ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ވޯޓު ފޮށި ބަހައްޓާ އަދަދަށް މީހުން ނެތިގެން ވޯޓުފޮށި ނުބަހައްޓަން ނިންމި ތަންތަނަށް ރަޖިސްޓްރީ ކުރި މީހުން އެހެން ތަންތަނަށް ރަޖިސްޓްރީ ވުމުގެ ފުރުސަތު އިލެކްޝަންސް ކޮމިޝަން (އީސީ) އިން ހުޅުވާލައިފި އެވެ.
އިލެކްޝަންސް ކޮމިޝަނުގެ ނައިބު ރައީސް އިސްމާއިލް ހަބީބް ކުރެއްވި ޓްވީޓެއްގައި ވިދާޅުވީ އެފަދަ މީހުންނަށް ވޯޓު ފޮށި ބެހެެއްޓޭކަން ކަށަވަރު ވެފައިވާ ތަނަކަށް، އަލުން ރަޖިސްޓަރީވުމުގެ ފުރުސަތު މިއަދުން ފެށިގެން ހުޅުވާލާފައިވާ ކަމަށެވެ.
އެ ފުރުސަތު ހުޅުވައިލީ މިއަދު ހެނދުނު 08:30 އިން ފެށިގެން، މާދަމައިގެ 16:00 ގެ ނިޔަލަށެވެ.
ވޯޓް ފޮށި ބަހައްޓަން ގަސްދުކޮށް ރީރަޖިސްޓްރީ ވާން ކުރިން ހުޅުވައިލުމަށް ފަހު އެކަށީގެންވާ އަދަދެއްގެ މީހުން ރަޖިސްޓްރީވެފައި ނުވާތީ ފޮށި ނުބަހައްޓަން ނިންމި ތަންތަނުގެ ލިސްޓެއް ހަބީބުގެ ޓްވީޓްގައި ހިމެނުއްވި އެވެ. އެ ލިސްޓްގައި އޮތީ ބައެއް ރިސޯޓްތަކާއި ރާއްޖޭން ބޭރުގެ ބައެއް ތަންތަނެވެ. ރާއްޖޭން ބޭރުގެ ތަންތަނުގެ ތެރެއިން ފޮށި ނުބަހައްޓަން ނިންމި ތަންތަނަކީ، ޖަޕާނުގެ ވެރިރަށް ޓޯކްޔޯ، އިންޑިއާގެ ވެރިރަށް ނިއުދިއްލީ، ތައިލެންޑްގެ ވެރިރަށް ބެންކޮކް އަދި ސިންގަޕޫރެވެ.
ރިޔާސީ އިންތިހާބުގައި ވޯޓުލުމަށް ރިސޯޓުތަކުގައި 65 ވޯޓު ފޮށި އަދި ބޭރު ގައުމުތަކުގައި ފަސް ފޮށި ބަހައްޓާނެ ކަމަށް އިލެކްޝަންސް ކޮމިޝަން (އީސީ) އިން ވަނީ ބުނެފަ އެވެ.
ވޯޓު ފޮށި ބަހައްޓާ ގައުމުތައް
- އިންޑިޔާގެ ޓްރިވެންޑްރަމް
- ސްރީލަންކާގެ ކޮލަމްބޯ
- މެލޭޝިޔާގެ ކުއަލަލަމްޕޫރު
- އިނގިރޭސިވިލާތުގެ ލަންޑަން
- ޔުނައިޓެޑް އެރެބް އެމިރޭޓްސް އަބޫދާބީ
ރިޔާސީ އިންތިހާބުގައި ރަށްވެހިވެފައިވާ ރަށް ނޫން އެހެން ތަނަކަށް ރެޖިސްޓާ ވާން ހުށަހެޅި 40،000 އަށް ވުރެ ގިނަ މީހުންގެ ތެރެއިން 35،849 މީހުން ރަޖިސްޓާކޮށްފައިވާ ކަމަށް އީސީއިން ބުނެ އެވެ.
މި ފަހަރުގެ އިންތިހާބުގައި ވޯޓުލުމުގެ ހައްގު ލިބެނީ 282،395 މީހުންނަށެވެ. މިއަހަރުގެ ރިޔާސީ އިންތިހާބުގައި ހަ ސަތޭކައަށް ވުރެ ގިނަ ވޯޓުފޮށި ބަހައްޓަން ޖެހޭނެ ކަމަށް އިލެކްޝަންސް އިން ލަފާ ކުރެ އެވެ.
