އޭއެފްސީ ކަޕްގެ ޕްލިމިނަރީ ބުރުގައި ބަންގްލަދޭޝްގެ ޑާކާ އަބަހާނީ އަތުން 2-1 އިން ބަލިވެ، ރާއްޖޭގެ ކްލަބް އީގަލްސް އަށް މުބާރާތުގެ ގްރޫޕް ސްޓޭޖުން ފުރުސަތު ނުލިބި ކަޓައިފި އެވެ.
ސިލްހެޓްގައި މިއަދު މެންދުރު ފަހު ކުޅުނު މެޗުގައި އަބަހާނީން ވަނީ އެ ޓީމުގައި ހިމެނޭ ބިދޭސީ ހަ ކުޅުންތެރިން ކުޅެން އަރުވައިފަ އެވެ. ވިއްސާރަ ވުމުގެ ސަބަބުން ޗަކަ ހެދިފައި ދަނޑުގައި އޮތުމާ އެކު، ދެ ޓީމަށް ވެސް ވަނީ ކުޅެން އުނދަގޫވެފަ އެވެ.
އަބަހާނީ އަށް މެޗުގެ 21 ވަނަ މިނިޓްގައި ލީޑުނަގައިދިނީ ރާއްޖޭގެ ޓީސީ ސްޕޯޓްސް ކްލަބާއި މާޒިޔާ ސްޕޯޓްސް އެންޑް ރެކްރިއޭޝަނަށް ކުޅެފައިވާ ސެއިން ވިންސެންޓްގެ ފޯވާޑް، ކޮނޭލިއަސް ސްޓެވާޓް (ކޯނޭ) އެވެ. ކޯނޭ މި ގޯލު ޖެހީ އޭރިއާތެރެއަށް އައި ބޯޅައަކުން ބޮލުން ގޯލުގެ ތެރެއަށް ފޮނުވާލައިގެންނެވެ. ކޯނޭ އަކީ މި ވަގުތު ލޯން އެއްބަސްވުމެއްގެ ދަށުން އަބަހާނީ އަށް ކުޅެމުން އަންނަ ކުޅުންތެރިއެކެވެ.
ނަތީޖާ ހަމަހަމަކުރަން އީގަލްސް އިން ކުރި މަސައްކަތް ކާމިޔާބުވީ މެޗުގެ 63 ވަނަ މިނިޓްގަ އެވެ. އީގަލްސްގެ ބިދޭސީ ކުޅުންތެރިޔާ، ޕެޓްރޮވިޗް ހިލޭ ޖެހުމަކުން ނަގައިދިން ބޯޅައަށް އޭރިއާތެރެއަށް ހުސްކޮށް އަރައި، އީގަލްސްގެ ކެޕްޓަން، އަހުމަދު ރިޒުވާން (ރިޒޭ) ވަނީ މަތީ ދާގަނޑަށް ބޯޅަ އަމާޒުކޮށްލައިފަ އެވެ.
މެޗު ނިމެން އެއް މިނިޓަށް ވެފައި ވަނިކޮށް އަބަހާނީ މި މެޗުން މޮޅުކޮށްދިން ގޯލު ޖެހީ ބްރެޒިލްގެ ޑިފެންޑަރު، ޑަނީލޯ އޮގަސްޓޯ އެވެ. މިއީ އެ ޓީމުގެ އުޒްބެކިސްތާން މިޑްފީލްޑަރު، މުޒައްފަރޯވް ނެގި ކޯނަރަކުން އޮގަސްޓޯ ބޮލުން ޖެހި ގޯލެކެވެ.
އީގަލްސް އިން މި ވަނީ އޭއެފްސީ ކަޕްގެ ކޮލިފައިންގައި ކުޅުނު ދެ ފަހަރު ވެސް ގްރޫޕް ސްޓޭޖުގެ ޖާގަ ނުލިބި މުބާރާތާ ވަކިވާން ޖެހިފަ އެވެ. އެ ޓީމުން އެންމެ ފަހުން ކޮލިފައިންގައި ވާދަކުރި ފަަހަރު ޕްލޭއޮފްގައި ބަލިވީ ބެންގަލޫރު އަތުންނެވެ. އެ ގޮތުން، 2021 ގައި އީގަލްސް އިން ޓީމުން ޕްރިލިމިނަރީ ފުރަތަމަ ބުރުގައި މާލޭގައި ބޫޓާންގެ ތިމްޕޫ ސިޓީ އަތުން މޮޅުވި އެވެ. ޕްރިލިމިނަރީ ދެ ވަނަ ބުރުގައި އީގަލްސް އިން ކުޅެން ޖެހުނީ ބަންގްލަދޭޝްގެ އަބަހާނީއާ އެވެ. އެ ފަހަރު، އަބަހާނީ އަށް އެ ގައުމުގައި މެޗު ކުޅެވޭގޮތް ނުވެ، ދަތުރުކުރުމުގައި ވެސް ދަތިވެފައިވާތީވެ، އެ މެޗު އީގަލްސް އަށް ލިބި ޕްލޭއޮފަށް ދަތުރުކުރީ އެެވެ. ޕްލޭއޮފް ބުރުގައި 2021 ވަނަ އަހަރުގެ މެއި މަހު މާލޭގައި ކުޅެން އޮތް މެޗަށް އައިސް އިންޑިއާގެ ބެންގަލޫރުން ކޮވިޑް ޕްރޮޓޮކޯލާ ހިލާފުވުމުން، އޭއެފްސީން އެ ވަގުތު ވަނީ މެޗު ފަސްކޮށްފަ އެެވެ. ފަހުން އޮގަސްޓް މަހު އެ މެޗު އަލުން ކުޅުނުއިރު، އީގަލްސް ވަނީ ބެންގަލޫރު އަތުން ބަލިވެ ކަޓައިފަ އެވެ.
އީގަލްސް ބަލިކުރި އަބަހާނީ މި ފަހަރު ގްރޫޕް ސްޓޭޖުގެ ޖާގަ އަކަށް ވާދަކުރަން ޖެހޭނީ އިންޑިއާގެ މޯހަން ބަގާން އާއި ނޭޕާލުގެ މަޗިންދުރަ އެފްސީ ކުޅެގެން މޮޅުވާ ޓީމަކާ އެވެ.
