ވެރިކަން ލިބުނަސް, އަމިއްލަ ވިޔަފާރީގެ މަސްލަހަތު އިސްނުކުރައްވާނެ ކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމް ވައުދުވެވަޑައިގެންފި އެވެ.
ގާސިމްގެ ކެންޑިޑެސީ ފޯމު ހުށަހަޅުއްވަން ޖޭޕީގެ 500އެއްހާ މެންބަރުންނާއެކު މިއަދު ދަރުބާރުގެއަށް ވަޑައިގެން ގާސިމް ވިދާޅުވީ, އޭނާއަށް ވެރިކަން ލިބިއްޖެނަމަ އޭނާގެ އަމިއްލަ ވިޔަފާރި ކަމަށްވާ ވިލާ ކުންފުނި ކުރިއަރައިގެން ދާނެ ކަމަށް ބައެއް މީހުން ތުހުމަތު ކުރަމުންދާ ކަމަށެވެ. ގާސިމް ސިފަކުރެއްވި ގޮތުގައި ވިޔަފާރި މަސްލަހަތު އިސްކުރާނެ ކަމަށް ކުރާ ތުހުމަތަކީ ކަނޑައެޅިގެން ދޮގު ވާހަކައެކެވެ.
"ބައެއް ބޭފުޅުން ދައްކާ ވާހަކައެއް އަޅުގަނޑަށް ވެރިކަމަށް އާދެވިއްޖެނަމަ ވިލާއޭ އަޅުގަނޑު ބޮޑުކުރާނީ. އެއީ ކަނޑައެޅިގެން ދޮގު ވާހަކައެއް." ކެންޑިޑެސީ ފޯމު އީސީއަށް ހުށަހެޅުއްވުމަށްފަހު ނޫސްވެރިންނާ ބައްދަލުކުރައްވާ ގާސިމް ވިދާޅުވި އެވެ.
ގާސިމް ވިދާޅުވީ, އޭނާއަށް ވެރިކަން ލިބުނަސް ވިިޔަފާރި މަސްލަހަތު އިސްނުކުރައްވާނެ ކަމަށެވެ.
"އަޅުގަނޑު ރައީސުލްޖުމްހޫރިއްޔާ ކަމަށް ހޮވިޔަސް މިއަދު އަޅުގަނޑުގެ ކުންފުނިތަކުގައި, އަޅުގަނޑުގެ އަމިއްލަ ނަމުގައި ހުރި އެއްޗަކަށްވުރެ އިތުރު ހަމަ އެއްވެސް އެއްޗެއް ބޭނުމެއް ނޫން. ދިވެހި ގައުމުން އަޅުގަނޑު އިތުރަކަށް އެއްވެސް އެއްޗެއް ބޭނުމެއް ނުވޭ." ދަރުބާރު ގޭގެ ބޭރުގައި ހުންނަވާ ގާސިމް ވިދާޅުވި އެވެ.
ވިޔަފާރި މަސްލަހަތު އިސް ނުކުރެއްވުމަށް ވައުދުވެ ވަޑައިގަންނަވަމުން ގާސިމް ވަނީ އިތުރަށް އެއްވެސް އެއްޗެއް ބޭނުން ނުވާ ކަމަށް ވިދާޅުވި އެވެ.
"އަޅުގަނޑު ވައުދުވަން އެކަހަލަ އެއްވެސް ކަމެއް އަޅުގަނޑު ނުކުރާނެ ކަމަށް. ޔަގީންކަމާއެކު މި ދަންނަވަނީ މިހާރު ހުރި އެއްޗަކަށްވުރެ އިތުރަށް އެއްވެސް އެއްޗެއް އަޅުގަނޑުގެ ވެރިކަމުގައި ހޯދާކަށް ނޫޅޭނަން. ބޭނުމެއް ނޫން. ނުކުރާނަން." އޭނާ ވިދާޅުވި އެވެ.
އެ މޭރުމުން ވާހަކަދައްކަވަމުން ގާސިމް ވިދާޅުވީ, ކޮރަޕްޝަނުގެ ތުހުމަތުވެ, ފަސްބައި ހަޑިވެފައިވާ މީހަކަަށް އޭނާގެ ސަރުކާރެއްގައި ވަޒީފާއެއް ނުދެއްވާނެ ކަމަށެވެ.
ވެރިކަމަށް ކުރިމަތިލެއްވީ އަމިއްލަ ފައިދާއެއް ހޯއްދަވަން ނޫންކަން ފާހަގަކުރައްވަމުން ގާސިމް ވިދާޅުވީ, އޭނާ މަސައްކަތް ކުރައްވަނީ ދިވެހި ރައްޔިތުންނަށް ހެޔޮ އެދިގެން ލޮއެތްބާއި އިހްލާސްތެރިކަމާއެކު ދިވެހި ގައުމަށް އަމާންކަމާއި އޮމާންކަން ގެނެސްދިނުމަށްޓަކައި ވަފާތެރިކަމާއެކު ކުރަން ހުރި ކަމެއް ކުރުމަށެވެ.
މ. ކުނޫޒުގައި ހުންނަ ޖުމްހޫރީ ޕާޓީގެ އޮފީހުން މެންބަރުންނާއެކު ހިންގަވާފައި ކެންޑިޑެސީ ފޯމު ހުށަހަޅުއްވަން ގާސިމް ވަޑައިގެންނެވީ, ހެނދުނު 11:00 ގަ އެވެ. މިހާރު އިލެކްޝަންސް ކޮމިޝަނުން ވަނީ, ގާސިމްގެ ފޯމު ޗެކު ކުރުމަށްފަހު ފޯމު ގަބޫލުކޮށްފައިވާކަން އިއުލާނު ކޮށްފަ އެވެ.
ގާސިމްގެ އިތުރުން ރިޔާސީ އިންތިހާބުގައި ވާދަ ކުރައްވަނީ އެމްޑީޕީގެ ކެންޑިޑޭޓް އަދި މިހާރު ރައީސް އިބްރާހިމް މުހައްމަދު ސޯލިހާއި ދަ ޑިމޮކްރެޓްސްގެ އިލްޔާސް ލަބީބާއި ޕީޕީއެމް/ޕީއެންސީ ކޯލިޝަނުގެ ޑރ. މުހައްމަދު މުއިއްޒެވެ.
އޭގެ އިތުރުން މޯލްޑިވްސް ނެޝަނަލް ޕާޓީގެ މުހައްމަދު ނާޒިމާއި މޯލްޑިވްސް ރިފޯމް މޫވްމަންޓުގެ ފާރިސް މައުމޫނާއި ކުރީގެ ހޯމް މިނިސްޓަރު އުމަރު ނަސީރުގެ އިތުރުން ކުރީގެ ޑިފެންސް މިނިސްޓަރުގެ ނައިބު ހަސަން ޒަމީލް ވެސް އިންތިހާބުގައި ވާދަ ކުރައްވަ އެވެ.
މިއީ ރިޔާސީ އިންތިހާބެއްގައި މިހާ ގިނަ ކެންޑިޑޭޓުން ވާދަކުރާ ފުރަތަމަ ފަހަރެވެ.
