ވ. އާރަށް ކުއްޔަށް ދޫކުރުމުގައި ހިންގި ކަމަށް ބުނާ ހިޔާނާތުގެ މައްސަލާގައި ކުރީގެ ރައީސް އަބްދުﷲ ޔާމީނުގެ މައްޗަށް އިއްވާފައިވާ 11 އަހަރުގެ ޖަލު ހުކުމާއި ފަސް މިލިއަން ޑޮލަރުގެ ޖޫރިމަނާގެ ހުކުމް ފަސްކޮށްދިނުމުގެ އަމުރަކަަށް އެމަނިކުފާނުގެ ފަރާތްޕުޅުން ހައި ކޯޓުގައި ރޭ އެދިއްޖެ އެވެ.
ޔާމީނަށް ކްރިމިނަލް ކޯޓުން އިއްވާފައިވާ ހުކުމް ހައި ކޯޓުގައި އިސްތިއުނާފު ކުރި އިރު ވެސް ސިޓީއެއް މެދުވެރިކޮށް އެ ކަމަށް އެދިފައިވެ އެވެ. ނަމަވެސް އެއީ އެ ކަމަކަށް އެދި ހުށަހަޅަން އޮންނަ އިޖުރާއަތުގެ ތެރެއިން، އޮންނަ ގޮތް ނޫން ކަމަށް ބުނެ ހައި ކޯޓުން އޭރު ޖަވާބު ދީފައިވާ ކަން އެނގިފައިވެ އެވެ.
ހައި ކޯޓުން ދެންމެ ޔަގީންކޮށްދިން ގޮތުގައި، އެ ކޯޓުގައި އެ ކަމަށް އޮންނަ އިޖުރާއަތްތަކުގެ ތެރެއިން ޔާމީނުގެ ވަކީލުން ރޭގެ ވަގުތެއްގައި ހުކުމް ތަންފީޒުކުރުން ފަސްކުރުމުގެ އަމުރެއް ނެރެދިނުމަށް އެދި ހައި ކޯޓަށް ހުށަހެޅި އެވެ.
ރިޔާސީ އިންތިހާބުގައި ވާދަކުރުމަށް ޔާމީނުގެ ޝަރުތު ހަމަނުވާ ކަމަށް ސުޕްރީމް ކޯޓުން އިއްޔެ ކަނޑައެޅި އިރު، ޝަރުތު ހަމަނުވި އެއް ސަބަބަކީ ޖޫރިމަނާ ނުދައްކާ އޮތުމުން ސާބިތު ދަރަންޏެއް އެމަނިކުފާނުގެ މައްޗަށް އޮތުމުންނެވެ. އޭރު ޔާމީން ވިދާޅުވަމުން ގެންދެވީ ވެސް ހައި ކޯޓުގައި މުޅި ހުކުމް ތަންފީޒުކޮށްދިނުމުގެ އަމުރެއް ނެރެދިނުމަށް އެދިފައިވާ ކަމަށެވެ.
ހުކުމް ތަންފީޒުކުރުން ފަސްކުރުމުގެ އަމުރެއް ނެރެދިނުމަށް އެދިފައިމިވަނީ، ކްރިމިނަލް ކޯޓުން ކުރި ހުކުމުގެ ދަށުން ހަ މަސް ދުވަހުގެ ތެރޭގައި ދައްކަން ޖެހޭ ފަސް މިލިއަން ޑޮލަރު ނުދައްކާ އޮތުމުން އެ ފައިސާ ހޯދުމަށް އެޓާނީ ޖެނެރަލްގެ އޮފީހުން ސިވިލް ކޯޓަށް މައްސަލައެއް ހުށަހަޅާފައިވަނިކޮށެވެ.
އަދި ޔާމީން ޖަލުގައި ހުންނަވާތީ، ޕީޕީއެމް/ޕީއެންސީގެ މުހިންމު ނިންމުންތައް ނިންމުމުގައި އެމަނިކުފާނާ މުއާމަލާތް ކުރުމުގައި ދަތިތަކެއް ކުރިމަތިވާތީ އިދިކޮޅު ދެ ޕާޓީ ހިމެނޭ ޖޮއިންޓް ސެނެޓުގެ ތެރޭގައި އެ ކަންބޮޑުވުންތައް ވެސް ބޮޑުވެފައިވާ ދަނޑިވަޅެއްގަ އެވެ.
މިހާރު ވެސް، ޔާމީނަށް ވާދަނުކުރެވޭ ހާލަތުގައި ތައްޔާރުވި ޕީއެންސީގެ ކެންޑިޑޭޓު އަދި މާލޭގެ މޭޔަރު ޑރ. މުހައްމަދު މުއިއްޒުގެ ޕްރެސް ކޮންފެރެންސް ވެސް ބާއްވާނެ ވަގުތެއް ކަނޑަނޭޅި ލަސްވެގެން ދަނީ ޔާމީނުގެ ފަރާތުން ފޮނުވާ އިރުޝާދުތައް ޖަލުން ލިބުން ލަސްވެގެން ކަމަށް މައުލޫމާތު ލިބެ އެވެ.
ވާދަނުކުރެވޭނެ ކަން ޔަގީންވުމުން ޔާމީން ފުރަތަމަ ލަފާ ދިނީ ޕީޕީއެމުން އިންތިހާބު ބޮއިކޮޓް ކުރުމަށެވެ. އޭރު ބެކްއަޕް ކެންޑިޑޭޓަކަށް ޕީއެންސީގެ ކެންޑިޑޭޓެއް ތައްޔާރުކޮށް، އަދި ވަގުތު ލިބިއްޖެނަމަ ޕީޕީއެމްގެ ކެންޑިޑޭޓެއް ނެރެވޭނެ ކަމަށް އެ ދެ ޕާޓީ ހިމެނޭ ކޯލިޝަންގެ ލީޑާޝިޕުން ދިޔައީ ބުނަމުންނެވެ.
މާފުށީ ޖަލުން އެމަނިކުފާނު ފޮނުވި ސިޓީއާ ގުޅިގެން، ޕީޕީއެމް ސެނެޓުގައި އިއްޔެ ބަހުސް ބޮޑުވެ ހަމަނުޖެހުން ވެސް އުފެދުނެވެ. ފަހުން ސެނެޓުން ފާސްކުރީ، ޔާމީން މިނިވަން ކުރެވެން ވެސް އޮތީ ރިޔާސީ އިންތިހާބުގައި އެ ޕާޓީ ވާދަކޮށް އިންތިހާބު ކާމިޔާބުކޮށްގެން ކަމަށެވެ.
ސެނެޓުގެ 67 މެންބަރަކު ބޮއިކޮޓް ކުރުމާ ދެކޮޅަށް ވޯޓު ދިންއިރު، ބޮއިކޮޓް ކުރަން ވޯޓު ދިނީ 45 މެންބަރެކެވެ. ސެނެޓުގެ އެ ނިންމުން ޔާމީނާ ހިއްސާކޮށް، މާފުށީ ޖަލުން އަނެއްކާ ވެސް ޔާމީން ފޮނުވި ނޯޓުގައި އެދިވަޑައިގަތީ އިންތިހާބު ބޮއިކޮޓް ކުރުމަށެވެ.
މިއަދު ހެނދުނުވީއިރު ޕީޕީއެމްގެ ރަސްމީ ނިންމުން ސާފުނުވެ އޮއްވައި މުއިއްޒު އޭނާގެ ކެންޑިޑެސީ ފޯމު ހުށަހެޅުއްވި އެވެ. އޭގެ އިރުކޮޅެއްގެ ތެރޭގައި، ބޮއިކޮޓް ކުރުމުގެ ވިސްނުން ދޫކޮށްލައްވައި މުއިއްޒަށް ތާއީދުކުރައްވަން ޔާމީން ނިންމެވިކަން އެމަނިކުފާނުގެ ވަކީލުން ހާމަކުރެއްވި އެވެ
