ސެޕްޓެމްބަރު 9، ގައި އޮންނަ ރިޔާސީ އިންތިހާބުގައި އަށް ކެންޑިޑޭޓުން ވާދަކުރަން ކުރިމަތިލުމަކީ އެމްޑީޕީއަށް އެ އިންތިހާބު ކާމިޔާބު ކުރަން ކުރިއަށް ވުރެ ފަސޭހަވުން ކަމަށް އެ ޕާޓީގެ ރިޔާސީ ކެންޑިޑޭޓު، ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
ދ. ކުޑަހުވަދޫގައި މިރޭ ކުރިއަށް ގެންދާ ޖަލްސާގައި ވާހަކަ ދައްކަވަމުން ރައީސް ސޯލިހު ވިދާޅުވީ ރިޔާސީ އިންތިހާބުގައި އަށް ކެންޑިޑޭޓުން ކުރިމަތިލީއިރު އެއީ އިންތިހާބު ކާމިޔާބުކުރަން އެމްޑީޕީއަށްވީ އިތުރު ފަސޭހައެއް ކަމަށް އެމަނިކުފާނު ވިދާޅުވި އެވެ.
"އަށް ކެންޑިޑޭޓުން ކުރިމަތިލީ ފުރަތަމަ ފަހަރު. 2008 ގައި ހަ ކެންޑިޑޭޓުން، އޭގެ ފަހުން މިހާ ގިނަ ކެންޑިޑޭޓުން ކުރިމައްޗެއް ނުލާ، ކުރިއަށް ވުރެ މާ ބޮޑު ތަނުން ފަސޭހަވެއްޖެ، އިރާދަކުރެއްވިއްޔާ ކުރިއަށް މި އޮތް އިންތިހާބު ކާމިޔާބު ކުރާނީ އެއް ބުރުން،" ރައީސް ސޯލިހު ވިދާޅުވި އެވެ.
ދެހާސްއަށާރަވަނަ އަހަރު ރައީސް ސޯލިހު ކެމްޕެއިނަށް ރަށްރަށަށް ވަޑައިގެންނެވިއިރު، ރަށްރަށުން އެދެމުން އައި ކަންކަން ވެސް މިދިޔަ ފަސް އަހަރަށް ފަހު ބަދަލުވެފައިވާ ކަމަށެވެ. އޭރު ރާއްޖޭގެ ގިނަ ރަށްރަށުގައި އެންމެ އަސާސީ ހިދުމަތްތައް ވެސް ގާއިމުވެފައި ނެތް ކަން އެމަނިކުފާނު ފާހަގަ ކުރެއްވި އެވެ.
"އޭރު އަރާ ކޮންމެ ރަށަކުން ވެސް އެދެނީ ސްކޫލަށް ކްލާސް ހަމަނުވާ ވާހަކަ، ލަފާ ފުރަން ދަތި ވާހަކަ، ބަނދަރު ނުހެދި އޮތް ވާހަކަ، ކަރަންޓު އަވަސްއަވަހަށް ކެނޑޭތީ ހިފައި ގެންގުޅޭ ތަކެތި، 140 ރަށެއްގައި ފެނާއި ނަރުދަމާގެ މަސައްކަތް އެއް ފަހަރާ ގެންދެވުނު، 150 ރަށުގައި ބަނދަރުގެ މަސައްކަތް، 150 ރަށެއްގައި ކަރަންޓުގެ ކަންކަން ހަމަޖައްސަން ޖެހުނު،" ރައީސް ތަފުސީލުކޮށްދެއްވި އެވެ.
ފުރަތަމަ ދައުރަށް ވެވަޑައިގެންނެވި ވައުދުތަކުގެ ގާތްގަނޑަކަށް 90 އިންސައްތަ ހާސިލުކުރެވިފައިވާ ކަމަށް އެމަނިކުފާނު ގަބޫލުކުރައްވަ އެވެ. މިިހާތަނަށް ކެމްޕެއިނުގައި ހަ އަތޮޅެއްގެ ހުރިހާ ރަށަކަށް ވަޑައިގެންނެވިއިރު ފެނުނީ ރައްޔިތުން މި ސަރުކާރު ބަލައިގަތް ވަރު ކަމަށް ރައީސް ސޯލިހު ވިދާޅުވި އެވެ.
"އުފާވެރި އަމާން ރާއްޖޭގެ ކެމްޕެއިން ދަތުރުގައި ހަ އަތޮޅެއްގެ ހުރިހާ ރަށަކަށް މި ދެވުނީ. އަޅުގަނޑަށް ފެނިގެން ދިޔައީ ރާއްޖޭގެ ރައްޔިތުން މި ބޭނުންވާ އުފާވެރި އަމާން ރާއްޖެއެއް ހޯދުމަށް ބޭނުންވެފައިވާ މަންޒަރު،" ރައީސް ސޯލިހު ވިދާޅުވި އެވެ.
މި ސަރުކާރަކީ ޖަވާބުދާރީކުރުމާއި ހާމަކަން ބޮޑު ކަމެއް ނެތް ސަރުކާރެއް ކަމަށް ބުނި ނަމަވެސް އެއީ ވެސް ހަގީގަތެއް ނޫން ކަމަށް ރައީސް ވިދާޅުވި އެވެ. އެ ކަމަށް ބާރު ދިނުމަށް ރައީސް ކިޔައިދެއްވީ ރައްޔިތުންގެ މަޖިލިހަށް ވަޒީރުން ޖަވާބުދާރީވެފައިވާ މިންވަރުގެ ތަފާސްހިސާބެވެ.
"ވަޒީރުން ރައްޔިތުންގެ މަޖިލީހަށް ޖަވާބުދާރީވުމުގައި ކުރިއާ އަޅާ ބަލާއިރު ހާސްބައި ތަފާތު، 2013 އިން ފެށިގެން 2018 އަށް ވަޒީރުން ހާޒިރުވީ 50 ފަހަރު، 321 ފަހަރު ވަޒީރުން ރައްޔިތުންގެ މަޖިލީހަށް ހާޒިރުވެ ރައްޔިތުންގެ މަޖިލީހުގެ މެންބަރުންގެ ސުވާލުތަކަށް ޖަވާބުދީފައި،" ރައީސް ވިދާޅުވި އެވެ.
ރިޔާސީ އިންތިހާބަށް ކުރިމަތިލި ކެންޑިޑޭޓުން؛
- އެމްޑީޕީ: ރައީސް އިބްރާހިމް މުހައްމަދު ސޯލިހު
- ޕީއެންސީ: މާލޭގެ މޭޔަރު ޑރ. މުހައްމަދު މުއިއްޒު
- ޖޭޕީ: މަޖިލީހުގެ މާމިގިލި ދާއިރާގެ މެންބަރު ގާސިމް އިބްރާހިމް
- ޑިމޮކްރެޓްސް: މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބް
- އެމްއެންޕީ: މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމް
- އަމިއްލަ ގޮތުން، އެމްއާރުއެމްގެ ރައީސް އަހުމަދު ފާރިސް މައުމޫން
- އަމިއްލަ ގޮތުން، ކުރީގެ ހޯމް މިނިސްޓަރު އުމަރު ނަސީރު
- އަމިއްލަ ގޮތުން، ޑިފެންސް މިނިސްޓްރީގެ ކުރީގެ ޑެޕިއުޓީ ހަސަން ޒަމީލް
ރިޔާސީ އިންތިހާބުގައި ވޯޓު ލުމުގެ ހައްގު 280،000 މީހުނަށް ލިބެ އެވެ. ފުރަތަމަ ބުރުގެ ވޯޓު ލުން ސެޕްޓެމްބަރު 9، ގައި އޮންނަ އިރު ދެވަނަ ބުރަކަށް ދާން ޖެހިއްޖެނަމަ ދެވަނަ ބުރުގެ ވޯޓު ލުން އޮންނާނީ ސެޕްޓެމްބަރު 30، ގަ އެވެ.
ޖުމްލަ 604 ވޯޓުފޮށި ބަހައްޓަ އެވެ. އެއީ، މާލެ ސަރަހައްދުގައި ބެހެއްޓޭ 187 ފޮއްޓާއި، އަތޮޅު ތެރޭގައި ބެހެއްޓޭ 319 ފޮށިީގެ އިތުރުން، ރިސޯޓުތަކުގައި 78 ފޮށި، ރާއްޖެއިން ބޭރުގައި 13 ފޮށި، އަދި ޖަލުތަކާއި ސިނާއި ރަށްރަށުގައި ހަތް ފޮއްޓެވެ. އަދި 23 ރިސޯޓުގައި ވޯޓުފޮށި ބެހެއްޓުމުގެ ފުރުސަތު ދީފައިވެ އެވެ.
