މީގެ ހަތަރު އަހަރު ފަހުން ރާއްޖޭގެ އިގްތިސާދަށް 170 ބިލިއަން ރުފިޔާ ވަންނާނެ ކަމަށާއި ލޯނުތައް ދައްކަން އެއްވެސް ދަތިކަމެއް ނާންނާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
އެމަނިކުފާނުގެ މެނިފެސްޓޯ ލޯންޗު ކުރުމަށް މިރޭ ބޭއްވި ހަފުލާއެއްގައި ވާހަކަ ދައްކަވަމުން ރައީސް ވިދާޅުވީ ލޯނު ނަންގަވައިގެން މަސައްކަތް ކުރަނީ ލޯނު ދެއްކޭނެކަމުގެ ޔަގީންކަން އޮވެގެން ކަމަށެވެ.
"2028 ވަނަ އަހަރު އަންނައިރު، ދިވެހިރާއްޖޭގެ އިގްތިސާދު 170 ބިލިއަން ރުފިޔާ ފަހަނަ އަޅައިދާނެ. ނަތީޖާއަކަށްވަނީ ދައުލަތަށް ލިބޭ އާމްދަނީ 45 ބިލިއަން ރުފިޔާ ފަހަނައަޅައި 50 ބިލިއަނާ ދިމާއަށް އަމާޒު ހިފުން. އެހެންވެ އަޅުގަނޑުމެން ލޯނު ނަގައިގެން މި މަސައްކަތްތައް ކުރަނީ،" ރައީސް ވިދާޅުވި އެވެ.
ރައީސް ވިދާޅުވީ ރާއްޖޭގެ އެކި ކަންކޮޅުތަކުގައި ތަރައްގީ ކުރަމުންދާ އެއާޕޯޓުތަކުގެ ސަބަބުން ވަރަށް ގިނަ އަދަދެއްގެ ފައިސާ އިތުރުވާނެ ކަމަށެވެ. އަދި އޭގެ ސަބަބުން ވަޒީފާ ވެސް އިތުރުވާނެ ކަމަށް އެމަނިކުފާނު ވިދާޅުވި އެވެ.
"މީގެން ލިބޭ އެންމެ ބޮޑު އުފަލަކީ އަޅުގަނޑު ދެކޭ ގޮތުގައި ވަޒީފާތައް އުފެދުން،" ރައީސް ވިދާޅުވި އެވެ.
މިރޭގެ ހަފުލާގައި ވާހަކަ ދައްކަވަމުން ރައީސް ވިދާޅުވީ އެމަނިކުފާނުގެ މެނިފެސްޓޯ ތަންފީޒުވުމުން "ހާއްސަކޮށް ބޮޑުތިލަދުންމައްޗަށް ބޮޑު ބަދަލެއް އަންނަތަން" ރައްޔިތުންނަށް ފެންނާނެ ކަމަށެވެ.
އޭގެ އިތުރުން، ބައެއް ރަށްރަށުގައި ޕްރޮޖެކްޓު ނުހިންގުނީ ކޮވިޑްގެ ސަބަބުން ކަމަށާއި އެ ވަބާގެ ސަބަބުން އިންސާނީ ވަސީލަތްތައް މަދުވެ، ހަރަދު ވަރަށް ބޮޑަށް އިތުރުވި ކަމަށް ރައީސް ވިދާޅުވި އެވެ.
"މި ދަތި އުނދަގޫ އަޅުގަނޑުމެންނަށް ކުރިމަތިވި. އެހެން ނަމަވެސް މިއަދުވެސް ބައެއް ރަށްރަށަށް އަޅުގަނޑު އަރާއިރު ބުނޭ ކީއްވެގެންހޭ މިވެނި ކަމެއް ނުކުރެވި އޮތީ. އަޅުގަނޑު ހިތަށް އަރާ އެބޭފުޅުން މިއާ ދޭތެރޭ ވިސްނަވާ ނުލައްވަނީ ކީއްވެބާވައޭ. އެ ދުވަހު ކުރިމަތިވި އެ ނާމާންކަމާއި އެ ބިރުވެރިކަން ހިތްދަތިކަން އެންމެ ފަހަރަކު ވެސް ވިސްނަވާ ނަމަ އެކަހަލަ ސުވާލެއް ނުކުރާނެ،" އެމަނިކުފާނު ވިދާޅުވި އެވެ.
