ނ. ކެނދިކުޅުދޫގައި ހަދާ 30 އެނދުގެ ހޮސްޕިޓަލު އިމާރާތް ކުރުމުގެ މަޝްރޫއުގެ އަމަލީ މަސައްކަތް ފެށުމުގެ ގޮތުން މިއަދު ބިންގާ އަޅައިފި އެވެ.
އެ މަޝްރޫއުގެ ބިންގާ އަޅުއްވައިދެއްވީ ރައީސް އިބްރާހިމް މުހައްމަދު ސޯލިހުގެ އިތުރުން ހެލްތު މިނިސްޓަރު އަހުމަދު ނަސީމު އަދި ނ. އަތޮޅުގެ މަޝްހޫރު ބޭސްވެރިއެއް ކަމަށްވާ ހަސަން ގާސިމެވެ. ރައީސް ސޯލިހު މިއަދު އެ ރަށަށް ވަޑައިގެންނެވީ މިހާރު ނ. އަތޮޅަށް ކުރައްވަމުން ގެންދަވާ ރިޔާސީ ކެމްޕެއިން ދަތުރުގެ ތެރެއިންނެވެ.
ސަރުކާރުގެ ވައުދެއްގެ ގޮތުގައި އޮތް ކެނދިކުޅުދޫގައި އަޅާ މި ހޮސްޕިޓަލުގެ މަޝްރޫއު ސަރުކާރުން ބަޔަކާ ހަވާލުކުރީ މި އަހަރުގެ ކުރީކޮޅު އެވެ. އެ މަޝްރޫއު ކުރިއަށް ގެންދާނީ ސަސް އީ ކޮންސްޓްރަކްޝަން އިންނެވެ. އެ ކުންފުނީގެ އިސްވެރިންވެސް މިއަދުގެ ހަފުލާގައި ބައިވެރިވި އެވެ.
ރައީސް މިއަދު ކެނދިކުޅުދޫގައި ހުންނަވާ ވިދާޅުވީ އެ ކުންފުނިން މި މަޝްރޫއު ހަލުވި ދުވެލީގައި ނިންމާނެ ކަމާމެދު ޝައްކު ނުކުރައްވާ ކަމަށެވެ.
ބީއެމްއެލްގެ ލޯނަކުން ފައިނޭންސް ކުރާ މި ހޮސްޕިޓަލުގެ މަޝްރޫއަށް ޖުމްލަ 193،895،234 ރުފިޔާ ހަރަދުވާއިރު 30 އެނދުގެ ހޮސްޕިޓަލާއެކު އެކޮމޮޑޭޝަން ބްލޮކެއްވެސް މި މަޝްރޫއުގެ ދަށުން އެޅޭނެ އެވެ.
