ރައީސް އިބްރާހިމް މުހައްމަދު ސޯލިހު ދެވަނަ ދައުރެއް ހޯއްދަވަން ނުކުމެ ހުންނެވީ އިންޑިއާއިން އެމަނިކުފާނު ނުކުންނަވަން މަޖުބޫރުކޮށްގެން ކަމަށް، މި ސަރުކާރުގެ ކޯލިޝަން ޕާޓްނަރަކަށް ތިބެ ވަކިން ރިޔާސީ އިންތިހާބުގައި ވާދަކުރައްވާ ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެ އެވެ.
ސެޕްޓެމްބަރު 9، ގައި އޮންނަ ރިޔާސީ އިންތިހާބަށް އެންމެ 20 ދުވަސް ވެފައިވަނިކޮށް ރަށްރަށަށް ވަޑައިގެން ކެމްޕެއިން ކުރައްވަން ފެއްޓެވި ގާސިމް ގެންދަވަނީ ކޮންމެ ރަށަކު ވެސް މިދިޔަ 10 އަހަރު ވެރިކަން ހިނގި ގޮތަށް ވަރަށް ބޮޑަށް ފާޑުވިދާޅުވަމުންނެވެ.
މިއަދު މެންދުރުފަހު ށ. އަތޮޅު ގޮއިދުއަށް ވަޑައިގެން، ޖޭޕީގެ ރިޔާސީ ކެންޑިޑޭޓު ގާސިމް ވިދާޅުވީ މީގެ ކޮންމެ ފަހަރަކު ވެސް ސަރުކާރެއް އުފެދެނީ އޭނާގެ ތާއީދު އޮވެގެން ކަމަށް ވިޔަސް އަނެއްކާ ވެސް ރިޔާސީ އިންތިހާބަށް ނުކުންނެވީ އެއިން ކޮންމެ ފަހަރަކު ވެސް ހިތި ތަޖުރިބާތަކެއް ކުރެއްވުމުން ކަމަށެވެ.
ރައީސް ސޯލިހުގެ ސަރުކާރަށް ގާސިމް ވަރަށް ބޮޑަށް ފާޑުވިދާޅުވި އެވެ. އޭނާ ވިދާޅުވީ މި ސަރުކާރުން އިންޑިއާ އާއެކު ބާއްވާ ގުޅުމުގެ ސަބަބުން ރާއްޖޭގެ މިނިވަން ކަމަށް އަސަރުކުރާ ވަރަށް އެ ގައުމުގެ ނުފޫޒު ގަދަވެފައިވާ ކަމަށެވެ.
އިންޑިއާގެ ރުހުން ނެތި މިއަދު ދިވެހި ސަރުކާރަށް އެއްވެސް ކަމެއް ނުކުރެވޭ ކަމަށް ގާސިމް ތުހުމަތު ކުރެއްވި އެވެ. އިންޑިއާއިން ދޭ ކޮންމެ ލޯނެއް ވެސް ބަލައިގަންނަން ވެސް މަޖުބޫރުކޮށްފައިވާ ކަމަށާއި، ދެވަނަ ދައުރަކަށް ވެސް ނުކުންނެވީ އެ ގައުމުން އެ ކަމަށް މަޖުބޫރު ކޮށްގެން ކަމަށް ވިދާޅުވި އެވެ.
"އިބްރާހިމް މުހައްމަދު ސޯލިހަކީ ވަރަށް ކެތްތެރި، މަޑުމައިތިރި، ވަރަށް ކޫލް ބޭފުޅެއް، މިނިވަންކަން ގެއްލުމުގެ އިލްތިޒާމެއް އެމަނިކުފާނު ބޮލުގައި އެޅުވޭ ގޮތަށް ކޮށްފައި ދެވަނަ ދައުރެއް ހޯއްދަވަން ނުކުންނަވަންވީ ސަބަބެއް ނެތް، މަޖުބޫރު ކަމެއް ނެތިއްޔާ، ކޮން ބަޔެއްގެ މަޖުބޫރު ކަމެއްތޯ، އެބަ ފެނޭ ނޫންތޯ،" ވަކި ގައުމެއްގެ ނަން ވިދާޅުނުވެ، އިންޑިއާއަށް އިޝާާރާތް ކުރައްވައި ގާސިމް ވިދާޅުވި އެވެ.
ހދ. ހަނިމާދޫއަށް އިއްޔެ ވަޑައިގަތް އިރު ވެސް ދިވެހި ސިފައިންގެ އިތުރުން ބޭރު އެހެން ގައުމެއްގެ ސިފައިން ވެސް ދެކުނިން ކަމަށް ގާސިމް ވިދާޅުވި އެވެ. އެ ގައުމުން ރައީސް ސޯލިހު އަދިވެސް އިތުރު ފަސް އަހަރު ބަހައްޓަވަން ބޭނުންވާ ކަމަށް އޭނާ ވިދާޅުވި އެވެ.
"އަޅުގަނޑަށް އެނގޭ އެއްޗަކީ [އިންޑިއާއިން] ޑޮނޭޝަން ނުދޭނެ، ލޯނު އެއީ، އެ އަނބުރާ ދައްކާނެ ގޮތެއް ނޭނގުނަސް އިމެއް މިނެއް ނެތި އެ ނަގަނީ މަޖުބޫރު ކަމެއް އޮވެގެން،" ރައްޔިތުންގެ މަޖިލީހުގެ މާމިގިލި ދާއިރާގެ މެންބަރުކަން ވެސް ކުރައްވާ ގާސިމް ވިދާޅުވި އެވެ.
ރާއްޖޭގެ މިނިވަންކަމަށް އަސަރު ކުރާ ވަރުގެ ކަންކަން ހިނގުމުން ކުރީގެ ރައީސް އަބްދުﷲ ޔާމީނަށް ވުރެ މި ސަރުކާރުގެ ކަންކަން ގޯސްވެގެން ގޮސްފައިވާ ކަމަށް ގާސިމް ވިދާޅުވި އެވެ. އެހެންކަމުން ރައީސް ސޯލިހަށް ދެވަނަ ދައުރެއް ދޭންވީ ސަބަބެއް ނެތް ކަމަށް އޭނާ ވިދާޅުވި އެވެ.
"ދިވެހި ގައުމުގެ މިނިވަންކަން ބާއްވަން ޖެހޭ، އެއް ގޮތަކަށް ވެސް، މިހާރު ހުރި ރައީސަށް ވޯޓު ލައިފިއްޔާ، އޭނާ ހޮވައިފިއްޔާ، މިނިވަންކަމެއް ނޯންނާނެ، އަޅުގަނޑު ޔަގީންކަމާ އެކު މި ދަންނަވަނީ،" ވިލާ ވިޔަފާރީގެ ވެރިޔާ ގާސިމް ވިދާޅުވި އެވެ.
ކުރީގެ ރައީސް އަބްދުﷲ ޔާމީނުގެ ވެރިކަމުގައި އިންޑިއާއާ ގުޅުން ގޯސްވެ ޗައިނާއާ ގުޅުން ބަދަހިކުރި އެވެ. ރައީސް ސޯލިހު ވެރިކަމަށް ހަވާލުވެވަޑައިގަތް ފަހުން އަނެއްކާ ވެސް ޚާރިޖީ ސިޔާސަތު ބައްޓަންކުރީ އިންޑިއާއަށް އިސްކަންދޭ ގޮތަށެވެ.
މި ސަރުކާރުން ހިންގާ އުމްރާނީ ތަރައްގީގެ ބޮޑު ގިނަ މަޝްރޫއުތަކަކީ އިންޑިއާގެ ލޯނުތައް މެދުވެރިކޮށް ފަންޑުކޮށްފައިވާ މަޝްރޫއުތަކެވެ. އަދި އިންޑިއާއިން ގިނަ އަސްކަރީ އެހީތައް ވެސް މި ސަރުކާރުން ދަނީ ހޯދަމުންނެވެ. ސަރުކާރުން ބުނާ ގޮތުގައި، އެ ސިޔާސަތުގެ ބޭނުމަކީ ޓެރަރިޒަމާއި މަސްތުވާތަކެތި ޓްރެފިކް ކުރުމާ ދެކޮޅު ބޮޑެތި އޮޕަރޭޝަންތަކަށް ރާއްޖޭގެ އަސްކަރީ ގާބިލްކަން އިތުރުކުރުމެވެ.
