ސިޔާސީ ވެރިން ރަށްރަށަށް ކުރައްވާ ދަތުރުތަކުގައި އެ ރަށްރަށުން ފުރައްސާރަ އާއި ގޯނާ ކުރިމަތިވުމަކީ އާއްމު ކަމެކެވެ. އެހެން ނަމަވެސް އާއްމު އުސޫލަކީ އެ ބޭފުޅުން ފާޅުގައި އެ ރައްޔިތުންނާ ދިމާލަށް ނުރުހުމުގެ ބަހެއް ވިދާޅުނުވެ، އެކަމުގެ ޒިންމާ ވާދަވެރި ސިޔާސީ ލީޑަރުންގެ އިސްތަށިފުޅުގައި އެޅުވުމެވެ.
މިފަހަރުގެ ރިޔާސީ އިންތިހާބަށް ކުރާ ކެމްޕެއިނުގައި މި އުސޫލާ ހިލާފަށް އަމަލުކުރައްވާތަން މި ފެންނަނީ ޖުމްހޫރީ ޕާޓީ (ޖޭޕީ) ގެ ލީޑަރު ގާސިމް އިބްރާހީމެވެ. ސެޕްޓެމްބަރު 9 ގައި ބާއްވާ ރިޔާސީ އިންތިހާބަށް ކެމްޕެއިންކުރަން އުތުރުގެ ރަށްތަކަށް ޖޭޕީން ކުރާ ދަތުރުގައި ދެތިން ފަހަރަކު ގާސިމް ރައްދު ދެއްވީ ސިދާ އާއްމުންނަށެވެ.
ގާސިމް އާއްމުންނަށް އެންމެ ފަހުން ރައްދެއް ދެއްވީ ށ. ކަނޑިތީމުގައި އިއްޔެ ބޭއްވި ޖަލްސާގަ އެވެ. އެ ޖަލްސާގައި އޭނާ ވިދާޅުވީ ދައްކަވާ ވާހަކަ އަޑު އަހަން "އެކަކު ނަޔަސް ވަރިހަމަ" ކަމަށެވެ. ބެލެވޭ ގޮތުގައި އެއީ ޖޭޕީގެ ޖަލްސާއަަށް އައި މީހުންގެ އަދަދު މަދުވުމުން ދެއްކެވި ވާހަކަ އެކެވެ.
"އަޅުގަނޑުމެންގެ ޒިންމާ އަދާކުރުމަށް އަޅުގަނޑު ނުކުމެ މިހިރީ. އަޅުގަނޑަށް ވަރިހަމަ މިތަނަށް އެކަކު އަޔަސް ނަޔަސް. އަޅުގަނޑަށް ވަރިހަމަ އެކަކު އަޔަސް ނަޔަސް،" އަޑަށް ބާރުލައްވައި ގާސިމް ވިދާޅުވި އެވެ.
އޭނާ ވިދާޅުވި ގޮތުގައި ވާހަކަ ދައްކަވަން އޭރު ހުންނެވި ތަނަށް މީހުން އަޔަސް ނަޔަސް، "ގައުމުގެ ރައްޔިތުންނަށް އެ އަޑު އިވޭނެ" އެވެ.
"އަޅުގަނޑު މި އިއްވަނީ. އަޅުގަނޑު އިއްވައިފިން. ﷲ ހެކިވެ ވޮޑިގަންނަވާށި" ގާސިމް ވިދާޅުވި އެވެ.
ސްޕެޝަލް އެޑްވައިޒަރު އަހުމަދު ނިހާން ހުސައިން މަނިކަށް ކުޑައިމީސްވާ ގޮތަށް އާއްމުންގެ މީހަކު ދެއްކެވި ވާހަކަ އަކަށް ވެސް އޭނާ ކުރިން ވަނީ ވަރަށް ހޫނުކޮށް ރައްދު ދެއްވައިފަ އެވެ. މުޅި އެ މުއާމަލާތް ނުފެންނާތީ ކަން ހިނގި ގޮތް ސީދާ ނޭނގުނަސް ގާސިމް ރައްދު ދެއްވީ ޕީޕީއެމްގެ ހަރަކާތްތެރިއަކަށް ކަން އޭނާގެ ވާހަކަ އިން އެނގެ އެވެ.
"ނިހާނާ ދިމާލަށް އެއްޗިހި ވިދާޅުވިއިރު އެ ބޭފުޅާ އަށް އެނގޭތޯ އެ ވެރިކަން ގެނެސްދިނީ ކާކު ކަން. ބަލަ މިގާސިމޭ ގެނެސްދިނީ. އެހެން ނޫން ނަމަ ޕީޕީއެމް ނުދެކޭނެ ދިވެހި ސަރުކާރެއް،" ހދ. ނޮޅިވަރަމްގައި ގާސިމް ވިދާޅުވި އެވެ.
ޕީޕީއެމްގެ ސަރުކާރު ގެންނަން ހަރަދު ކުރެއްވީ ކިތަން މިލިޔަން ރުފިޔާކަން އެނގޭތޯ ގާސިމް ސުވާލުކުރެއްވި އެވެ.
"ކިތައް ކަންތައްތޯ ކޮށްދިނީ. ކިތައް ހާސް ވޯޓުތޯ ހޯދައިދިނީ،" ގާސިމް ވިދާޅުވި އެވެ.
އޭނާ ވިދާޅުވީ ނިހާނާ ދިމާލަށް އެއްޗެއް ބުނި މީހާ އެކުރީ ވަރަށް ހުތުރު ކަމެކެވެ. ސިޔާސީ ދާއިރާގައި މަސައްކަތް ކުރަންވާނީ އެފަދަ މީހުން ނޫން ކަމަށް ވެސް އޭނާ ވިދާޅުވި އެވެ.
މި ފަހަރުގެ ރިޔާސީ އިންތިހާބުގައި ވާދަ ކުރައްވަނީ އަށް ކެންޑިޑޭޓުންނެވެ. އެމްޑީޕީން، މިހާރުގެ ރައީސް އިބްރާހިމް މުހައްމަދު ސޯލިހު ވާދަ ކުރައްވާއިތު، ޕީއެންސީން ވާދަ ކުރައްވަނީ މާލޭ ސިޓީގެ މޭޔަރު މުހައްމަދު މުއިއްޒެވެ. އަދި ޖުމްހޫރީ ޕާޓީން ގާސިމް އިބްރާހިމް، އެމްއެންޕީން މުހައްމަދު ނާޒިމް، ދަ ޑިމޮކްރެޓްސްއިން އިލްޔާސް ލަބީބު ވާދަ ކުރައްވަ އެވެ. އަމިއްލަ ގޮތުން އިންތިހާބުގައި ވާދަ ކުރައްވަނީ ފާރިސް މައުމޫން، އުމަރު ނަސީރު، އަދި ހަސަން ޒަމީލެވެ.
ކުރީގެ ރިޔާސީ އިންތިހާބުގައި ވެސް މިފަދަ ކަންކަން، ބައެއް ކެންޑިޑޭޓުންގެ ފަރާތުން ފެނި، އަދި އެ ވީޑިއޯތައް ވެސް އާންމުވެފައިވެ އެވެ.
