އިންޑިއާގެ ގައުމީ އެއާލައިން "އެއާ އިންޑިއާ"އިން ރާއްޖެއާއި އެގައުމުގެ މުމްބާއީ އަދި ބްންގަލޫރުން އާއި ދެމެދު ސީދާ ދަތުރުތައް ފަށަން ނިންމައިފި އެވެ.
އެއާ އިންޑިއާގެ ރާއްޖޭގެ އެެޖެންޓް، ވިލާ ޓެރަވަލްސްއިން ބުނީ އެއާ އިންޑިއާއިން ރާއްޖެއަށް ދަތުރުތައް ފަށަން ހަމަޖެހިފައިވަނީ އަންނަ އޮކްޓޯބަރު 30، އިން ފެށިގެން ކަމަށެވެ.
ރާއްޖެ އާއި އިންޑިއާއާ ދެމެދު މި ވަގުތު ސީދާ ދަތުރުކުރަނީ އިންޑިއާގެ އިންޑިގޯ، ވިސްތާރާ އަދި ރާއްޖޭގެ ގައުމީ އެއާލައިން މޯލްޑިވިއަނުންނެވެ.
ވިސްތާރާއިން ވެސް ވަނީ އަންނަ އޮކްޓޯބަރުން ފެށިގެން އިންޑިއާގެ ވެރިރަށް ނިއުދިއްލީއާއި ރާއްޖެއާއި ދެމެދު ސީދާ ދަތުރުތައް ފަށާނެކަން އިއުލާނުކޮށްފަ އެވެ. މީގެ އިތުރުން މޯލްޑިވިއަނުން ވެސް ވަނީ ރާއްޖެއާއި ބެންގަލޫރާއި ދެމެދު އޮކްޓޯބަރު 30، އިން ފެށިގެން ސީދާ ދަތުރުތައް ފަށަން ނިންމާފަ އެވެ.
އިންޑިއާ އަކީ މިހާރު ރާއްޖެއަށް ދެ ވަނައަށް އެންމެ ގިނައިން ފަތުރުވެރިން އަންނަ ގައުމެވެ. ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތަކުގައި ވާގޮތުން މިމަހުގެ 23 ވަނަ ދުވަހާއި ހަމައަށް އިންޑިއާއިން ރާއްޖެއަށް ޒިޔާރާތްކޮށްފައިވާ ފަތުރުވެރިންގެ އަދަދު 131،926 އަށް އަރަ އެވެ.
