ރައީސް އިބްރާހިމް މުހައްމަދު ސޯލިހުގެ މި ދައުރުގައި އެމްޓީސީސީން އެކަނި ވެސް ހަތް ބިލިއަން ރުފިޔާގެ އަގު ހުރި މަޝްރޫއުތައް ހިންގާފައިވާ ކަމަށާއި މިހާރު ވެސް ހަތް ބިލިއަން ރުފިޔާގެ އަގު ހުރި މަޝްރޫއުތައް ހިންގަމުންދާ ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެ އެވެ.
ގދ. ތިނަދޫގެ އާރްޓީއެލް ފެރީ ރަސްމީކޮށް ފެށުމަށް ބޭއްވި ރަސްމިއްޔާތުގެ ތެރެއިން ރައީސް ސޯލިހަށް ތައުރީފު ކުރައްވާ އާޒިމް ވިދާޅުވީ, އެމަނިކުފާނުގެ ޒައާމަތަކީ ހަމައެކަނި އެމްޓީސީސީއަށް ބަލާލިއަސް ރާއްޖޭގެ ތަރައްގީއަށް އެންމެ ގިނަ މަޝްރޫއު ހިންގި ޒައާމަތް ކަމަށެވެ.
އާރްޓީއެލް އިން ރާއްޖެ ގުޅާލުމުގެ މަޝްރޫއުގެ އަދާހަމަ ފާހަގަކުރައްވާ އާޒިމް ވިދާޅުވީ, ރައީސް ސޯލިހު ކަމެއް ކޮށްދެއްވާނެ ކަމަށް ވިދާޅުވެއްޖެ ނަމަ އެކަން ކޮށްދެއްވާނެ ކަމަށާއި, އެކަމަށް ޝައްކު ކުރާނެ ރައްޔިތަކު މިގައުމުގައި ނުހުންނާނެ ކަމަށެވެ.
އެމްޓީސީސީން މި ދައުރުގައި ހިންގި މަޝްރޫއުތަކުގެ ތަފާސްހިސާބުތައް ފާހަގަކުރައްވާ އާޒިމް ވިދާޅުވީ މިހާތަނަށް 154 މަޝްރޫއު އެއްކޮށް ނިމިފައިވާ ކަމަށާއި, 150 އަށްވުރެ ގިނަ މަޝްރޫއުގެ އަމަލީ މަސައްކަތް މިވަގުތު ކުރިއަށް އެބަދާ ކަމަށެވެ.
"މިހާތަނަށް 7 ބިލިއަން ރުފިޔާގެ ތަރައްގީގެ މަޝްރޫއުތައް އެމްޓީސީސީން އެކަނިވެސް ނިންމައިފިން. އެއީ 7,000 މިލިއަން ރުފިޔާގެ މަސައްކަތް. މިވަގުތު ހިނގަމުންދާ މަޝްރޫއުތަކުގެ އަގު 7 ބިލިއަނަށް އަރާ. އަދި ސާވޭ ހެދުމާއި, އީއައިއޭ ހެދުމުގެ މަރުހަލާގައި ހުރި މަޝްރޫއުތައް ވެސް 4 ބިލިއަނަށް އަރާ," އެމްޓީސީސީން ހިންގާ މަޝްރޫއުތަކުގެ އަގު ހާމަކުރައްވާ އޭނާ ވިދާޅުވި އެވެ.
އާޒިމް ވިދާޅުވީ މިހާތަނަށް 57 ބަންދަރުގެ މަސައްކަތް ނިމިފައިވާއިރު, 66 ބަނދަރުގެ މަސައްކަތް ކުރިއަށް އެބަދެ އެވެ. އަދި ތިން އެއާޕޯޓެއް ނިމިފައިވާއިރު, ފަސް އެއާޕޯޓެއްގެ މަސައްކަތް ކުރިއަށް އެބަދެ އެވެ. އޭނާ ވިދާޅުވީ މި ދައުރުގެ ތެރޭގައި އެމްޓީސީސީން އެކަނިވެސް 460 ހެކްޓަރުގެ ބިން ހިއްކާފައިވާ ކަމަށެވެ.
"ދެން ކޮބާތޯ ބްރިޖުތަކާއި, ހޮސްޕިޓާތަކާއި, މަލްޓި ޕާޕަސް ހޯލްތަކާއި އިމާރާތްތަކާއި, ކޯޒްވޭތަކާއި, އައްސޭރި ފަށް ހިމާޔަތް ކުރުމުގެ މަސައްކަތްތަކާއި މަގު ހެދުމުގެ މަސައްކަތްތަކާއި, ބިން ހިއްކުމުގެ މަސައްކަތް މިހާރު ވެސް ފަތު އަޑު ކިޔާފައި އެދަނީ ހިނގަމުން," އާޒިމް ވިދާޅުވި އެވެ.
އާޒިމް ވިދާޅުވި ގޮތުގައި ސަރުކާރުން މިއަދު އެމްޓީސީސީއާ ހަވާލު ކުރަމުން ދަނީ, ކުރިން ބޭރުގެ ކުންފުނިތަކުން ކުރަމުންދިޔަ މަސައްކަތްތައް ކަމަށެވެ. އޭގެ ނަތީޖާ އަންދާޒާ ކުރައްވާ އާޒިމް ވިދާޅުވީ 150-200 މިލިއަނާ ދެމެދު އަދަދެއްގެ ޑޮލަރު ބޭރަށް ލީކު ނުވެ ރާއްޖޭގައި ހިފެހެއްޓިފައިވާ ކަމަށެވެ. އޭނާ ވިދާޅުވީ އެއީ ރައީސް ސޯލިހުގެ އިގްތިސޯދީ ސިޔާސަތުގެ ހަރުދަނާކަން ހާމަކޮށްދޭ ހަގީގަތް ކަމަށެވެ.
