ވިލާ ކޮލެޖުން މިއަހަރު އަލަށް ފެށުމަށް ހަމަޖެހިފައިވާ ޕްރޮގްރާމެއް ކަމަށްވާ، ބެޗްލާ އޮފް ފާމަސީ ޕްރޮގްރާމަށް ވަނުމުގު ފުރުސަތު ހުޅުވާލައިފި އެވެ.
ވިލާ ކޮލެޖުން ބުނީ މި ޕްރޮގްރާމްގެ ކިޔެވުން ފަށާނީ އެ ކޮލެޖުގެ ސެޕްޓެމްބަރު މަހުގެ އިންޓޭކުގައި ކަމަށެވެ. އަދި މި ޕްރޮގްރާމް ފަރުމާކޮށްފައިވަނީ ތަފާތު ތިން ލެވްލަކުން ޕްރޮގްރާމަށް ވަދެވޭގޮތަށް ކަމަށް ބުންޏެވެ. އެއީ:
ބެޗްލަ އޮފް ފާމަސީ – އަލަށް ފަށާ ދަރިވަރުންނަށް
ބެޗްލަ އޮފް ފާމަސީ އަލަށް ފަށާ ދަރިވަރުންނަށް މި ޕްރޮގްރާމަށް ވަންނަން، އޭލެވެލެގެ ކެމިސްޓްރީ އަދި ފިޒިކްސް ހިމެނޭ ގޮތަށް، ޖުމްލަ ތިން މާއްދާއިން ފާސްވާންޖެހޭނެ އެވެ. ނުވަތަ ގުޅޭ ދާއިރާއަކުން އެމްއެންކިއުއެފް ލެވެލް ހަތަރެއްގެ ކޮލިފިކޭޝަނަކާއެކު އަދި އޯ ލެވެލް ނުވަތަ އެއާ އެއް ފެންވަރުގެ އިނގިރޭސި ފާހެއް ލިބިފައިވާ ކުދިންނަށްވެސް މި ލެވެލް އިން ޕްރޮގްރާމަށް ވަދެވޭނެ ކަމަށް ވިލާ ކޮލެޖުން ބުންޏެވެ. މި ކޯހުގެ މުއްދަތަކީ ޖުމްލަ ހަތަރު އަހަރެވެ.
ބެޗްލަ އޮފް ފާމަސީ – އެމްއެންކިއުއެފް ލެވެލް 5ގެ ޑިޕްލޮމާ ހާސިލުކޮށްފައިވާ ދަރިވަރުންނަށް:
ފާމަސީގެ ދާއިރާއިން އެމްއެންކިއު އެފް ލެވެލް ފަހެއްގެ ޑިޕްލޮމާ ހާސިލުކޮށްފައިވާ ދަރިވަރެއް ނަމަ، މި ޕްރޮގްރާމްގެ ތިން ވަނަ އަހަރަށް ވަދެވޭނެއެވެ. މިރޫޓްއިން މި ޕްރޮގްރާމަށް ވަންނަ ދަރިވަރުންގެ ޑިޕްލޮމާގެ މުއްދަތަކީ ދެ އަހަރު ދުވަސްކަމުގައި ވާން ޖެހޭނެ ކަމަށް ވިލާ ކޮލެޖުން ބުންޏެވެ.
ބެޗްލަ އޮފް ފާމަސީ – އެމްއެންކިއުއެފް ލެވެލް 6ގެ އެޑްވާންސްޑް ޑިޕްލޮމާ ހާސިލުކޮށްފައިވާ ދަރިވަރުންނަށް:
ފާމަސީގެ ދާއިރާއިން އެމްއެންކިއު އެފް ލެވެލް ހައެއްގެ އެޑްވާންސްޑް ޑިޕްލޮމާ ހާސިލުކޮށްފައިވާ ދަރިވަރެއް ނަމަ، މި ޕްރޮގްރާމްގެ ހަތަރު ވަނަ އަހަރަށް ވަދެވޭނެ އެވެ. އެ މަގުން މި ޕްރޮގްރާމަށް ވަންނަ ދަރިވަރުންގެ އެޑްވާންސްޑް ޑިޕްލޮމާގެ މުއްދަތަކީ ތިން އަހަރު ދުވަސްކަމުގައި ވާން ޖެހޭނެ އެވެ.
ވިލާ ކޮލެޖުން ބުނީ މި ޕްރޮގްރާމްގައި ކިޔަވާ ދަރިވަރުން ތަޖުރިބާ ހޯދުމަށްޓަކައި ޕްރޮގްރާމްގެ މުއްދަތުގެ ތެރޭގައި ރާއްޖެއިން ބޭރުގައި އެކްޓަންޝިޕް ޕްރޮގްރާމެއް ފުރިހަމަ ކުރާ ގޮތަށް ވެސް ހަމަޖެހިފައިވާ ކަމަށެވެ. އަދި ޕްރޮގްރާމްގެ ފަހު އަހަރުގައި ޖީއެމްޕީ (ގުޑް މެނުފެކްޗަރިންް ޕްރެކްޓިސް) ކޮލިޓީ އެންޑް ސްޓޭންޑަޑްސް ގެ ތަޖުރިބާ ހޯދުމަށްޓަކައި ޑަބްލިއުއެޗްއޯ އިން ގަބޫލުކުރާ ފެންވަރުގެ ބޭސް އުފައްދާ ކާރުހާނާއަކަށް ތަޖުރިބާ ދަތުރެއް ވެސް ހިމެނިފައިވާ ކަމަށް ބުންޏެވެ.
އެ ކޮލެޖުން ބުނި ގޮތުގައި މި ޕްރޮގްރާމުގެ ކިޔެވުން ހަމަޖެހިފައިވާނީ ވަޒީފާގައި އުޅެމުން ވެސް ދަރިވަރުންނަށް ކްލާސްތަކަށް ހާޒިރުވެވޭ ގޮތަށެވެ. އަދި މިއީ މޯލްޑިވްސް ކޮލިފިކޭޝަން އޮތޯރިޓީ އަދި އެލައިޑް ހެލްތް ކައުންސިލުން އެޕްރޫވް ކުރެވިގެން ހިންގާ ޕްރޮގްރާމެއް ކަމަށް ވެސް ބުންޏެވެ.
އެ ޕްރޮގްރާމްގައި ބައިވެރިވުމުގެ މުއްދަތު ހަމަވާނީ ސެޕްޓެމްބަރު 16، 2023 ގަ އެވެ. އެ ޕްރޮގްރާމް ނިންމުމަށްފަހު ފާމަސިސްޓުންގެ ގޮތުގައި ދަރިވަރުންނަށް ވަޒިފާ އަދާ ކުރެވޭނެ އެވެ. އެ ޕްރޮގްރާމާ ބެހޭ މަޢުލޫމާތު ވިލާ ކޮލެޖުގައި ވެބްސައިޓްގައި ލިބެން ހުންނާނެ އެވެ.
