ދިވެހިރާއްޖޭގެ އިގްތިސާދު އެމެރިކާގެ ޑޮލަރަށް ބަރޯސާވެފައި އޮތުން ނައްތާލުމަށާއި އެހެން ގައުމުތަކާ އެކީ އެ ގައުމެއްގެ ފައިސާއިން މުއާމަލާތް ކުރަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ މެނިފެސްޓޯގައި ހިމަނަފައިފި އެވެ.
ޑޮލަރަށް ބަރޯސާވުން ކުޑަކުރަން ރައީސް ވައުދުވެވަޑައިގަތީ އިގްތިސާދީ އަދި ވިޔަފާރީގެ ގޮތުން ގުޅިގެން މަސައްކަތް ކުރަން އަވައްޓެރި އިންޑިއާ ހިމެނޭ ގޮތަށް ބައެއް ގައުމުތަކުން ބައިނަލްއަގްވާމީ ޖަމިއްޔާއެއް އެކުލަވާލަން މަސައްކަތް ކުރަމުންދާ ދަނޑިވަޅެއްގަ އެވެ.
އެ ޖަމިއްޔާގެ އެންްމެ މުހިންމު އެއް ބޭނުމަކީ ޑޮލަރަށް ބަރޯސާވުން ނައްތާލުމާއި އެ ގައުމެއްގެ ފައިސާއިން އެ ގައުމަކާ މުއާމަލާތް ކުރުމެވެ.
އޭގެ އިތުރުން، މިރޭ އާންމު ކުރި ރައީސް ސޯލިހުގެ މެނިފެސްޓޯގެ އިގްތިސާދީ ބައިގައި ފަތުރުވެރިކަމުން ރާއްޖެއަށް ވަންނަ ފައިސާ ބޭރަށް ދިޔުން ހުއްޓުވަން ފިޔަވަޅު އެޅުމަށް ވެސް ވަނީ ވައުދުވެފަ އެވެ.
- ދައުލަތުން ދޭ ސަބްސިޑީތައް އެފިޝަންޓްކޮށް، ހައްގުވެރި ފަރާތްތަކަށް ދެވޭ އެހީއެއްކަން ކަށަވަރުކުރެވޭގޮތަށް ސަބްސިޑީގެ ނިޒާމު ބަދަލުކުރާނެ.
- އާސަންދައިގެ ހަރަފު އެފިޝިއެންޓްކޮށް ހާއްސަ އެއާ އެމްބިއުލާންސެއް ހަމަޖެއްސުން
- ދުނިޔޭގެ މާކެޓްތަކަށް އަންނަ ޝޮކްތަކުގެ ސަބަބުން ދިމާވާ އިގުތިސާދީ ހީނަރުކަމުން ސަލާމާތްވާން މާލީ އަދި އިގުތިސާދީ ސިޔާސަތުތަކަށް ބަދަލުގެނެސް ސޭފްޓީ ނެޓެއް ގާއިމުކުރުން
- ދައުލަތުގެ އާމްދަނީ އިތުރުކޮށް ހަރަދު ކުޑަ ކުރުމުގެ ސިޔާސަތުތައް ތަންފީޒުކޮށް ޖީޑީޕީގެ ނިސްބަތުން ދަރަނީގެ މިންވަރު ކުޑަކުރުން. އަދި ބަޖެޓް ޑެފިސިޓް ކުޑަކޮށް ދައުރު ނިމެންވާއިރަށް ޖީޑީޕީގެ ނިސްބަތުން ދަރަނީގެ މިންވަރު 80 ޕަސެންޓަށް ކުޑަ ކުރުން
- ބޭރު ފައިސާ ހޯދުމަށް އޮތް ތަކުލީފުތަކަށް ލުޔެއް ހޯދައިދިނުމުގެ ގޮތުން ފަތުރުވެރިކަމުގެ ދާއިރާއިން ރާއްޖެއަށް ވަންނަ ބޭރު ފައިސާ ރާއްޖެއިން ބޭރަށް ލީކުވާ މިންވަރު މަދުކުރުން. މީގެ އިތުރުން، ރާއްޖޭގެ އިގުތިސާދު ޑީޑޮލަރައިޒްކޮށް، ވިޔަފާރީގެގޮތުން ގުޅިފައިވާ ގައުމުތަކާ އެކީ ކުރާ ވިޔަފާރީގެ މުއާމަލާތްތައް އެގައުމެއްގެ ފައިސާއިން ކުރާގޮތަށް ހަމަޖައްސާނެ.
- ދެމެހެއްޓެނިވި ގޮތެއްގައި ދައުލަތުގެ ހަރަދުތައް ހިފަހައްޓާ އެކްސްޗޭން ރޭޓް ޕްރެޝަރު ކުޑަކުރުމުގެ ގޮތުން، ރިނުވަބަލް އެނާޖީ، ޑިޖިޓަލް އިންފްރާސްޓްރަކްޗަ، ސްޕެޝަލައިޒް ހެލްތްކެއަ، އަދި އެގްރިކަލްޗަ ފަދަ ދާއިރާތަކަށް އިންވެސްޓްކުރާނެ.
- ދައުލަތުގެ ދަރަނީގެ ސްޓޮކްގެ ރިސްކް ކުޑަކުރުމުގެ ގޮތުން އެވްރެޖް މެޗުރިޓީ މިހާރަށް ވުރެ އިތުރުކޮށް، ހެޔޮ އަގުގައި ދައުލަތުގެ ދަރަނި ފައިނޭންސްކުރާނެ.
އެމްޑީޕީގެ އިގްތިސާދީ ވައުދުތައް މިރޭ ހާމަ ކުރުމުން އެ ޕާޓީގެ މެނިފެސްޓޯ އެއްކޮށް އިއުލާނު ކުރެވުނީ އެވެ. އެމްޑީޕީގެ މެނިފެސްޓޯގައި އިގްތިސާދީ ބައި ހިމެނޭ ގޮތަށް ފަސް ބައި ހިމެނެ އެވެ. އެއީ އުފާވެރި ދިރިއުޅުން، އާ ޒުވާން ޖީލު، އަމާން މުޖުތަމައު، ހެޔޮވެރިކަން އަދި އިގްތިސާދީ ބޮޑު ބަދަލެވެ.
ރައީސް ސޯލިހުގެ އިތުރުން ރިޔާސީ އިންތިހާބުގައި ވާދަ ކުރައްވަނީ ޖުމްހޫރީ ޕާޓީގެ ގާސިމް އިބްރާހިމާއި ދަ ޑިމޮކްރެޓްސްގެ އިލްޔާސް ލަބީބާއި ޕީޕީއެމް/ޕީއެންސީގެ ޑރ. މުހައްމަދު މުއިއްޒާއި އެމްއެންޕީގެ މުހައްމަދު ނާޒިމެވެ. އޭގެ އިތުރުން ކުރީގެ ހޯމް މިނިސްޓަރު އުމަރު ނަސީރާއި ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން ފާރިސް މައުމޫނާއި ކުރީގެ ޑެޕިއުޓީ މިނިސްޓަރު ހަސަން ޒަމީލު ވެސް ރިޔާސީ ރޭހުގައި އަމިއްލަ ގޮތުން ވާދަ ކުރައްވަ އެވެ.
