މިހާތަނަށް ބޭއްވި އެއްވެސް ރިޔާސީ އިންތިހާބެއް ކާމިޔާބު ނުކުރާހާ ތަފާތު ބޮޑުކޮށް މާދަމާ ބާއްވާ އިންތިހާބު ކާމިޔާބުކުރައްވާނެ ކަމަށް އެމްޑީޕީގެ ކެންޑިޑޭޓު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރައީސް ސޯލިހު މިހެން ވިދާޅުވީ ކެމްޕެއިނުގެ އެންމެ ފަހު މަންޒިލް ކަމުގައިވާ ކ. ހިންމަފުށީގައި ހުންނަވާ ދެއްކެވި ވާހަކަފުޅުގަ އެވެ. އެގޮތުން ކެމްޕޭނުގެ ތެރެއިން ފެނުނު މަންޒަރުން އެއް ބުރުން އިންތިހާބު ތަފާތު ބޮޑު ނަތީޖާއަކުން ކާމިޔާބުކުރެވޭނެ ކަމުގެ ޔަގީންކަން އެބަ އޮތް ކަމަށް އެމަނިކުފާނު ވިދާޅުވި އެވެ.
"ކުރިއަށް މިއޮތް އިންތިހާބު، މާދަމާ މި ބާއްވާ އިންތިހާބު ތަފާތު ބޮޑުކޮށް، މިހާތަނަށް ރިޔާސީ އިންތިހާބެއް ކާމިޔާބު ނުކުރާހާ ތަފާތު ބޮޑުކޮށް އިރާދަކުރެއްވިއްޔާ އަޅުގަނޑުމެން މި އިންތިހާބު އެއް ބުރުން ކާމިޔާބުކޮށް ނިންމާލާނަން" ރައީސް ވިދާޅުވި އެވެ.
ހިންމަފުށިން ރައީސް ވަޑައިގަންނަވާނީ، އެ މަނިކުފާނުގެ ކެމްޕޭނު ނިންމާލުމުގެ ގޮތުން އުސްފަސްގަނޑުގައި އެމްޑީޕީ އާއި ގުޅިފައިވާ ޕާޓީތަކުން ބާއްވާ އެއްވުމަކަށް މާލެއަށެވެ. މި އިވެންޓު ކުރިއަށް ދާނީ ކެމްޕެއިން ކުރުން ހުއްޓާލަން ޖެހޭ ހަވީރު 6:00 އާ ހަމައަށެވެ.
އެމްޑީޕީން ހިސާބު ޖަހަނީ ރައީސް 56 ޕަސެންޓު ވޯޓު ހޯއްދަވާނެ ކަމަށެވެ. ރައީސެކޭ އެއް ފަދައިން ރައީސްއާ އެއްމެ ގާތުން ވާދަކުރައްވާނެ ކަމަށް ބެލެވޭ އިދިކޮޅު ޕީޕީއެމް/ޕީއެންސީގެ ކެންޑިޑޭޓު، ޑރ. މުހައްމަދު މުއިއްޒު ވެސް ވިދާޅުވަނީ އެއް ބުރުން އިންތިހާބު ކާމިޔާބު ކުރައްވާނެ ކަމަށް ވިދާޅުވަމުންނެވެ.
މާދަމާ ބާއްވާ ރިޔާސީ އިންތިހާބުގައި ޖުމްލަ އަށް ކެނޑިޑޭޓަކު ވާދަކުރައްވަ އެވެ.
