ޕީޕީއެމްގެ ލީޑަރު އަދި ކުރީގެ ރައީސް އަބްދުالله ޔާމީންގެ ވަކީލު، އާދަމް އާސިފް ޕީޕީއެމްއިން ވަކިވެވަޑައިގެން އެމްޑީޕީއާ ގުޅިވަޑައިގެންފި އެވެ.
އިދިކޮޅު ޕީޕީއެމްގެ އިސްތިއުނާފީ ކޮމިޓީގެ މެމްބަރުގެ ގޮތުގައި ހުންނެވި އާސިފް މިއަދު އެމްޑީޕީއަށް ސޮއި ކުރައްވައި، މެމްބަޝިޕް ފޯމް ހަވާލު ކުރެއްވީ އެމްޑީޕީގެ ޗެއާޕާސަން ފައްޔާޒް އިސްމާއީލްއާ އެވެ.
ރައީސް ޔާމީން މިނިވަން ކުރުމަށް ގޮވާލާ ހިންގި ހަރަކާތްތަކުގެ ވެސް އިސް ސަފުގައި އާސިފް ހަރަކާތްތެރިވި އެވެ.
ނަމަވެސް ސުޕްރީމް ކޯޓުން އެމަނިކުފާނަށް މިފަހަރުގެ ރިޔާސީ އިންތިހާބުގައި ވާދަ ނުކުރެވޭނެ ކަމަށް ކަނޑައެޅުމާއެކު ޕީޕީއެމް/ޕީއެންސީގެ ފަރާތުން ޑރ. މުހައްމަދު މުއިއްޒު ކެންޑިޑޭޓަކަށް ނެރުނު ހިސާބުން އެ ޕާޓީގެ ހަރަކާތްތަކުން އާސިފް ފެނިފައެއް ނުވެ އެވެ.
ސްކޫލު ދައުރު ނިންމެވުމަށް ފަހު އާސިފު ފުރަތަމަ ގުޅިވަޑައިގަތީ މޯލްޑިވްސް ޕޮލިސް ސާވިސްއާ އެވެ. ޕޮލިހުގައި ގިނަ ދުވަސްތަކެއް ވަންދެން އުޅުއްވުމަށް ފަހު ވަކިވެވަޑައިގެން މަސައްކަތް ކުރެއްވަނީ ގާނޫނީ ވަކީލެއްގެ ގޮތުގަ އެވެ.
އާސިފް ޕީޕީއެމް ދޫކޮށްލެއްވީ ކީއްވެގެން، އޭނާ ފޯނު ނުނަންގަވާތީ ސާފެއް ނުވި އެވެ.
