މަސްތުވާތަކެތީގެ ވަބާގައި ޖެހިފައިވާ މީހުންނަށް ފަރުވާ ދިނުމަށް "ރިކަވަރީ ވިލެޖު"ގެ ނަމުގައި މަރުކަޒުތަކެއް ތަރައްގީ ކުރަން އެމްޑީޕީގެ މެނިފެސްޓޯގައި ހިމަނައިފި އެވެ.
ރިޔާސީ ދެ ވަނަ ދައުރަކަށް ކެމްޕޭން ކުރައްވާ ރައީސް އިބްރާހިމް މުހައްމަދު ސޯލިހުގެ "އުފާވެރި މާލެ" މެނިފެސްޓޯގައި ބުނެފައި ވަނީ ރިކަވަރީ ވިލެޖަކީ މަސްތުވާތަކެތީގެ ވަބާގައި ޖެހިފައިވާ މީހުން އެކަމުން ސަލާމަތް ކުރުމަށް ބޭނުންވާ ހުރިހާ ހިދުމަތެއް ހިމެނޭހެން ތަރައްގީކުރާނެ ތަނެއް ކަމަށެވެ. މިފަދަ ތިން ވިލެޖެއް ތިން ސަރަހައްދެއްގައި ހެދުމަށް ވަނީ ނިންމައިފަ އެވެ.
ރާއްޖޭގައި މަސްތުވާތަކެތީގެ ވަބާގައި ޖެހިފައިވާ އެތައް ހާސް މީހުންނެއް ތިބިއިރު، ރައީސް ސޯލިހުގެ ދެ ވަނަ ދައުރެއްގައި ތައާރަފު ކުރާ ރިކަވަރީ ވިލެޖަކީ ފަރުވާ ބޭނުންވާ މީހުންނަށް ރައްކާތެރި، އަމާން ތަނަކަށް ވެގެންދާނެ ކަމަށާއި، އެތަނުގައި ދިގު މުއްދަތަށް ރިކަވަރީ ލަނޑުދަނޑިތައް ކަނޑައަޅައި ފަރުވާ ފޯރުކޮށްދެވޭނެ ކަމަށް މެނިފެސްޓޯގައި ބުނެފައި ވެއެވެ.
"ރިކަވަރީ ވިލެޖުގައި އެކަކު އަނެކަކަށް އެހީތެރިވެ އެއްބާރުލުން ދެވޭނެ މާހައުލެއް ގާއިމްކޮށް، އަމިއްލަ ނަފްސުގެ ބޭނުންތެރިކަން އިހުސާސްކޮށްދިނުން" މެނިފެސްޓޯގައިވެ އެވެ.
އެމްޑީޕީގެ މެނިފެސްޓޯގައި ބުނާ ގޮތުން ރިކަވަރީ ވިލެޖުގައި ހިންގާ ޕްރޮގްރާމުތަކުން ސިއްހީ ރަނގަޅު އާދަކާދަ އަށަގަންނަވާ، ތެރަޕީ ސެޝަންތަކާއި މަސައްކަތްތެރިކަމުގެ އެހީގައި އަމިއްލަ ނަފުސަށް ކުރާ އިތުބާރު އިތުރުކުރެވޭނެ އެވެ.
"ރިކަވަރީ ވިލެޖުގައި ތަފާތު ތެރަޕިއުޓިކް އުކުޅުތައް ބޭނުންކޮށްގެން ކައުންސިލިން ގްރޫޕް ތެރަޕީ، އެމޯޝަނަލް ހީލިން، ވޮކޭޝަނަލް ޓްރެއިނިން އަދި މުނިފޫހިފިލުވުމުގެ ހަރަކާތްތައް ކުރިއަށް ގެންދިއުން" މެނިފެސްޓޯގައި ބުނެފައިވެ އެވެ.
އެ ވިލެޖަކީ ތައުލީމަށް މަގުފަހިކޮށްދީ، ގުޅުންތައް ބަދަހިކޮށް، އަނބުރާ މުޖުމައުއަށް އަންނައިރު ގޭތެރެއިން ބޭނުންވާ އެހީތެރިކަން ލިބޭނެ ފަދަ ތަނަކަށް ވާނެ ކަމަށް މެނިފެސްޓޯގައި ބުނެ އެވެ.
ޑްރަގަށް ދެވިހިފައިވާ ފަރާތްތަކަށް މިހާރު ފަރުވާ ދެނީ ހިންމަފުށީ ޑްރަގު ރިހިބިލިޓޭޝަން ސެންޓަރުގެ އިތުރުން ހުޅުމާލޭ ހާފްވޭ ހައުސްގެ އިތުރުން ރާއްޖޭގެ ބައެއް ރަށްރަށުގައި ޑިޓޮކްސް ސެންޓަރުތައް ހުރެ އެވެ.
