ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ވާދަ ކުރައްވާ ބައެއް ކެންޑިޑޭޓުން ވެރިކަމަށް ވަޑައިގަތުމުގެ ބަދަލުގައި ބޭނުމީ ކޮންމެވެސް ކަހަލަ ޑީލެއް ހަދަން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
ރިޔާސީ އިންތިހާބުގެ ކެމްޕެއިނުގައި ތ. ތިމަރަފުއްޓަށް ވަޑައިގެން ވާހަކަ ދައްކަވަމުން ރައީސް ވިދާޅުވީ ބައެއް ކެންޑިޑޭޓުން ބޭނުންވަނީ ދެ ވަނަ ބުރަކަށް ގޮސް ޑީލެއް ހަދަން އެކަނި ކަމަށެވެ.
"ކުރިމަތިލައްވާފައިވާ ތިބި ބޭފުޅުންގެ ތެރޭގައި ކޮންމެހެން ވެރިކަމަށް އަންނަން ބޭނުން ނުވާ، ބައިބައިކޮށްލަން، ދެ ވަނަ ބުރަކަށް ގެންދިޔުމަށް މަސައްކަތް ކުރާ ބޭފުޅުންތަކެއް އެބަ ތިބި. ބޭނުންވަނީ ދެ ވަނަ ބުރުގައި ކޮންމެވެސް ބަޔަކާ ޑީލެއް ހަދައިގެން އަމިއްލައަށް ފައިދާތަކެއް ހޯދުން. އެ ފުރުސަތު ނުދެއްވުމަކީ ވަރަށް މުހިންމު ކަމެއް،" ރައީސް ސޯލިހު ވިދާޅުވި އެވެ.
މިރޭގެ ޖަލްސާގައި ވާހަކަ ދައްކަވަމުން ރައީސް ވިދާޅުވީ ކުރިން އެމަނިކުފާނު ވެވަޑައިގަންނަވަމުންދިޔަ ވައުދުތަކަށް ބައެއް ފަރާތްތަކުން ޝައްކު ކުރަމުންދިޔަ ކަމަށާއި އެހެންނަމަވެސް މިހާރު އެފަދަ ސުވާލެއް ނެތް ކަމަށެވެ.
"އެއިރު އަޅުގަނޑުމެން ފުޓުބޯޅަ ދަނޑުތައް އަޅަންފެށީމަ ބުނި ކީއްކުރަން އަޅާ ފުޓުބޯޅަ ދަނޑުތަކެއްހެއްޔޭ. ހުދު އަޅުގަނޑުމެންގެ ތެރޭގައި ތިބި ބައެއް ބޭފުޅުން ވެސް އަޅުގަނޑާ އެ ޝަކުވާ ހުށަހެޅުއްވި،" އެމަނިކުފާނު ވިދާޅުވި އެވެ.
އޭގެ އިތުރުން، މިރޭގެ ޖަލްސާގައި ރައީސް ވަނީ ތިމަރަފުށީ ދާއިރާއަށް ކޮށްދެއްވާނެ ބައެއް ކަންކަން އިއުލާނު ކުރައްވައިފަ އެވެ. އޭގެ ތެރޭގައި ހިރިޔަންފަރުގައި ސިޓީ ހޮޓަލެއް އެޅުމާއި ކަނިމީދޫގައި ރިސޯޓު ތަރައްގީ ކުރުން ހިމެނެ އެވެ.
ރައީސްގެ އިތުރުން އިންތިހާބުގައި ވާދަ ކުރައްވަނީ އިދިކޮޅު ޕީޕީއެމް/ޕީއެންސީގެ ޑރ. މުހައްމަދު މުއިއްޒާއި ޑިމޮކްރެޓްސްގެ އިލްޔާސް ލަބީބާއި ޖުމްހޫރީ ޕާޓީގެ ގާސިމް އިބްރާހިމާއި އެމްއެންޕީގެ މުހައްމަދު ނާޒިމެވެ. އޭގެ އިތުރުން އުމަރު ނަސީރާއި ފާރިސް މައުމޫނާއި ހަސަން ޒަމީލް އަމިއްލަ ގޮތުން ވާދަ ކުރައްވަ އެވެ.
