ޖަލުގައި އޮންނެވި ކުރީގެ ރައީސް ޔާމީން މިނިވަންކުރާނެ ކަމަށް ސިޔާސީ ބައެއް ފަރާތްތަކުން ދައްކާ ވާހަކަތަކަކީ ރައްޔިތުންނަށް އޮޅުވައިލަން ދައްކާ ވާހަކަތަކެއް ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރާއްޖެޓީވީގެ "ފަށާއިރު" ޕްރޮގްރާމު ގައި ކުރި ސުވާލަަކަށް ޖަވާބުދެއްވަމުން ރައީސް މިއަދު ވިދާޅުވީ ޔާމީން މިނިވަންކުރާނެ ކަމަށް ބުނަމުންދާއިރު ކުށްވެރިއަކަށް މާފު ދިނުމުގެ މަރުހަލާތައް އޮންނަ ގޮތް އެވާހަކަދައްކާ ފަރާތްތަކަށް ވަރަށް ރަނގަޅަށް އެނގޭނެ ކަމަށެވެ. ޔާމީނުގެ ހުކުމުގައި އެ މަރުހަލާތައް އަދި ފުރިހަމަ ނުވާ ކަމަށް ވެސް އެމަނިކުފާނު ވިދާޅުވި އެވެ. އިންތިހާބާ ދިމާކޮށް ޔާމީން މިނިވަންކުރާނެ ކަމަށް ބުނަމުންދަނީ ސިޔާސީ މަންފާއެއް ހޯދަމް ކަމަށް ވެސް އެމަނިކުފާނު ވިދާޅުވި އެވެ.
ޔާމީނު މިނިވަންކުރާ ވާހަކަ އެންމެ ގިނައިން ދައްކަވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު އެވެ.
"އެއީ ކުރެވެން އޮތް ކަމެއް ނޫން. އެއީ ކުރިއަށް އޮތް ރިޔާސީ އިންތިހާބުގައި ރައްޔިތުންނަށް އޮޅުވައިލުމަށް ދައްކަމުން ގެންދަވާ ވާހަކަތަކެއް" ރައީސް ސޯލިހު
އެމަނިކުފާނު ވިދާޅުވީ ހުކުމެއް ތަންފީޒުކުރަމުންދާ ކުށްވެރިއަކަށް މާފު ދެވެން އޮންނަނީ އޭނޭގެ ހުކުމުގެ މައްސަލަ ހުރިހާ މަރުހަލާއެއްގެ ކޯޓުތަކުން ނިމި ހުކުމުން ބައެއް ތަންފީޒުކޮށް ނިމުމުން ކަމަށެވެ. ނަމަވެސް ޔާމީނުގެ ހުކުމުގެ މައްސަލަ އަދި ހުރިހާ މަރުހަލާއެއްގެ ކޯޓަކުން ނުނިމޭއިރު ކްލެމެންސީ ދެވޭވަރަށް ހުކުމް އަދި ތަންފީޒުވެސް ނުވާ ކަމަށް ރައީސް ވިދާޅުވި އެވެ.
"އެހުކުމަށް ސްޕްރީމް ކޯޓުން ވާނެ ގޮތެއްވެސް ނޭނގެ. ހުކުމް ދަމަހައްޓަން ނިންމައިފި ނަމަ ކްލެމެންސީއަކަށް ދެވޭ ވަރަކަށް ހުކުމް ތަންފީޒެއްވެސް ނުކުރޭ. އެހެންވީމަ ވެރިއަކަށް ހުންނަ ބޭފުޅަކަށް، އަދި އެހެންބޭފުޅަކު ވެރިއަކަށް ވަޑައިގަތް ނަމަވެސް އެކަން އެގޮތައް ކުރެވޭކަށް ނޯންނާނެ" ރައީސް ވިދާޅުވި އެވެ.
ޔާމީން ޖަލަށް ލުމަށް ހުކުމް ކުރީ އެމްއެމްޕީއާރުސީން ޓޫރިޒަމްގެ ބޭނުމަށް ދޫކުރި ވ. އާރަށް ކުއްޔަށް ދިނުމުގެ މުއާމަލާތުގައި ހިޔާނާތްތެރިވެފައިވާ ކަމާއި މަނީ ލޯންޑަ ކޮށްފައިވާ ކަމަށް ސާބިތުވުމުންނެވެ. އެހެންވެ ކްރިމިނަލް ކޯޓުން ވަނީ ޔާމީން 11 އަހަރަށް ޖަލަށް ލުމަށް ހުކުމްކޮށްފަ އެވެ. ޔާމީނުގެ ފަރާތުން ސްޕްރީމް ކޯޓުގައި އެ މައްސަލަ އިސްތިއުނާފުކޮށްފައި ވާއިރު ޔާމީނު މިނިވަންކުރުމަކީ ޕީޕީއެމްގެ ކޯލިޝަނުގައި ހިމެނޭ ޕީއެންސީގެ ރިޔާސީ ކެންޑިޑޭޓް ޑރ. މުއިއްޒުގެ އެންމެ ބޮޑު އެއް ރިޔާސީ ވައުދެވެ.
