ޑިމޮކްރެޓުންގެ ރިޔާސީ ކެންޑިޑޭޓް އިލްޔާސް ލަބީބް ހުށަހަޅުއްވާ މާލެ ތަސައްވަރު؛ ވެށިފަހި މާލެ ސިޔާސަތުގައި ކުދި ގޯތި ކޮށިތައް އެއްމެދު އިމާރާތްތަކަށް ބަދަލުކުރަން ހިމަނައިފި އެވެ.
ރިޔާސީ ކެންޑިޑޭޓް އިލްޔާސް ލަބީބްގެ ވެށިފަހި މާލެ ސިޔާސަތުގެ ދަށުން ފުރަތަމަ ތަރައްގީކުރަން ނިންމާފައިވާ 10 ކޮށީގެ ރަށްވެހިންނަށް އެކަމުގެ މައުލޫމާތު މިއަދު ވަނީ ފޮނުވަން ފަށާފަ އެވެ.
އިލްޔާސްގެ ވެށިފަހި މާލެ ސިޔާސަތުގައި ހިމެނޭ ކަންކަން:
- ގޯތީގެ ވެރިފަރާތަށް 1،000 އަކަފޫޓުގެ ގޯއްޗެއް ހުޅުމާލެ ނުވަތަ ގްރޭޓާ މާލެ ސަރަހައްދުން ދިނުން.
- ގޭގެ ރެޖިސްޓްރީގައިވާ 18 އަހަރުން މަތީގެ ކޮންމެ މީހަކަށް ދޭއް ނުވަތަ ތިން ކޮޓަރީގެ ކޮންޑޯ ޔުނިޓެއް ދިނުން.
- މާލޭގެ އެންމެ ތޮއްޖެހި ކޮއްލަވާނިވެފައިވާ 10 ކޮށީގެ ރަށްވެހިން، 111، 351، 355، 356 އަދި 360 ކޮށީގައި ތަރައްގީކުރާ ކޮންޑޮމީނިއަމް އިމާރާތްތަކަށް ބަދަލުކުރުން.
- ސަރުކާރު ހިއްސާވާ ކުންފުނިތަކުގެ ބެލުމުގެ ދަށުގައި އަމީނީމަގުގައި ހުރި މި ފަސް ކޮށީގައި އިމާރާތްކުރާ ކޮންޑޮމީނިއަމް ތަކަކީ މުނިފޫހިފިލުވުމާއި، ކަސްރަތާއި، ކުޅިވަރާއި، ވިޔަފާރީގެ ހަރަކާތްތައް ހިމެނޭހެން އާބަން ލައިފްސްޓައިލަކަށް ބޭނުންވާ އެންމެހާ ހިދުމަތަކާއި ވަސީލަތަކާއެކު ގާއިމުކުރެވޭ ޒަމާނީ އިމާރާތްތަކަކަށް ހެދުން.
- ކުޑަކުދިންނަށް ބޭނުންވާ ޑޭކެއާ އަދި އުމުރުން ދުވަސްވީ މީހުންގެ އެލްޑާކެއާ ސެންޓަރުތައްވެސް ކޮންޑޮމޯނިއަމްތަކުގައި ހެދުން.
ޑިމޮކްރެޓްސް އިން ބުނީ މި މޮޑެލްއަކީ ސިންގަޕޫރުފަދަ ބިން ކުޑަ އަދި ތޮއްޖެހުން ބޮޑު އާބަން ސިޓީތަކުގައި ކާމިޔާބުކަމާއެކު ހިންގަމުން އަންނަ މޮޑެލެކެވެ.
އިލްޔާސް ލަބީބްގެ މާލޭ ތަސައްވަރު އޮޅުންފިލުވައިދިނުމަށް ޑިމޮކްރެޓްސްއިން އަންނަނީ މާލޭގައި އޮގަސްޓް 28، އިން ފެށިގެން ސިލްސިލާ ކަންމަތީ ބައްދަލުވުންތަކެއް ބާއްވަމުންނެވެ. އެ ބައްދަލުވުންތަކުގައި ރައީސް މުހައްމަދު ނަޝީދާއި، މާލެއަށް ނިސްބަތްވެވަޑައިންނަވާ މަޖިލިސް މެންބަރުންގެ އިތުރުން، ސިޓީ ކައުންސިލަރުންނާއި، ޑިމޮކްރެޓުންގެ ހަރަކާތްތެރިން ވާހަކަދައްކަވާނެ އެވެ.
