ސެޕްޓެމްބަރުގައި އޮންނަ ރިޔާސީ އިންތިހާބަށް މޯލްޑިވިއަން ޑިމޮކްރަޓިކް ޕާޓީގެ ރިޔާސީ ކެންޑިޑޭޓުގެ ހައިސިއްޔަތުން އެމަނިކުފާނު ހުށަހަޅުއްވާ ސިޔާސަތުތަކާ ހަމަހަމަ ކުރެވޭ ސިޔާސަތެއް ވާދަވެރިންނަށް ހުށަނޭޅޭނެ ކަމަށް ވިދާޅުވެ ބަހުގެ ހަމަލާތަކެއް ރައީސް އިބްރާހިމް މުހައްމަދު ސޯލިހު މިރޭ ދެއްވައިފި އެވެ.
ރައީސް ސޯލިހަށް ދެވަނަ ދައުރެއް ހޯދަން އެމްޑީޕީން އެކުލަވައިލި މެނިފެސްޓޯގައި ޒުވާނުންނަށް ހާއްސަކޮށްފައިވާ ބައި ލޯންޗު ކުރުމަށް ބޭއްވި ޖަލްސާގައި އެމަނިކުފާނު ވަނީ ވާދަވެރިންނަށް ފާޑުވިދާޅުވެފަ އެވެ.
"އަޅުގަނޑުގެ މި ސިޔާސަތުތަކާ ހަމަހަމަ ކުރެވޭނެ ސިޔާސަތެއް އަޅުގަނޑުމެންނަށް އެކީގައި މިއަދު ވާދަކުރަން އެ ތިއްބެވި އެއްވެސް ބޭފުޅަކަށް, އެއްވެސް ބޭފުޅަކަށް ހުށައެއްނޭޅުއްވޭނެ," ވަރަށް ޖޯޝުގައި މިރޭ ރައީސް ވިދާޅުވި އެވެ.
އެއަށްފަހު, އެ ޖަލްސާގައި ރައީސް ވަނީ ބައެއް ބޭފުޅުންގެ ނަންތައް ވިދާޅުވެ ނުވެ ބަހުގެ ހަމަލާތައް އަމާޒުކުރައްވާފަ އެވެ. އަދި, އެ ބޭފުޅުންގެ ވިސްނަވާ ގޮތް ރައްޔިތުންނަށް ވެސް އެނގޭނެ ކަމަށް ރައީސް ވިދާޅުވި އެވެ.
"އެއް ބޭފުޅަކު އެ ހުންނެވީ އައްޑަނަ އާއި ހަތިޔާރު ކަނޑި ބަޑި ހިއްޕަވައިގެން. އަނެއް ބޭފުޅަކީ ހެނދުނު ތެދުވާ ގޮތަށް އެއް ސިޔާސަތެއް ހާމަ ކުރުމަށް ފަހު މެންދުރު އަނެއް ގޮތަށް ބަދަލުވާ ބޭފުޅެއް. ރޭގަނޑު އެހެން ވާހަކައެއް ދައްކަވާނީ," މިއަށްފަހު ރައީސް ވަނީ ނުސީދާކޮށް އަމާޒު ކުރެއްވި ބަހުގެ ހަމަލާތަކުގެ ތަފްސީލަށް ވަޑައިނުގަންނަވާނެ ކަމަށް ވިދާޅުވެފަ އެވެ.
ވިސްނުން ބަދަލުވާ ކަމަށް ވިދާޅުވެ ރައީސް ބަހުގެ ހަމަލާ އަމާޒު ކުރެއްވި ކަމަށް ބެލެވެނީ އެމްޑީޕީން ވަކިވެ އުފެއްދި ދަ ޑިމޮކްރެޓްސްއަށެވެ.
ރިޔާސީ އިންތިހާބުގައި ވޯޓު ދެއްވާއިރު އެމްޑީޕީން ހުށަހަޅާ ސިޔާސަތުތަކާއި އެހެނިހެން ބޭފުޅުން ހުށަހަޅާ ސިޔާސަތުތަކާ އަޅާކިޔާލަން ޖެހޭނެ ކަމަށާއި އެއަށް ފަހު ގޮތެއް ނިންމެވުމަށް ރައީސް އެދިވަޑައިގެންނެވި އެވެ.
ވެލިދޫއަށް ރައީސްގެ ވައުދު
ޕިކްނިކް އައިލެންޑެއް ތަރައްގީކުރުން
ހައުސިން ޕްރޮޖެކްޓެއް ހިންގާނަން
ސްޕޯޓްސް ކޮމްޕްލެކްސްއެއް ގާއިމުކުރުން
ފުޓްބޯޅަ ދަނޑުގައި ލައިޓު ޖެހުން
ފުލުހުންގެ އާ އިމާރާތެއް ގާއިމުކުރުން
އާ އިންޖީނުގެއެއް އެޅުން
