އެމަނިކުފާނުގެ އަމިއްލަފުޅު އެކައުންޓަށް އެއްވެސް ކުންފުންޏަކުން ފައިސާ ޖަމާކޮށްފައި ނުވާނެ ކަމަށާއި އަދި ކުރިއަށް އޮތް ތަނުގައި ވެސް އެފަދަ ކަމެއް ނުހިނގާނެ ކަމަށް އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
މިއަދު ހެނދުނު ހދ. ގެ ރަށްތަކަށް ރައީސް ވަނީ ކެމްޕޭން ދަތުރުފުޅެއް ފައްޓަަވާފަ އެވެ. އެ ދަތުރުފުޅުގެ ތެރެއިން ހދ. ނޮޅިވަރަންފަރުގައި ބޭއްވި ޖަލްސާގައި ރައީސް ވަނީ މިއީ ތަރައްގީގެ ގިނަ މަޝްރޫއުތަކެއް ހިންގި ދައުރެއް ކަމަށާއި ނަމަވެސް އެމަނިކުފާނުގެ އަމިއްލަފުޅު އެކައުންޓަށް އެއްވެސް ފައިސާއެއް ޖަމާކޮށްފައި ނުވާނެ ކަމަށެވެ.
"މި ދައުރަކީ ހަމަ ގައިމު ވެސް ރާއްޖޭގެ ތާރީހުގައި އެއް ދައުރަކަށް އެންމެ ގިނަ ތަރައްގީގެ މަޝްރޫއުތައް ހިންގުނު ދައުރު. ހުރިހާ ރަށަކަށް ބެލި ނަމަވެސް އެކަން ފެންނާނެ. އެހެން ނަމަވެސް, ހަމަ ގައިމު ވެސް އަޅުގަނޑުގެ އެކައުންޓަކަށް އެއްވެސް ފައިސާއެއް ވަދެފައި ނޯންނާނެ," ރައީސް ވިދާޅުވި އެވެ.
ރައީސް ސޯލިހު އެ އިޝާރާތް ކުރައްވަނީ ހައުސިން މިނިސްޓަރު ކަމުގައި ފެބްރުއަރީ 2012 އިން ނޮވެމްބަރު 2018 އަށް ހުންނެވި، ޕީއެންސީގެ ކެންޑިޑޭޓު ޑރ. މުހައްމަދު މުއިއްޒުގެ މިނިސްޓަރުކަމުގެ މަގާމުގައި ހުންނެވިއިރު، ރާއްޖޭގައި އެކި މަޝްރޫއުތައް ހިންގި ބައެއް ކުންފުނިތަކުން ގިނަ އަދަދެއްގެ ފައިސާ އޭނާގެ އެކައުންޓަށް ޖަމާވެފައިވާ ކަމަށް "އަދަދު" ނޫހުން ރިޕޯޓުކުރި ހަބަރަށެވެ.
"ކުރިޔަކު ވެސް ނުވަދޭ. މިހާރަކު ވެސް ނުވަންނާނެ. ދެނެއް ވެސް އަޅުގަނޑުގެ އެކައުންޓަކަށް އެއްވެެސް ކުންފުންޏަކުން ފައިސާއެއް ޖަމާނުކުރާނެ,"
ކުރީގެ ސަރުކާރުގެ ރާއްޖޭގައި ކަންކަން ނުކުރެވި ލަސްވެގެންދިޔަ ސަބަބަކީ ފަށާ ކޮންމެ ޕްރޮޖެކްޓަކުން ވެރިންނަށް ބައި އަޅަން ޖެހުމުން ކަމަށް އެމަނިކުފާނު ވިދާޅުވި އެވެ. ނަމަވެސް, މި ސަރުކާރުން އެތައް ހާސް ޕްރޮޖެކްޓެއް ފަށައި ނިންމަމުން ދަނީ ހާމަކަން ބޮޑުކޮށް ކަންކަން ކުރަމުންދާތީ ކަމަށް ރައީސް ވިދާޅުވި އެވެ.
