އަންނަ ރިޔާސީ ދައުރުގައި ފިޝަރީޒް އެންޑް އެގްރިކަލްޗާ މިނިސްޓްރީއެއްގެ ބަދަލުގައި, ދަނޑުވެރިކަމާއި މަސްވެރިކަމަށް ވަކި ދެ މިނިސްޓްރީއެއް ހެދުމަށް މިރޭ ތައާރަފު ކުރި އެމްޑީޕީގެ އިގުތިސާދީ މެނިފެސްޓޯގައި ހިމަނައިފި އެވެ.
އެމްޑީޕީގެ މެނިފެސްޓޯގެ އިގުތިސޯދީ ސިޔާސަތުތައް ލޯންޗުކުރީ، އެކަމަށްޓަކައި ސޯޝަލް ސެންޓަރުގައި ބޭއްވި ހާއްސަ އިވެންޓެއްގަ އެވެ.
އެމްޑީޕީގެ އިގުތިސާދީ ސިޔާސަތުތައް ހިމެނޭ 'އިގުތިސޯދީ ބޮޑު ބަދަލު'ގެ ވައުދު ވަނީ ހަތަރު ބަޔަކަށް ބަހާލާފަ އެވެ. އެއީ:
- ބާރުވެރި އިގުތިސާދު
- އިގުތިސާދީ ހަރަކާތްތަކުގައި އެންމެން ބައިވެރިވުން
- އެކާވީސް ވަނަ ގަރުނަށް މާލީ ދާއިރާ
- ވިލުންތެރި އިގުތިސާދު
މަސްވެރިކަމުގެ ނަފާ އިތުރުކުރުން
މަސްވެރިކަމުގެ ދާއިރާއަށް އެމްޑީޕީން ހުށަހަޅާ ކަންކަމުގެ ތެރޭގައި ސްކޫލު ދައުރުން ފެށިގެން މަސްވެރިކަމަށް ކުދިން އަހުލުވެރި ކުރަން ފެށުމާއި މަސްވެރިންނަށް ދިމާޥާ ހާދިސާތަކުން ލިބޭ ގެއްލުންތަކުންނާއި ސިއްހީ ގޮތުން ދިމާވެދާނެ ކަންކަމުން އަރައިގަންނަން އެހީވެދޭނެ ހާއްސަ އިންޝުއަރެންސެއް ތައާރަފުކުރުން ހިމެނެ އެވެ.
އޭގެ އިތުރުން މަސްވެރިކަމުގެ ވިޔަފާރި ކުރިއެރުވުމަށާއި މަސް ދޯނި ފަހަރު ތަރައްގީކުރުމަށް ފަސޭހައިން ފައިސާ ހަމަޖެހޭނެ ގޮތްތަކަށް ތައާރަފުކުރަން ވެސް އެ ޕާޓީގެ މެނިފެސްޓޯގައި ވެ އެވެ. އޭގެ ތެރޭގައި ދިވެހި މަސްއޮޑި ފަހަރު ޒާމާނީ ފެންވަރަށް ގެންނަން ފަރުމާކޮށްފައިވާ ފިފްތު-ޖެނެރޭޝަން މަސް ދޯނި ފަހަރު ބަނުމަށް ލޯން ސްކީމް ތައާރަފްކުރުން ހިމެނެ އެވެ.
އެމްޑީޕީން މަސްވެރިކަމުގެ ދާއިރާއަށް ހުށަހަޅާފައިވާ އިތުރު ކަންކަމުގެ ތެރޭގައި ހިމެނެނީ:
- ކަސްޓަމްސް އިން ލިބޭ އާމްދަނީގެ އިންސައްތައެއް މަސްވެރިކަން މާކެޓް ކުރުމަށްޓަކައި ބޭނުންކުރުން
- މަސްވެރިކަން "އެޑްވެންޗަރ ސްޕޯޓް" އެއްގެ ގޮތުގައި ޕްރޮމޯޓްކުރުން
- ދިވެހި މަސްވެރިކަމުގެ ދެމެހެއްޓެނިވިކަން ރަމްޒުކޮށްދޭ ލޭބަލެއް ހަދާ، ބޭރުގެ ސަޕްލަޔަރުން ބަލައިގަންނަ ބްރޭންޑިންއެއް ތައާރަފްކުރުން
- މެރިކަލްޗާ އަދި އެކުއަކަލްޗާއަށް ޕްރައިވެޓް ސެކްޓާ އިންވެސްޓްކުރުމުގެ އައު ފުރުސަތުތައް ހުޅުވައިދިނުން
ފާހަގަކޮށްލަން ޖެހޭ ގޮތުގައި މި މެނިފެސްޓޯގައި ޔޫރަޕާއި އިނގިރޭސިވިލާތަށް ރާއްޖެއިން ބޭރުކުރާ މަހުން ނަގާ ޑިއުޓީ ކަނޑާލުން ވެސް ހިމަނާފައި ވެ އެވެ. މިއީ މި ދައުރުގެ ތެރޭގައި ކުރަން މަސައްކަތް ކުރަމުން އައިސް، އެކި ތާރީހުތައް ދިން ނަމަވެސް މިހާތަނަށް ނުވެފައި އޮތް ކަމެކެވެ.
ސިނާއީ ދަނޑުވެރިކަމުގެ މަންފާ
ދަނޑުވެރިކަމުގެ ދާއިރާއަށް އެމްޑީޕީން ހުށަހަޅާފައިވާ ކަންކަމުގެ ތެރޭގައި އީޖާދީ ޓެކްނޮލޮޖީތައް ބޭނުންކުރުމަށާއި ވާޓިކަލް އަދި ހައި-ޑެންސިޓީ ފާމިން ފަދަ ދަނޑުވެރިކަން ފުޅާކުރުމަށް ފަންނީ އަދި މާލީ އެހީތެރިކަން ހަމަޖައްސައިދިނުމާއި ކުދި ދަނޑުވެރިންނަށް ބޭނުންވާ މައިކްރޯފައިނޭންސިން ތައާރަފުކުރުމާއި ބިން ހޯދައިދިނުން ހިމެނެ އެވެ.
އިތުރު ކަމެއްގެ ގޮތުގައި އެގްރޯނެޓް މެދުވެރިކޮށް ދަނޑުވެރިކަމުގެ ވަސީލަތްތަކާ އެކު އެކަމަށް ހާއްސަ ރަށްތައް ތަރައްގީކޮށް، ދަނޑުވެރިންނަށް ހުުޅުވާލުމަށް ވެސް މެނިފެސްޓޯގައި ވަނީ ހުށަހަޅާފަ އެވެ. އަދި ދަނޑުވެރިންގެ އުފެއްދުންތައް ހިސާބުކޮށް މޭވާ އާއި ތަރުކާރި އެތެރެކުރުން މަދުކުރަން، 'އިމްޕޯޓް ސަބްސްސިޓިޓިއުޝަން'ގައި ބައިވެރިވާ ދަނޑުވެރިންނަށް ލުއިތަކެއް ދޭން ވެސް އެ ޕާޓީން ވަނީ ހުށަހަޅާފަ އެވެ.
މިގޮތަށް ލުއިދޭ ބާވަތްތަކުގެ އުފެއްދުންތެރިކަން އިތުރުވާ މިންވަރަށް ބަލައި، އިމްޕޯޓް ސަބްސްޓިޓިއުޝަންއަށް ކަނޑައަޅާ ބާވަތްތަކުން ޑިއުޓީ ބޮޑުކުރަން ވަނީ ވައުދުވެފަ އެވެ.
އެމްޑީޕީން ދަނޑުވެރިކަމުގެ ދާއިރާއަށް ހުށަހަޅާފައިވާ އިތުރު ކަންކަމުގެ ތެރޭގައި ހިމެނެނީ:
- އެކްސްޕޯޓް އޮރިއެންޓެޑް ވެލިއު ޗެއިންއެއް ގާއިމުކޮށް، ދިވެހި ދަނޑުވެރިންނަށް ދިވެހި މާކެޓާއި، ރިސޯޓުތަކާ، ބައިނަލްއަގްވާމީ މާކެޓްތަކާއި ގުޅުވައިދިނުން
- ދަނޑުވެރިކަމުގެ ދާއިރާއަށް ޒުވާން ޖީލެއް ވެއްދުމުގެ ގޮތުން "އެގްރިޕްރިނިއާސް" އުފެއްދުމުގެ ޕްރޮގްރާމެއް ތައާރަފްކުރުން
- ދަނޑުވެރިންނަށް މޫސުމީ ބަދަލުތަކާއި ގުޅިގެން ލިބޭ ގެއްލުންތަކުން ރައްކާތެރިކަން ފޯރުކޮށްދިނުމުގެ ގޮތުން "ގައުމީ ދަނޑުގޮވާން އިންޝުއަރެންސް ސްކީމް" ތައާރަފް ކުރުން
އެމްޑީޕީން ވަނީ މި ދެ ދާއިރާގެ އިތުރުން ފަތުރުވެރިކަމުގެ ދާއިރާގައި ދިވެހި ވިޔަފާރިވެރިންގެ ހިއްސާ އިތުރުކުރުމަށް ފަންޑެއް ގާއިމްކުރުން ފަދަ ކަންކަމުން ފެށިގެން ދިވެހި ވިޔަފާރިތަށް ބޭރު ގައުމުތަކަށް ފުޅާވާން އެކްސްޕޯޓު އިމްޕޯޓު (އެގްޒިމް) ފައިނޭންސިން ފަދަ ބޮޑެތި ވައުދުތައް ވެސް މެނިފެސްޓޯގައި ހިމަނާފަ އެވެ.
