ސެޕްޓެމްބަރު 9, ގައި އޮންނަ ރިޔާސީ އިންތިހާބު ކާމިޔާބުވެއްޖެ ހާލަތެއްގައި އުފައްދާ ޖުމްހޫރީ ޕާޓީ (ޖޭޕީ) ގެ ވެރިކަމެއްގައި ސިފައިންނާއި ފުލުހުން އަދި ފަނޑިޔާރުންނަށް ވެސް ހިލޭ ފްލެޓު ދިނުމަށް އެ ޕާޓީގެ ލީޑަރު އަދި ރިޔާސީ ކެންޑިޑޭޓު ގާސިމް އިބްރާހިމް ވައުދުވެވަޑައިގެންފި އެވެ.
އަސްކަރިއްޔާގެ އަދަދު އިތުރުވެ، މިހާރު ސިފައިންގެ އެކޮމޮޑޭޝަންއެއްގެ ގޮތުގައި ބޭނުންކުރަމުންދާ ބަންޑާރަކޮށީގައި ޖާގައިގެ ދަތިކަން ކުރިމަތިވެފައިވާ ކަމަށް އުފަން ރަށް، އދ. މާމިގިލީގައި ރޭ ބޭއްވި ރިޔާސީ ކެމްޕޭން ޖަލްސާގައި ވާހަކަ ދައްކަވަމުން ގާސިމް ވިދާޅުވި އެވެ.
ނަމަވެސް, އެކަން ހައްލުކޮށް ސިފައިންނާއި ފުލުހުންނަށް ވެސް ބޯހިޔާވަހިކަން ފޯރުކޮށްދިނުމުގައި ކުރީގެ ސަރުކާރުތަކުން އިހުމާލުވެފައިވާ ކަމަށް އޭނާ ވިދާޅުވި އެވެ.
"ސިފައިންނާ ފުލުހުންނަށް ފްލެޓް އާޅާ ވާހަކަ އަޑުއިވޭ. އެކަމަކު ހަވާލުކުރެވޭ ތަނެއް ނުފެނޭ ފަސް އަހަރުން ފަސް އަހަރުން ވެރިކަންތައް ނިމޭއިރުވެސް. އަޅުގަނޑުގެ ވެރިކަމެއްގައި ކޮންމެ ސިފައިންގެ ބޭފުޅަކަށްވެސް ކޮންމެ ތާކު ހުއްޓަސް ޒަމާނީ އެކޮމޮޑޭޝަން ފޯރުކޮށްދޭނަން. ފުލުހުންނަށްވެސް ހަމަ މިގޮތަށް އެއްވެސް ކުއްޔަކާއު ނުލާ އެކޮމޮޑޭޝަން ދޭނަން" ގާސިމް ވިދާޅުވި އެވެ.
ސިފައިންނާއި ފުލުހުންނަށް ހާއްސަކޮށްގެން ފްލެޓުތަކެއް އަޅާ ވާހަކަ ކުރީގެ ސަރުކާރުތަކުން ދައްކާ ކަމަށާއި ނަމަވެސް އެ ފްލެޓުތަކުގެ މަސައްކަތް ނިންމައި އެތަންތަން ހަވާލުކުރެވޭ ދުވަހެއް ނާންނަ ކަމަށް ގާސިމް ވިދާޅުވި އެވެ.
އޭނާ ހުށަހެޅުއްވީ ބަންޑާރަ ކޮށީގެ އެއްބައި ހުސްކުރުމަށް ފަހު އެތަން ބައިބަޔަށް ބަހާލައިގެން 15 ބުރީގެ އިމާރާތް ކުރުމަށެވެ. އަދި, ހިދުމަތުގައި ދެމިތިބިހާ ދުވަހަކަށް ކޮންމެ ސިފައިންގެ މީހަކާއި ފުލުހަކަށް ވެސް ބޯހިޔާވަހިކަން ލިބޭނެ ކަމަށާއި އެ ހިދުމަތް އަތޮޅުތެރޭގައި އުޅޭ ސިފައިންނާއި ފުލުހުންނަށްވެސް އެމީހުން ހިދުމަތުގައި ތިބި ސަރަހައްދުތަކުން ލިބޭނެ އިންތިޒާމުތައް ހަމަޖައްސައިދެއްވާނެ ކަމަށް ގާސިމް ވިދާޅުވި އެވެ.
ގާސިމް ވިދާޅުވީ ސިފައިންނާއި ފުލުހުންގެ އިތުރުން މަގާމުގައި ދެމިތިބޭހާ ދުވަހަކު ފަނޑިޔާރުންނަށް ވެސް މި ހިދުމަތް ދޭނެކަމުގެ ޔަގީންކަން ދެއްވާ ކަމަށެވެ.
ގާސިމް ވަނީ ޖުމްހޫރީ ޕާޓީގެ ވެރިކަމެއްގައި ހިޔާ ފްލެޓްތަކާއި ސިފައިންނާއި ފުލުހުންގެ ފްލެޓްތަކުގެ ކުލިވެސް މައާފު ކޮށްދެއްވާނެ ކަމަށް މީގެކުރިން ވެސް ވިދާޅުވެފަ އެވެ.
ގާސިމްގެ އިތުރުން ސެޕްޓެމްބަރު 9، ގެ ރިޔާސީ އިންތިހާބުގައި ވާދަ ކުރައްވަނީ ރައީސް އިބްރާހިމް މުހައްމަދު ސޯލިހާއި އިދިކޮޅު ކޯލިޝަންގެ ޑރ. މުހައްމަދު މުއިއްޒާއި ދަ ޑިމޮކްރެޓްސްގެ އިލްޔާސް ލަބީބާއި މޯލްޑިވްސް ނެޝަނަލް ޕާޓީގެ މުހައްމަދު ނާޒިމެވެ. އޭގެ އިތުރުން އުމަރު ނަސީރާއި ފާރިސް މައުމޫނާއި ހަސަން ޒަމީލް ވެސް ވާދަ ކުރައްވަ އެވެ.
