މީގެ ހަތަރު އަހަރު ފަހުން ރާއްޖޭގެ އިގްތިސާދަށް 170 ބިލިއަން ރުފިޔާ ވަންނާނެ ކަމަށާއި ލޯނުތައް ދައްކަން އެއްވެސް ދަތިކަމެއް ނާންނާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ރޭ ވިދާޅުވި އެވެ.
އެމަނިކުފާނުގެ އިގުތިސޯދީ މެނިފެސްޓޯ ލޯންޗު ކުރުމަށްބޭއްވި ހަފުލާއެއްގައި ވާހަކަ ދައްކަވަމުން ރައީސް ސޯލިހު ވިދާޅުވީ ލޯނު ނަންގަވައިގެން މަސައްކަތް ކުރަނީ ލޯނު ދެއްކޭނެކަމުގެ ޔަގީންކަން އޮވެގެން ކަމަށެވެ.
"2028 ވަނަ އަހަރު އަންނައިރު، ދިވެހިރާއްޖޭގެ އިގްތިސާދު 170 ބިލިއަން ރުފިޔާ ފަހަނަ އަޅައިދާނެ. ނަތީޖާއަކަށްވަނީ ދައުލަތަށް ލިބޭ އާމްދަނީ 45 ބިލިއަން ރުފިޔާ ފަހަނައަޅައި 50 ބިލިއަނާ ދިމާއަށް އަމާޒު ހިފުން. އެހެންވެ އަޅުގަނޑުމެން ލޯނު ނަގައިގެން މި މަސައްކަތްތައް ކުރަނީ،" ރައީސް ވިދާޅުވި އެވެ.
ރައީސް ވިދާޅުވީ ރާއްޖޭގެ އެކި ކަންކޮޅުތަކުގައި ތަރައްގީ ކުރަމުންދާ އެއާޕޯޓުތަކުގެ ސަބަބުން ވަރަށް ގިނަ އަދަދެއްގެ ފައިސާ އިތުރުވާނެ ކަމަށެވެ. އަދި އޭގެ ސަބަބުން ވަޒީފާ ވެސް އިތުރުވާނެ ކަމަށް އެމަނިކުފާނު ވިދާޅުވި އެވެ.
"މީގެން ލިބޭ އެންމެ ބޮޑު އުފަލަކީ އަޅުގަނޑު ދެކޭ ގޮތުގައި ވަޒީފާތައް އުފެދުން،" ރައީސް ވިދާޅުވި އެވެ.
ރޭގެ ހަފުލާގައި ވާހަކަ ދައްކަވަމުން ރައީސް ވިދާޅުވީ އެމަނިކުފާނުގެ މެނިފެސްޓޯ ތަންފީޒުވުމުން "ހާއްސަކޮށް ބޮޑުތިލަދުންމައްޗަށް ބޮޑު ބަދަލެއް އަންނަތަން" ރައްޔިތުންނަށް ފެންނާނެ ކަމަށެވެ.
އޭގެ އިތުރުން، ބައެއް ރަށްރަށުގައި ޕްރޮޖެކްޓު ނުހިންގުނީ ކޮވިޑްގެ ސަބަބުން ކަމަށާއި އެ ވަބާގެ ސަބަބުން އިންސާނީ ވަސީލަތްތައް މަދުވެ، ހަރަދު ވަރަށް ބޮޑަށް އިތުރުވި ކަމަށް ރައީސް ވިދާޅުވި އެވެ.
"މި ދަތި އުނދަގޫ އަޅުގަނޑުމެންނަށް ކުރިމަތިވި. އެހެން ނަމަވެސް މިއަދުވެސް ބައެއް ރަށްރަށަށް އަޅުގަނޑު އަރާއިރު ބުނޭ ކީއްވެގެންހޭ މިވެނި ކަމެއް ނުކުރެވި އޮތީ. އަޅުގަނޑު ހިތަށް އަރާ އެބޭފުޅުން މިއާ ދޭތެރޭ ވިސްނަވާ ނުލައްވަނީ ކީއްވެބާވައޭ. އެ ދުވަހު ކުރިމަތިވި އެ ނާމާންކަމާއި އެ ބިރުވެރިކަން ހިތްދަތިކަން އެންމެ ފަހަރަކު ވެސް ވިސްނަވާ ނަމަ އެކަހަލަ ސުވާލެއް ނުކުރާނެ،" އެމަނިކުފާނު ވިދާޅުވި އެވެ.
އިގުތިސޯދީ ސިޔާސަތުގައި ހިމަނާފައިވާ ކަންކަން ތަންފީޒު ވެއްޖެ ނަމަ ރާއްޖޭން ފެނިގެންދާނީ މީގެ ކުރިން ނުފެންނަ ވަރުގެ ބޮޑު ބަދަލެކެވެ.
އިތުރު ހަބަރު
މުހިންމު ބައެއް ހަބަރު
ދުވަހުގެ ކޯޓޭޝަން
ރިޔާސީ ކެމްޕޭނުގައި ނ. ލަންދޫއަށް ވަޑައިގެން ބުދަ ދުވަހު ޖުމްހޫރީ ޕާޓީގެ ލީޑަރު ގާސިމް ވަނީ ޔާމީނަށް ވަރަށް ބޮޑަށް ފާޑުވިދާޅުވެފަ އެވެ. ގާސިމް ވިދާޅުވީ ޔާމީނަކީ 'އިނޮސެންޓު ބޭބީއެއް ނޫން' ކަމަށާއި ޖަލުގައި އޮންނަވަން ޖެހެނީ ކުށެއް ނުކުރަނީސް ނޫން ކަމަށެވެ.
ޗެކް އަމިއްލަ އެކައުންޓަށް ޖަމާކުރީމަ، ހަތަރު ފަސް ސަތޭކަ މިލިއަން ރުފިޔާ އެކައުންޓުތަކުގަ ހުރީމަ، ބަލަ ވެރިކަމަށް އައިރު ނެތް އެއްޗެއް ކިހިނެތްތޯ މަތިންތޯ އައީ، ދެން ބުނަނީ ޕާޓީ ލާރިއޭ، ޕާޓީގެ ލާރި ހުންނާނީ ޕާޓީގެ އެކައުންޓުގަ ނޫންތޯ"
ދުވަހުގެ ފޮޓޯ
އެމްޑީޕީގެ ރިޔާސީ ކެންޑިޑޭޓް، ރައީސް ސޯލިހުގެ އިގުތިސޯދީ މެނިފެސްޓޯ ނެރުމަށް ޒުވާނުންގެ މަރުކަޒުގައި ރޭ ބޭއްވި ބޮޑު އިވެންޓުގެ ތެރެއިން. -- ފޮޓޯ: އަބްދުﷲ އިޔާން/އަދަދު
