ދަ ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބުގެ އިންތިހާބީ އެޖެންޓު ފާތިމަތު ނިއުމާގެ މައްޗަށް ހުކުމްކޮށްފައި އޮތް ސާބިތު ދަރަންޏެއް ހަލާސްކުރިކަން އެނގެން ނެތުމުން، އިލްޔާސްގެ ކެންޑިޑެސީ ފޯމު މިރޭ ފާހެއް ނުކުރެވުނެވެ.
ނަމަވެސް މި ނޫހުން ޑިމޮކްރެޓްސްއަށް ގުޅުމުން އެ ޕާޓީގެ ތަރުޖަމާނަކު ބުނީ، ނިއުމާގެ ސާބިތު ދަރަންޏެއް ނޯންނާނެ ކަމަށެވެ.
އިލެކްޝަންސް ކޮމިޝަނުގެ ނައިބު ރައީސް އިސްމާއިލް ހަބީބު ވިދާޅުވީ، އިލްޔާސްގެ ފޯމު މިރޭ ފާސް ނުކުރެވުނީ ލިޔުމެއް މަދުވެގެން ކަމަށެވެ. އެއީ ކޮން ލިޔުމެއް ކަން ވިދާޅުނުވިޔަސް، އެ މަދުވާ ލިޔުން ގެންނާނެ ކަމަށް ދަ ޑިމޮކްރެޓްސް ބުނެފައިވާ ކަމަށް އޭނާ ވިދާޅުވި އެވެ.
އަދަދު ނޫހަށް އެނގިފައިވާ ގޮތުގައި އެ ލިޔުމަކީ ނިއުމާގެ މައްޗަށް ދަރަންޏެއް ނެތް ކަމަށް ބޭންކުން ދޭ ލިޔުމެވެ. ނިއުމާގެ މައްޗަށް ބޭންކެއްގައި އޮތް ސާބިތު ދަރަނި ހަލާސްކުރީ ކޮން އިރެއްގައި ކަމެއް ނޭނގެ އެވެ.
ސެޕްޓެމްބަރު 9، ގައި ބާއްވާ އިންތިހާބަށް ކުރިމަތިލުމަށް އިލްޔާސްގެ އިތުރުން އެމްޑީޕީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހާއި އެމްއެންޕީގެ މުހައްމަދު ނާޒިމް މިއަދު ފޯމު ހުށަހެޅުއްވި އެވެ.
އޭގެ ތެރެއިން، ރައީސް ސޯލިހާއި ނާޒިމްގެ ފޯމު ޗެކް ކުރުމަށްފަހު ޝަރުތު ހަމަވާ ކަމަށް އިލެކްޝަންސް ކޮމިޝަނުން ވަނީ ކަނޑައަޅައިފަ އެވެ.
އިލްޔާސްގެ ފޯމުގައި މައްސަލައެއް އުޅޭކަން ކޮމިޝަނުން މިހާރު ވަނީ ޑިމޮކްރެޓްސްއަށް އަންގައިފަ އެވެ. އަދި އެ މައްސަލަ ހައްލު ކުރަން އެ ޕާޓީން މަސައްކަތް ކުރަމުންދާ ކަމަށް އެނގިފައިވެ އެވެ.
ރިޔާސީ އިންތިހާބަށް ކުރިމަތިލުމުގެ ސުންގަޑި ހަމަވާނީ މާދަމާގ 2:00 ގެ ނިޔަލަށެވެ. މިއަދު ފޯމު ހުށަހެޅުއްވި ބޭފުޅުންގެ އިތުރުން ޖުމްހޫރީ ޕާޓީގެ ގާސިމް އިބްރާހިމާއި އެމްއާރްއެމްގެ ފާރިސް މައުމޫނާއި އަމިއްލަ ގޮތުން ވާދަ ކުރައްވާ ކުރީގެ ހޯމް މިނިސްޓަރު އުމަރު ނަސީރުގެ ފޯމު އަދި ކޮމިޝަނަށް ވައްދާފައެއްނުވެ އެވެ.
އޭގެ އިތުރުން، ޕީޕީއެމްގެ ސިސްޓާ ޕާޓީ ޕީއެންސީގެ ކެންޑިޑޭޓު މާލޭގެ މޭޔަރު ޑރ. މުހައްމަދު މުއިއްޒުގެ ފޯމު ވެސް އަދި ހުށަހަޅާފައެއްނުވެ އެވެ. ނަމަވެސް އޭނާގެ ފޯމު މާދަމާ ހުށަހަޅާނެ ކަމަށް ވަނީ ބުނެފަ އެވެ.
