މޮރިޝަސްގެ ބޮޑުވަޒީރަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ފޮނުއްވި ސިޓީ ހާމަ ކުރަންޖެހޭނެ ކަމަށާއި އޭނާގެ ވެރިކަމެއްގައި ރައްޔިތުން ބޭނުންވީމަ ހާމަ ނުކުރާނެ އެއްވެސް ކަމެއް ނޯންނާނެ ކަމަށް ޖުމްހޫރީ ޕާޓީގެ ގާސިމް އިބްރާހިމް މިރޭ ވިދާޅުވެއްޖެ އެވެ.
ޖުމްހޫރީ ޕާޓީގެ މެނިފެސްޓޯ އިފުތިތާހު އެ ޕާޓީން ބޭއްވި ޖަލްސާއެއްގައި ވާހަކަ ދައްކަވަމުން ގާސިމް ވިދާޅުވީ ޑިއެގޯ ގާސިއާއާ ދިމާލުން ރާއްޖޭގެ ބޯޑަރު ކަނޑައެޅިއިރު ދިވެހި ސަރުކާރުން ކަންތައް ކުރީ ގާނޫނު އަސާސީއާ ހިލާފަށް ކަމަށެވެ.
"ރައްޔިތުން އެކަމާ ކަންބޮޑުވެގެން ހާމަކޮށްދޭން އެދުނީމަ ރައްޔިތުންނަށް ފޮރުވަންޖެހޭ ކަމެއް އޮވޭތޯ ވެރިކަން ކުރާއިރު. ކާކަށްޓަކާ ކޮށްދޭ ވެރިކަމެއްތޯ މިއީ،" ގާސިމް ވިދާޅުވި އެވެ. "ސިޓީ ވެސް ހާމަ ކުރަންޖެހޭ އެނގޭތޯ. ޖަންގިޔާ ބާލާފައި ދައްކާށޭ ބުންޏަސް ދައްކަންޖެހޭނެ އެނގޭތޯ ރައްޔިތުން ބުނެފިއްޔާ. މައާފު ކުރައްވާ."
ގާސިމް ވިދާޅުވީ ރާއްޖޭގެ ފަސް ދިމާއެއްގައި ބޭރުގެ ސިފައިން ހަރަކާތްތެރިވަމުންދާ ކަމަށާއި އެކަން ވެސް ގާނޫނު އަސާސީއާ ހިލާފު ކަމަށެވެ. އަދި ވިދާޅުވީ އޭނާގެ ވެރިކަމެއްގައި ގާނޫނު އަސާސީއާ ހިލާފު އެއްވެސް ކަމެއް ސަރުކާރުން ނުކުރާނެ ކަމަށެވެ.
"ދިވެހިރާއްޖޭގެ އެއްވެސް ދިމާއެއްގައި، އެއްވެސް ކަމެއްގައި ބޭރުގެ ސިފައިން ބައިތިއްބޭނީ ރައްޔިތުންގެ މަޖިލީހުން ހުށަހަޅައިގެން ފާސްކޮށްގެން،" ގާސިމް ވިދާޅުވި އެވެ.
"މިއީ ވަރަށް ބޮޑު މައްސަލައެއް ދެއްތޯ. މި ދައްކަނީ އަޅުގަނޑުމެންގެ ގާނޫނު އަސާސީއާ ސަރުކާރުން ހިލާފުވި ވާހަކަ. ހަމަ ގައިމު ވެސް އަޅުގަނޑުމެންގެ ވެރިކަމެއްގައި އިސްލާމް ދީނާއި ގާނޫނު އަސާސީ ހިލާފު އެއްވެސް ކަމެއް ނުކުރާނަން."
އެ ޖަލްސާގައި މިރޭ ޖުމްހޫރީ ޕާޓީގެ މެނިފެސްޓޯ އިފުތިތާފު ކޮށްދެއްވުމަށްފަހު ކުރީގެ ނައިބު ރައީސް ޑރ. އަބްދުﷲ ޖިހާދު ވިދާޅުވީ އަދިވެސް އެ މެނިފެސްޓޯއަށް ކަންކަން އިތުރުވެގެންދާނެ ކަމަށެވެ. އެ މެނިފެސްޓޯ އެކުލަވާލީ 200 އަށް ވުރެ ގިނަ މީހުންނާ 80 އަށްވުރެ ގިނަ ބައްދަލުވުން ބޭއްވުމަށްފަހު ކަމަށެވެ.
"މި މެނިފެސްޓޯއަކީ ލިވިން ޑޮކިއުމެންޓެއް. އަދިވެސް ބަދަލު އަންނާނެ. ހިޔާލު ހުށަހެޅުމުގެ ފުރުސަތު އޮންނާނެ،" ޖިހާދު ވިދާޅުވި އެވެ. "މި މެނިފެސްޓޯ ތަންފީޒުވެއްޖެއްޔާ ރާއްޖޭގެ ހުރިހާ ރައްޔިތުން ތިބޭނި އުފަލުން ފޮޅިފައި."
ގާސިމްގެ އިތުރުން ސެޕްޓެމްބަރު 9، ގެ ރިޔާސީ އިންތިހާބުގައި ވާދަ ކުރައްވަނީ ރައީސް އިބްރާހިމް މުހައްމަދު ސޯލިހާއި އިދިކޮޅު ކޯލިޝަންގެ ޑރ. މުހައްމަދު މުއިއްޒާއި ދަ ޑިމޮކްރެޓްސްގެ އިލްޔާސް ލަބީބާއި މޯލްޑިވްސް ނެޝަނަލް ޕާޓީގެ މުހައްމަދު ނާޒިމެވެ. އޭގެ އިތުރުން އުމަރު ނަސީރާއި ފާރިސް މައުމޫނާއި ހަސަން ޒަމީލް ވެސް ވާދަ ކުރައްވަ އެވެ.
