ގަލޮޅު ރަތްވިލާ ގޯޅީގައި ހުންނަ ވެގަ ޕޮއިންޓު ފިހާރައިގައި ރޭ ފަތިހު އަލިފާން ރޯވެ އެ ފިހާރަ އެއްކޮށް އަނދައި އަޅިއަށްވެއްޖެ އެވެ.
އެ އަލިފާނުގައި އެއްވެސް މީހަކަށް އަނިޔާއެއް ލިބިފައި ނުވާ ކަމަށް އެމްއެންޑީއެފުން ކަށަވަރުކޮށްދެ އެވެ. ނަމަވެސް އެ އަލިފާނުގައި އެ ފިހާރައިގެ ބިތްދޮށުން ހުރި ގެ ވެސް ވަނީ އެއްކޮށް އަނދައި ހުލިވެފަ އެވެ.
އެ އަލިފާންގަނޑު މިހާރު އެއްކޮށް ކޮންޓުރޯލްވެފައި ވާއިރު އަދިވެސް އެ ސަރަހައްދުން ކޮންމެވެސް ވަރަކަށް ދުން އަރަމުންދާ ކަމަށް އެ ސަރަހައްދުގައި ހަރަކާތްތެރިވަމުންދާ "އަދަދު" ގެ ނޫސްވެރިން މައުލޫމާތުދެ އެވެ
ވެގަޕޮއިންޓު ފިހާރަ އަނދައި އަޅިއަށް ވެފައި. -- ފޮޓޯ: ހުސައިން ޖަވާޒު
އަލިފާން ރޯވި ވެގަ ޕޮއިންޓު ހުންނަ ސަރަހައްދަކީ ވަރަށް ބައިބޯ ސަރަހައްދެއް ކަމުން އެ ހިސާބުގައި ދިރިއުޅޭ މީހުންގެ ތެރެއިން އެތައް ބަޔަކު މިހާރު ވެސް މަގުމަތީގައި އެބަ ތިއްބެވެ. އޭގެތެރެއިން އެއްވެސް ބަޔަކަށް ވަގުތީ ހިޔާވަހިކަން އަދި ހަމަޖައްސައިދީފައިވާ ކަަމުގެ މައުލޫމާތެއް މިހައިތަނަށް އަދި ނުލިބެ އެވެ.
އެ ފިހާރައިގައި އަލިފާން ރޯވެފައި ވަނީ ރޭ ފަތިހު 4:30 ހާއިރު އެވެ. އެތަނުގައި އަލިފާން ރޯވާން މެދުވެރިވި ސަބަބެއް މިހާތަނަށް އަދި އެނގިފައެއް ނުވެ އެވެ. އެމްއެންޑީއެފުން ބުނީ އަލިފާން ރޯވި ކަމުގެ ރިޕޯޓު އެ އިދާރާއަށް ލިބުނީ 4:37 ގައި ކަމަށެވެ. ރިޕޯޓު ލިބުމާއެކު ސިފައިން ގޮސް އަލިފާން ނިވުމުގެ މަސައްކަތް ފެށި ކަމަށް އެމްއެންޑީއެފުން ބުނެ އެވެ.
