ވަޒީފާ ނެތް މީހުންނަށް އިންޝުއަރެންސް ސްކީމެއް ތައާރަފު ކުރަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ މެނިފެސްޓޯގައި ހިމަނައިފި އެވެ.
މިރޭ އާންމު ކުރި އެމަނިކުފާނުގެ ރިޔާސީ މެނިފެސްޓޯގެ އިގުތިސާދީ ބައިގައި ބުނެފައި ވަނީ އިންޝުއަރެންސް ސްކީމް ތައާރަފު ކުރާނީ ވަޒީފާ ގެއްލިފައިވާ ފަރާތްތަކާއި ވަޒީފާއެއް ހޯދުމަށް މަސައްކަތް ކުރަމުންދާ މީހުންނަށް ކަމަށެވެ. އޭގެ ބޭނުމަކީ އެފަދަ މީހުންނަށް ވެސް އާމްދަނީއެއް ކަށަވަރު ކުރުން ކަމަށް މެނިފެސްޓޯގައި ބުނެފައިވެ އެވެ.
އޭގެ އިތުރުން، ގުދުރަތީ ކާރިސާތަކުން ރައްކާތެރިކަން ހޯދުމަށާއި ކަނޑުމަތީގެ ހާދިސާތަކުން ރައްކާތެރިކަން ހޯދުމަށް އިންޝުއަރެންސް ސްކީމްތައް ތައާރަފުކުރުން ވެސް އެމްޑީޕީގެ މެނިފެސްޓޯގައި ވަނީ ހިމަނައިފަ އެވެ.
- ކާރިސާތަކުން ރައްކާތެރިކަން ހޯދުމަށް އިންޝުއަރެންސް ސްކީމެއް
- ސައިބާ ސެކިއުރިޓީ ވަރުގަދަ ކުރުން
- ތިމާވެށްޓާއި ރަހުމަތްތެރި ޓެކްނޮލޮޖީ ބޭނުންކޮށްގެން ރާއްޖޭގައި އުފައްދާ ތަކެތީގެ އުފެއްދުންތެރިކަން އިތުރުކުރުން. ކާޑުގެ ބާވަތްތައް ފަދަ އިމްޕޯޓަށް ބަރޯސާވާންޖެހޭ ތަކެތީގެ ރިޒާވުތައް ގާއިމުކުރުން
- އެތެރޭގެ މާލީ ނިޒާމު ހަރުދަނާ ކުރުން
- އަންއެމްޕްލޯއިމަންޓް އިންޝުއަރެންސް ސްކީމެއް ތައާރަފްކުރުން
- ކުދި އަދި މެދުފަންތީގެ ވިޔަފާރިތަކާއި ގެސްޓްހައުސް އަދި ސަފާރީތަކަށް ހާއްސަ ކަވާތަކެއް ތައާރަފް ކުރުން.
- ކަނޑުމަތީގެ ހާދިސާތަކަށް ހާއްސަ ގައުމީ ފުލް ކަވަރޭޖް މެރިން އިންޝުއަރަންސް ޕޮލިސީއެއް ތައާރަފްކުރާނެ.
މިރޭ މެނިފެސްޓޯ އާންމު ކުރިއިރު، ޑޮލަރަށް ބަރޯސާވެފައި އޮތް މިންވަރު ކުޑަ ކުރުމަށް ވެސް ރައީސް ވަނީ ވައުދުވެވަޑައިގެންފަ އެވެ. އަދި ޑޮލަރުން ލިބޭ އާމްދަނީ ރާއްޖޭގައި ހިފަހައްޓައި އެ ގައުމަކާ، އެ ގައުމެއްގެ ފައިސާއިން މުއާމަލާތް ކުރަން ވެސް ރައީސް ވަނީ ވައުދުވެވަޑައިގަނެފަ އެވެ.
ރައީސް ސޯލިހުގެ އިތުރުން ރިޔާސީ އިންތިހާބުގައި ވާދަ ކުރައްވަނީ ޖުމްހޫރީ ޕާޓީގެ ގާސިމް އިބްރާހިމާއި ދަ ޑިމޮކްރެޓްސްގެ އިލްޔާސް ލަބީބާއި ޕީޕީއެމް/ޕީއެންސީގެ ޑރ. މުހައްމަދު މުއިއްޒާއި އެމްއެންޕީގެ މުހައްމަދު ނާޒިމެވެ. އޭގެ އިތުރުން ކުރީގެ ހޯމް މިނިސްޓަރު އުމަރު ނަސީރާއި ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން ފާރިސް މައުމޫނާއި ކުރީގެ ޑެޕިއުޓީ މިނިސްޓަރު ހަސަން ޒަމީލު ވެސް ރިޔާސީ ރޭހުގައި އަމިއްލަ ގޮތުން ވާދަ ކުރައްވަ އެވެ.
