ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ކެމްޕޭނަށް އޭނާގެ ހަގު އަނބިކަނބަލުން ފާތިމަތު ރާނިޔާ ވެސް ނުކުމެވަޑައިގެންފި އެވެ.
ޖޭޕީގެ ކެމްޕޭނުގައި އަމަލީ ގޮތުން ބައިވެރިވެވަޑައިގެން ރާނިޔާ ފުރަތަމަ ވަޑައިގެންނެވީ އދ.ދަނގެއްޗަށެވެ. އެ ރަށަށް ވަޑައިގެން ޖޭޕީގެ ޖަގަހައެއް ހުޅުއްވައިދެއްވި އެވެ. ޖަގަހަ ކައިރީގައި ޕާޓީގެ ސަޕޯޓަރުންނާއެކު އޭނާ ހަރަކާތްތެރިވެވަޑައިގަންނަވާ މަންޒަރު ފެންނަ ފޮޓޯތަކެއް ޖޭޕީން ވަނީ ސޯޝަލް މީޑިއާގައި އާންމުކޮށްފަ އެވެ.
ގާސިމް ރާނިޔާއާ ކައިވެނިބައްލަވައި ގަތީ 2020 ވަނަ އެވެ. އެހެން ނަމަވެސް ގާސިމްގެ ސިޔާސީ މަސައްކަތްތަކުގައި މީގެ ކުރިން ކުރިން ބައިވެރިވެވަޑައިގެން ނޫޅުއްވަ އެވެ. މިއީ ސިޔާސީ މަސައްކަތެއް ނަހުލާ ފިޔަވައި ގާސިމްގެ އަނބިކަނބަލަކު ބައިވެރިވެވަޑައިގެންނެވި ފުރަތަމަ ފަހަރެވެ.
ގާސިމްގެ ހަގު އަނބި ރާނިޔާ; ދަނގެތީގައި ކެމްޕޭން ކުރައްވަނީ
ގާސިމްގެ ސިޔާސީ ހަރަކާތްތަކުގައި އެންމެ އިސްކޮށް އުޅުއްވާ އެއް ބޭފުޅަކީ އަނބިކަނބަލުން އައިޝަތު ނަހުލާއަށް ވާއިރު, ނަހުލާ ވެސް ސިޔާސީ ދާއިރާށް ނިކުމެވަޑައިގެންނެވީ 2018 ވަނަ އަހަރުގެ އިންތިހާބާ ދިމާކޮށެވެ.
އޭރު ރައީސް އިބްރާހިމް މުހައްމަދު ސޯލިހުގެ ކެމްޕޭނުގައި ގާތުން ހަރަކާތްތެރި ވެވަޑައިގެންނެވި ނަހުލާ އަކީ މި ސަރުކާރުގެ ޓްރާންސްޕޯޓް މިނިސްޓަރެވެ. މި އަހަރުގެ އިންތިހާބުގައި ގާސިމަށް ތާއިދު ކުރައްވާ ކެމްޕޭނުގައި ހަރަކާތްތެރިވާއިރު ވެސް އޭނާ ހުންނެވީ އެ މަގާމުގަ އެވެ.
