މި ރިޔާސީ ދައުރާ ހަމައަށް އައިއިރު ރާއްޖޭގެ ގިނަ ރަށްރަށުގެ އަސާސީ ހިދުމަތްތައް ހުރީ ފުރިހަމަ ނުކުރެވި ކަމަށާއި، އެކަންކަންވެސް ފުރިހަމަކޮށްދޭންޖެހުނީ މިސަރުކާރަށް ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެ އެވެ.
'އަދަދު' ނޫހުން ގެނެސްދޭ އެތެރެފުށް ޕްރޮގްރާމުގައި އެމަނިކުފާނަށް ވޯޓު ދޭންވީ ސަބަބެއްގެ ގޮތުގައި ރައީސް ވިދާޅުވީ ކުރީ ސަރުކާރުގެ އިހުމާލުތަކެވެ.
"ރަށްރަށުގެ އަސާސީ ހިދުމަތްތައް އެހެރީ 21 ގަރުނުގެ 2023 އަށް އައިއިރު ނުފުދިއޭ. ބޯފެން ފޮދު ނުލިބޭ. އިރުވައި މޫސުމުގައި ކިތަށް ރަށްތޯ ފެނަށް ޖެހިގެން އެ ތިބެނީ. ގައުމު ތަރައްގީ ކުރަން ވެރިކަމެއް ކުރާ ބަޔަކު ޖެހޭނެ ނޫންތޯ މިއާ ދޭތެރޭގައި ވިސްނަން." އަސާސީ ކަންކަން ކުރިން ފުރިހަމަ ނުވާކަން ފާހަގަކުރައްވަމުން ރައީސް ވިދާޅުވި އެވެ.
ރައީސް ވިދާޅުވި ގޮތުގައި އެމަނިކުފާނުގެ މި ނިމިގެންދާ ފަސް އަހަރުގައި 141 ރަށުގައި ފެނާއި ނަރުދަމާގެ މަސައްކަތް ކުރުމާއި, 150 އަށްވުރެ ގިނަ ރަށުގައި އިންޖީނުގެ ބަދަލުކޮށް, ޖަނަރޭޓަރު ގެންދިއުމާއި, 125 ރަށުގެ ބަނދަރުތައް ލަފާ ފުރޭ ފެންވަރަށް ބަދަލު ކުރުމުގެ އިތުރުން, 127 ރަށަކަށް އެމްބިއުލާންސް ގެންދަން ޖެހުނުކަން އެމަނިކުފާނު ފާހަގަ ކުރެއްވި އެވެ. ކުރިން ބަޔަކު ރަނގަޅު ވެރިކަމެއް ކޮށްފައި އޮތްނަމަ މިކަންކަން ފުރިހަމަކުރަން އެމަނިކުފާނަށް ނުޖެހުނީސްކަމަށް ރައީސް ވިދާޅުވި އެވެ.
އެތެރެފުށް ޕްރޮގްރާމުގައި ރައީސް މައުލޫމާތު ދެއްވަނީ -- ފޮޓޯ: ރައީސް އޮފީސް
މީގެ އިތުރުން ނޫސްވެރިކަން ކުރުމުގެ މިނިވަންކަން އޭރު ނެތްކަން ފާހަގަކުރައްވައި ރައީސް ވަނީ އޭރުގެ ހާލަތު ސިފަ ކުރައްވާފަ އެވެ.
"ގަލަމުގެ ދޯރި ނުނެގޭ ނޫންތޯ, ކިތައް މީހުންގެ މޫނަށް ތޯ ޕެޕާ ސްޕްރޭ ޖެހީ. އަބުރުގެ ގާނޫނު އޮތެއް ނޫންތޯ. ކޯއްޗެއްތޯ ރަނގަޅަށް ނޫހެއްގައި ލިޔެވެނީ, ބިރުވެރިކަމެއް ނެތި. ހަމަގައިމު ވެސް ނޫސްވެރިއެއްގެ ހައިސިއްޔަތުން މިއައި ބަދަލު ފެނިވަޑައިގަންނަވާނެ" ރައީސް ވިދާޅުވި އެވެ.
