ޖުމްހޫރީ ޕާޓީ (ޖޭޕީ) ގެ ރިޔާސީ ކެންޑިޑޭޓު އަދި ރައްޔިތުންގެ މަޖިލީހުގެ މާމިގިލި ދާއިރާގެ މެންބަރު ގާސިމް އިބްރާހިމްގެ ރަނިން މޭޓަކީ އެ ޕާޓީގެ ޑެޕިއުޓީ ލީޑަރު ޑރ. އަމީން އިބްރާހިމް ކަން އިއުލާން ކުރައްވައިފި އެވެ.
ގާސިމްގެ ރަނިން މޭޓަކަށް އަމީން ހަމަޖެއްސެވިކަން އިއުލާންކުރެއްވީ ޖުމްހޫރީ ޕާޓީގެ ހެޑްކުއާޓަރު މ. ކުނޫޒުގައި ބޭއްވި ނޫސްވެރިންގެ ބައްދަލުވުމުގަ އެވެ.
އަމީނަކީ ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ސަރުކާރާއި ކުރީގެ ރައީސް އަބްދުﷲ ޔާމީނުގެ ސަރުކާރުގައި ޓްރާންސްޕޯޓް މިނިސްޓަރަކަށް ހުންނެވި ބޭފުޅެކެވެ. ފަހުން ޔާމީނުގެ ވެރިކަމުގައި އެ މިނިސްޓްރީ އުވާލީ އެވެ.
ޔާމީނުގެ ސަރުކާރުގައި އޭރުގެ ބައެއް ވާދަވެރި ސިޔާސީ ބޭފުޅުންނަށް ކުރިމަތިވެވަޑައިގަތް ގޮންޖެހުންތަކާއެކު، ރާއްޖޭން ބޭރަށް އަރުއްވާލައްވައިގެން ވެސް ބައެއް ބޭފުޅުން އުޅުއްވި އެވެ. އަމީނަކީ އޭގެ ތެރެއިން އެއް ބޭފުޅެކެވެ.
އޭރު އިނގިރޭސިވިލާތުގައި އަރުއްވާލައިގެން ހުންނެވި އިރު، ބިޒްނަސް އެޑްމިނިސްޓްރޭޝަންގެ ދާއިރާއިން ވަނީ ޕީއެޗްޑީ ހާސިލްކުރައްވައިފަ އެވެ. އަމީނަކީ، ދިވެހި އަދަބިއްޔާތަށް ހިދުމަތް ކުރެއްވުމުގެ ދާއިރާއިން 2007 ވަނަ އަހަރު އާންމު ހިދުމަތުގެ އިނާމު ވެސް ލިބިވަޑައިގެންނެވި ބޭފުޅެކެވެ.
ރިޔާސީ އިންތިހާބުތަކުގައި ގާސިމްގެ ދައުރު؛
ގާސިމް ވަނީ 2008 އަދި 2013 ގެ ރިޔާސީ އިންތިހާބުގައި ވެސް ވާދަކުރައްވައިފަ އެވެ. 2008 ވަނަ އަހަރު ގާސިމަށް ލިބުނީ ވޯޓުލީ މީހުންގެ 15 ޕަސެންޓެވެ. އަދި 2013 ގައި ގާސިމަށް ލިބުނީ ވޯޓުލީ މީހުންގެ 24 ޕަސެންޓެވެ.
ދެ އިންތިހާބުގައި ވެސް ދެ ވަަނަ ބުރަށް ދެވޭ ވަރަށް ގާސިމަށް ވޯޓު ނުލިބުނު ނަމަވެސް އެ ދެ ފަހަރު ވެސް އިންތިހާބު ކާމިޔާބުކުރީ ގާސިމްގެ ތާއީދު އޮތް ކެންޑިޑޭޓެވެ. އަދި ދެވަނަ ބުރުގައި، އެ ދެ އަހަރު ވެސް، ގާސިމް ތާއީދު ކުރެއްވީ ފުރަތަމަ ބުރުގައި ދެވަނައަށް އެންމެ ގިނަ ވޯޓު ލިބުނު ކެންޑިޑޭޓަށެވެ.
ރައީސް މުހައްމަދު ނަޝީދާއި ރައީސް އަބްދުﷲ ޔާމީން ވެސް ސަރުކާރު އެކުލަވާލީ ޖޭޕީއަށް ހިއްސާއެއްދޭ ގޮތަށެވެ.
އެންމެ ފަހުން 2018 ގެ ރިޔާސީ އިންތިހާބު އޮތް އިރު، ގާސިމް ހިމެނޭހެން އޭރުގެ އިދިކޮޅު ހުރިހާ ލީޑަރުން ތިބީ ޖަލު ހުކުމެއްގައި ނުވަތަ ހުކުމެއް ނެތި ބަންދުގަ އެވެ. އެހެންވެ ގާސިމްގެ ޖޭޕީގެ އިތުރަށް އެމްއާރުއެމާއި އަދާލަތު ޕާޓީން ތާއީދުކުރީ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ސޯލިހަށެވެ.
ރައީސް ސޯލިހުގެ ސަރުކާރުގައި ވެސް ޖުމްހޫރީ ޕާޓީއަށް ހިއްސާއެއް ދީފައިވެ އެވެ. ސަރުކާރު ކެބިނެޓުގައި ޖުމްހޫރީ ޕާޓީއަށް ނިސްބަތްވާ ވަޒީރުން އެބަ ތިއްބެވި އެވެ. ސަރުކާރުން އަދިވެސް ޖުމްހޫރީ ޕާޓީގެ ބޭފުޅުން ވަކިނުވި ނަމަވެސް އެ ޕާޓީގެ ކައުންސިލުން ނިންމީ ވަކިން އިންތިހާބުގައި ވާދަކުރުމަށެވެ.
މި ފަހުން ބޭއްވި ޖުމްހޫރީ ޕާޓީގެ ކައުންސިލަށް، ރައީސް ސޯލިހާއެކު އިތުރު ފަސް އަހަރަށް ކޯލިޝަން ހަދަން ލިބިފައިވާ ދައުވަތު ވެސް އެ ޕާޓީގެ ލީޑަރު ގާސިމް ހިއްސާކުރެއްވި އެވެ. ނަމަވެސް ކައުންސިލުން އަނެއްކާ ވެސް ނިންމީ އިންތިހާބުގައި ވާދަކުރަން ނިންމި ނިންމުން ދެމެހެއްޓުމަށެވެ.
