޭގައި ބޭއްވޭ އެންމެ ފުރިހަމަ އެއް އިންތިހާބު ކަމަށެވެ. އެގޮތުން މިނިވަން ކަމާ އެކީ ހުރިހާ ކެނޑިޑޭޓުން ކެމްޕެއިން ކުރަން ލިބުނު ކަމާއި އިންތިހާބުގެ ވޯޓު ލުން ފެށިގެން ދަނީ މާ ބޮޑު ހަމަޖެހުމެއް ނެތި ކަން ރައީސް އުފަލާ އެކު ފާހަގަކުރެއްވި އެެވެ.
މިހެން ނަމަވެސް ރައީސް ވަނީ ވީހާ ވެސް އަވަހަށް ނިކުމެ ވޯޓު ލާން ރައްޔިތުންނަށް އިލްތިމާސް ކުރައްވާފަ އެވެ.
