ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ވާދަކުރައްވައި، ވެރިކަމުގެ ދެ ވަނަ ދައުރެއް ހޯއްދަވަން ކެމްޕޭނު ކުރައްވަމުން ގެންދަވާ ރައީސް އިބްރާހިމް މުހައްމަދު ސޯލިހުގެ މެނިފެސްޓޯގައި ހިމެނޭ މައިގަނޑު ސިޔާސަތުގެ ތެރެއިން މިހާތަނަށް ތައާރަފުކުރި "އުފާވެރި ދިރިއުޅުން" ސިޔާސަތު ބިނާވެފައި އޮތީ ގަރުބަގަނެ، ވިހައި، ބޮޑުވެ، އުމުރުގެ އަސުރުގައި ވެސް އުފާވެރި ދިރިއުޅުމެއްގެ މައްޗަށެވެ.
"އިންސާނާ ގަރުބަގަތީއްސުރެ ދުނިޔެ ދޫކުރުމާހަމައަށް އެމީހެއްގެ ޖިސްމާނީ އަދި ނަފްސާނީ ދުޅަހެޔޮކަން ކަށަވަރުކުރުމަށްޓަކައި ބޭނުންވާ ހިދުމަތްތައް އެމީހަކާ ގާތުން، ތަކުލީފެއްނެތި ފުރިހަމައަށް ލިބެންޖެހެއެވެ."
އެމްޑީޕީ، އަދާލަތު ޕާޓީ އަދި އެމްޑީއޭގެ އިންތިހާދުގެ މި މެނިފެސްޓޯ ބަހާފައި ވަނީ މައިގަނޑު ފަސް ސިޔާސަތެއްގެ މައްޗަށެވެ. އެއީ؛
- އުފާވެރި ދިރިއުޅުން
- އަމާން މުޖުތަމައު
- ޒުވާނުންގެ އާޖީލު
- އިގުތިސާދީ ބޮޑު ބަދަލު
- ހެޔޮވެރިކަން
މި މައިގަނޑު ފަސް ސިޔާސަތުގެ ތެރެއިން މިހާތަނަށް ތަފްސީލުތައް ހާމަކުރީ 'އުފާވެރި ދިރިއުޅުން' ސިޔާސަތުގެ އެވެ. އުފާވެރި ދިރިއުޅުން ސިޔާސަތު އެކުލެވިގެންވާ ތިން ދާއިރާއަކީ 'ދުޅަހެޔޮ ބަދަހި މުޖުތަމައު' އާއި 'އުފެއްދުންތެރި ފުދޭ ޖީލު' އާއި 'ޝާމިލު އޯގާތެރި ރައްޔިތުން' މި އެވެ.
މި ތިން ސިޔާސަތު އެކި ދާއިރާތަކަށް ބަހާލާފައިވާއިރު އޭގެ ދަށުން 198 'ވައުދު' ހިމަނާފައި ވެއެވެ. ބައެއް ވައުދުތައް އެއް ދާއިރާއަށް ވުރެ ގިނަ ދާއިރާގެ ދަށުން ހިމަނާފައި ވެއެވެ.
ދުޅަހެޔޮ ބަދަހި މުޖުތަމައު
ދުޅަހެޔޮ ބަދަހި އާއިލާއަކަށް އެޅިފައިވާ އެންމެ ބޮޑު ހުރަހަކީ ބޯހިޔާވަހިކަމުގެ ދަތިކަމެކެވެ. ނިމިދިޔަ އެއްވެސް ސަރުކާރަކުން އެކަމަށް ދާއިމީ ހައްލެއް ލިބޭނެ ވަރުގެ ކަމެއް ނެތެވެ. ނަމަވެސް، ރައީސް ސޯލިހުގެ ދެ ވަނަ ދައުރަށް ދުޅަހެޔޮ ބަދަހި އާއިލާއެއް އުފެއްދުމަށްޓަކައި، ބޯހިޔާވަހިކަން ހައްލުކުރާނެ، ސިއްހީ ދާއިރާ ރަނގަޅު ކުރާނެ، ހުލުގު ހެޔޮ ޖީލަކަށް ތަރުބިއްޔަތު ފަހިވާނެ، އަދި ބަދަހި މުޖުތަމައުގެ ބައިވެރިވުން ލިބޭނެ ސިޔާސަތުތައް ހިމެނެ އެވެ.
ފެންވަރު ކަށަވަރު ސިއްހީ ހިދުމަތަށް އިތުބާރު
- ބޭސް ފަރުވާ އާއި ބޭހުގެ ކޮލިޓީ ރަނގަޅުކުރުން
- ސަރަހައްދީ ފެންވަރުގައި ލިބޭ ބޭސް ފަރުވާ ފުޅާކުރުން
- މެޑިކަލް ސާމާނު މަރާމާތުކުރަން ނޭޝަނަލް ބަޔޮމެޑިކަލް އިކުއިޕްމަންޓް ސެންޓަރެއް ގާއިމުކުރުން
- ނެޝެނަލް ބްލަޑް ބޭންކެއް ގާއިމުކުރުން
- މެންޓަލް ހެލްތު ކެއާ ގާނޫނެއް ވުޖޫދުކުރުން
- ޑްރަގް ރިހެބިލިޓޭޝަން ނިޒާމުގެ ތެރެއަށް ޕްރައިވެޓް ރިހެބިލިޓޭޝަން ސެންޓަރުތައް ތައާރަފުކުރުން
- ވޯކް-އިން ކްލިނިކްސް/ޑްރޮޕް-އިން ސެންޓަރުތަކާއި ރިކަވަރީ ވިލެޖުތައް ތައާރަފުކުރުން
- ޕްރިޒަން ރިހެބިލިޓޭޝަން ޕްރޮގްރާމްތައް އިންޑިވިޖުއަލައިޒްޑް ޕްލޭނެއްގެ ދަށުން ފޯރުކޮށްދިނުން
ހަމަނޭވާ ލެވޭ ބޯހިޔާވަހިކަން
- ބިން ދަތި ރަށްރަށުގައި ބިން އިތުރުކުރުމާއި ހައުސިން ޔުނިޓުތައް ގާއިމުކުރުން
- ހައުސިން ފައިނޭންސަށް ހާއްސަ ބޭންކަކުން ހަ ޕަސެންޓު އިންޓްރެސްޓުގައި, އަމިއްލަ ޖީބުން (އިކުއިޓީއަށް) 10 ޕަސެންޓު ހަރަދުކުރާ ގޮތަށް ލޯނު ދޫކުރުން
- މިހާރު ދޫކުރަމުން އަންނަ ގެދޮރުވެރިޔާ ލޯނު ނެގޭ އަދަދު އެއް މިލިއަން ރުފިޔާއަށް އިތުރުކުރުން
- ރިއަލް އެސްޓޭޓް މާކެޓް ރެގިއުލޭޓުކުރުން
- އަތޮޅު ތެރޭގައި ހުންނަ ހުސް ގޯތިތަކުން ނަފާ ލިބޭނެ ގޮތް ފަހިކުރުން
ރިވެތި އިސްލާމީ ދިރިއުޅުން
- ފިގުހު އެކަޑަމީއަކާއި އިސްލާމިކް ސެންޓާ އޮފް އެކްސެލެންސް ގާއިމުކުރުން
- އިސްލާމިކް މިނިސްޓްރީގެ ރެގިއުލޭޓަރީ ދައުރު ހަރުދަނާކުރުން
- ޒަކާތާބެހޭ ގާނޫނެއް އެކުލަވާލުން
- ފަގީރުކަން ނައްތާލާނެ ނިޒާމެއް ގާއިމުކުރުން
- ވަގުފްގެ ނިޒާމެއް އެކުލަވާލުން
- ހައްޖާއި އުމްރާއަށް މިނިސްޓްރީ މެދުވެރިކޮށް ފައިސާދެއްކޭނެ އިންތިޒާމު ހަމަޖެއްސުން
- ހަލާލު ސެޓިފިކޭޝަން ނިޒާމެއް ތައާރަފުކުރުމާއި
- އިނގިރޭސިން އިސްލާމް ކިޔަވަން ބޭނުންވާ ކުދިންނަށް އެ ފުރުސަތު ހޯދައިދިނުން.
ފަހުރުވެރި ދިވެހި ރައްޔިތެއް
- ދިވެހި ލިޓްރޭޗާއަށް ހާއްސަ މާއްދާއެއް ތައާރަފްކުރުން
- ޑިޖިޓަލް ލައިބްރެރީގެ ހިދުމަތް މުޅި ރާއްޖެއަށް ފުޅާކުރުން
- އަތޮޅުތެރޭގައި ސަގާފީ މަރުކަޒުތަކާއި އާޓްގެލެރީއާއި މިއުޒިއަމްތައް ގާއިމުކުރުން
- ކޮންޒަވޭޝަން ލެބޯޓްރީއެއް ގާއިމުކުރުން
- ދިވެހި ބަހުން ލިޔުމާއި ވާހަކަ ދެއްކުމަށް ބޭނުންވާ ކޮންޓެންޓް ތައްޔާރުކުރުމަށް މާލީ އެހީތެރިކަން ފޯރުކޮށްދިނުން
- ދައުލަތުގެ ރެކޯޑްތަކާއި މިކަމަށް ބޭނުންވާ އެންމެހައި ރެކޯޑްތައް ބައިނަލްއަގުވާމީ މިންގަނޑުތަކާ އެއްގޮތަށް އާކައިވްކުރުން.
ޖަމާއަތުގެ ބައިވެރިވުމާއި ބާރުވެރިކަން އަދި އިޖްތިމާއީ ރައްކާތެރިކަން
- ބައިނަލްއަގުވާމީ މިންގަނޑުތަކާ އެއްގޮތަށް މަލްޓި ޓިއާ ސޯޝަލް ޕްރޮޓެކްޝަން ނިޒާމެއް ގާއިމުކުރުން
- އިޖްތިމާއީ ރައްކާތެރިކަމުގެ ނިޒާމެއްގެ ތެރެއިން އިތުރު އިންޝުއަރަންސްތައް ތައާރަފްކުރުން
- ސަބްސިޑީތައް ހައްގުވެރި ފަރާތަށް ސީދާ ލިބޭނެގޮތަށް ޑައިރެކްޓް ސަބްސިޑީއަށް ބަދަލުކުރުން
- ޑިޖިޓަލައިޒްޑް ނިޒާމެއް މެދުވެރިކޮށް އިޖުތިމާއި އެހީ ލިބޭނެ މަގުފަހިކުރުން
- މަދަނީ ޖަމިއްޔާތަކަށް މާލީ އެހީ ދިނުން
- ޖަމިއްޔާތަކުގެ އިދާރީ ހިންގުމަށް ހާއްސަ ކޯ-ވޯކިންގ ސްޕޭސް ގާއިމުކުރުން
- ކޮމިއުނިޓީ ސެންޓަރުތައް ކޮމިއުނިޓީ އެމްޕަވާމަންޓް ސެންޓަރުތަކަށް ބަދަލުކުރުން
- ކޮންމެ ރަށަކާއި ކައިރިން ދަތުރު ދިއުމަށް ހާއްސަ 'ޕިކްނިކް އައިލެންޑެއް' ހަމަޖެއްސުން
- ކޮންމެ ރަށެއްގައި ރައްކާތެރިކަމާއެކު މޫދަށް އެރޭނެ ސަރަހައްދެއް ގާއިމުކުރުން
- ފެހިކަން ބޮޑު، ހިޔާކަން ބޮޑު ސަރަހައްދުތައް ރަށްރަށުގައި އިތުރުކުރުން
އުފެއްދުންތެރި ފުދުންތެރި ޖީލު
މެނިފެސްޓޯގައި ބުނެފައި ވަނީ މިހެންނެވެ؛ ޒަމާނީ ތައުލީމެއްގެ ބިންގަލަކީ އުނގެނުމަށް ލޯބިއަށަގެންފައިވާ، ބިނާކުރަނިވި އީޖާދީ ވިސްނުން ކުރިއަށް ނެރުވާ، ބަދަލުވަމުންދާ ދުނިޔެއާއި އުފާވެރި ދިރިއުޅުމަކަށް ތައްޔާރުވެފައިވާ ޖީލެއް ބިނާކުރުމެވެ. އިސްލާމީ ރިވެތި ދިރިއުޅުމާއި، ދިވެހި ގައުމިއްޔަތާއި ދިވެހި ވެއްޓަށް އަހުލުވެރިވާ، ވަށައިގެންވާ މާހައުލަށް ލޯހުޅުވޭ ގޮތުގައި ތަޢުލީމުގެ ބިންގާ އެޅުމަކީ ގުޅިފައިވާ ޕާޓީތަކުގެ ސިޔާސަތެވެ. ފެންވަރު އެކަށައެޅޭ ތައުލީމެއް ފޯރުކޮށްދިނުމަށް ބޭނުންވާނެ ފުރިހަމަ ވަސީލަތް ކޮންމެ ސްކޫލެއްގައިވެސް ގާއިމުކޮށްފައި ހުރުމަކީ މި ސިޔާސަތު ތަންފީޒުވުމުގެ ބާރެވެ.
މި ކަން ހާސިލުކުރަން ވާ ވައުދުތައް ގިނަ އެވެ. އޭގެ ތެރޭގައި
މާދަމާގެ މީހާ މިއަދު
- ހުރިހާ ސްކޫލެއް ސޯލާ މެދުވެރިކޮށް އެއާކޮންޑިޝަން ކުރުން
- ކޮންމެ ސްކޫލެއްގައި ސްކިލް އަދި ސްޓެމް ލެބް ގާއިމުކުރުން
- އަރަބިއްޔާ އައު ސްކޫލްގެ މަސައްކަތް ފުރިހަމަ ވަސީލަތާއިއެކު ނިންމުން
- ސްކޫލް ބަހުގެ ހިދުމަތް ތައާރަފުކުރުން
- ފިޒިކަލް އެޑިއުކޭޝަން (ޕީއީ) ކޮންޓެންޓް މުރާޖާކުރުން
- ދިވެހިރާއްޖެ އާއި ރާއްޖޭގެ ތާރީހާއި ގުޅޭ މާއްދާއެއް ތައާރަފްކުރުން
- ކިޔަވައިދިނުމުގެ ވަސީލަތްތައް އެއްތަނަކުން ލިބޭނެ ޑިޖިޓަލް ޕްލެޓްފޯމެއް ގާއިމުކުރުން
- ބަރު ދަބަސް ލުއި ކުރުމަށްޓަކައި ކޮންމެ ދުވަހަކު ސްކޫލަށް ފޮތްތައް ގެންނަން ނުޖެހޭގޮތަށް ރާވާ ފޮތްތައް ސްކޫލްގައި ބެހެއްޓޭނެ ލޮކާ ސިސްޓަމް ހަމަޖެއްސުން
- ޓޮޕް ޓެން ހޮވާ އުސޫލު ރިވިއުކުރުން
- ކޮންމެ ޓީޗަރަކަށް ވެސް ދެ މާއްދާއެއް ކިޔަވައިދޭގޮތަށް ތަމްރީނުކުރުން
- ކޮންމެ ޓީޗަރަކީ ވެސް ސްޕެޝަލް ނީޑްސްއަށް އަހުލުވެރި ޓީޗަރަކަށް ހެދުން
- ހާއްސަ އެހީ ދިނުމަށް ފުރިހަމައަށް ތައްޔާރުވެފައިވާ ސްކޫލަކަށް ކޮންމެ ސްކޫލެއް ވެސް ހެދުން
- ނުކުޅެދުންތެރިކަން ހުންނަ ކުދިންނަށް ހާއްސަކޮށް ފިލާވަޅު ނަގައިދީ އިމްތިހާނު ފަރުމާކުރުން
- އެންޓި- ބުލީންގް ސިޔާސަތު މުރާޖައާކުރުން
- ތައުލީމީ މަންހަޖް މުރާޖައާކޮށް، ލައިފް ސްކިލްސް އާއި މޯލްޑިވްސް ސްޓަޑީސް އާއި ސިވިކް އެޑިއުކޭޝަންގެ އިތުރުން އާޓްސް އެންޑް ޑްރާމާ އާއި ފޮރިން ލެންގްއޭޖް އާއި ފައިނޭންޝަލް ލިޓްރެސީ އަދި ސްޓެމް ތައާރަފްކުރުން
ފެންވަރު ކަށަވަރު މަތީ ތައުލީމާއި ތަމްރީނު
- މަތީ ތައުލީމާއި ތަމްރީނު ފޯރުކޮށްދޭ މަރުކަޒުތައް ރޭންކުކުރުން
- ދުނިޔޭގެ ނަން މަޝްހޫރު ހޮސްޕިޓަލިޓީ ސްކޫލެއްގެ ކެމްޕަސް ރާއްޖޭގައި ގާއިމްކުރުން.
- ކިޔަވަން ރާއްޖެ އައުމަށް ބާރުއެޅުމުގެ ގޮތުން ސްޓޫޑަންޓް ވިސާ ތައާރަފްކުރުން
- ބޮންޑް ގާނޫނަށް އަމަލުކުރުން ހުއްޓާލުން
- މަތީ ތައުލީމާއި ތަމްރީނަށް ދޫކުރާ ލޯނުން ލޯނުން ބައެއް މާފުކޮށް، ގްރޭސް ޕީރިއަޑް އިތުރުކުރުން
- ހިލޭ ޑިގްރީ ޕްރޮގްރާމުން ސެޓްފިކެޓް 1 އިން ފެށިގެން ޑިގްރީއާ ހަމައަށް ހިލޭ ކިޔެވޭނެ ގޮތް ހެދުން
- ތަޖުރިބާއަށް ސަނަދު ހޯދައިދޭ ނިޒާމު ފުޅާކޮށް ސެޓިފައިޑް ޕްރޮފެޝަނަލްސް ތައާރަފްކުރުން
- ހުނަރު ތަރައްގީކުރެވޭނެ ހަބްތައް ރާއްޖޭގެ އެކި ސަރަހައްދުތަކުގައި ގާއިމުކުރުން
- އައި.ސީ.ޓީ ދާއިރާގެ ހުނަރުވެރިންނާއި އެހެނިހެން އުފެއްދުންތެރިންނަށް ފަހި މާހައުލެއް ގާއިމުކުރާނެ.
- ނެޝެނަލް އެޕްރެންޓިސްޝިޕް ޕްރޮގްރާމް ފުޅާކުރުން
- ރިސާޗް ގްރާންޓް ތައާރަފްކުރުން
- ވަޒީފާގައި އުޅެމުން މަތީ ތައުލީމާއި ތަމްރީނު ހާސިލުކުރަން އިން-ސާވިސް ޓްރެއިނިން ފުރުސަތު ދިނުން
- ރަށްރަށުގެ ލޭންޑް ޔޫސް ޕްލޭންއާ ގުޅުވައިދޭ ހިއުމަން ރިސޯސް ޕްލޭން ހަދާ، މަތީ ތައުލީމާއި ތަމްރީނުގެ ފުރުސަތުތައް ހޯދައިދިނުން
ކުރިއަށް ކުޅިވަރު، ކުރިއަށް ކުޅުންތެރިން
ކުޅިވަރުގެ އަރބިޓްރޭޝަން ސެންޓަރެއް ގާއިމުކުރުން
- ގައުމީ ކުޅިވަރު އޮނިގަނޑެއް އެކުލަވާލުން
- ސްކޫލް ސްޕޯޓްސް އެސޯސިއޭޝަންތައް އުފައްދައި ސްކޫލް ކުޅިވަރުތަކުގެ ވާދަވެރިކަން އިތުރުކުރުން
- ރީޖަނަލް ސްޕޯޓްސް އެސޯސިއޭޝަންތައް ތައާރަފުކުރުން
- މަސައްކަތަށް ފުރިހަމަ ޖާގަ ނެތް އެސޯސިއޭޝަންތަކަށް ވޯކިން ސްޕޭސް ގާއިމުކޮށްދިނުން
- ބައިނަލްއަގްވާމީ މިންގަޑަށް ފެތޭ ކުޅިވަރު ވެނިއުތަކެއް ގާއިމުކުރުން
- ގައުމީ ފެންވަރުގެ ފުޓްސެލް ލީގްތައް ބޭއްވުން
- ރޭސިން ޓްރެކެއް ގާއިމުކުރުން
- ކުޅިވަރުގެ ހަޔާތް ނިމުމަށްފަހު ލައިފް އާފްޓާ ސްޕޯޓްސްއަށް ތައްޔާރުކުރުން
- ނެޝެނަލް ޓީމްގެ ކުޅުންތެރިންނަށް ހާއްސަ އިންޝުއަރަންސް ޕެކޭޖް ތައާރަފްކުރުން
- ގައުމީ ޓީމްތަކުގެ ޓެކްނިކަލް މަގާމްތަކަށް އެލަވަންސް ދިނުން
- ނެޝަނަލް އެސޯސިއޭޝަންތަކުގެ ބަޖެޓް މުރާޖައާކޮށް އިތުރުކުރުން
- "މޯލްޑިވްސް އޯޕަން" މުބާރާތް ތަކެއް ބޭއްވުން
ޝާމިލު އޯގާތެރި ރައްޔިތުން
ޝާމިލު އޯގާތެރި ރައްޔިތުންގެ ސިޔާސަތުގެ ދަށުން ހިމެެނެނީ ދޮށީ އުމުރުގެ މީހުންނާއި އަންހެނުންނާއި ކުޑަކުދިންނާއި ނުކުޅެދުންތެރިކަން ހުންނަ މީހުންނަށް ފޯރުކޮށްދޭ އިޖުތިމާއީ ރައްކާތެރިކަމާއި ބާރުވެރިކުރުމާ ގުޅޭ ސިޔާސަތުތަކެވެ. މި ސިޔާސަތުގައި ކުޑަކުދިން، އަންހެނުން، އުމުރުން ދުވަސްވީ މީހުން، އަދި އިސް ރަށްވެހިންނަށް ހާއްސަ ސިޔާސަތުތައް އެބަ ހުއްޓެވެ. އެކަންކަން އަންނަ ދައުރުގައި ފުރިހަމަ ވެއްޖެ ނަމަ، އުފާވެރި ދިރިއުޅުމެއް ކަށަވަރުވާނެ އެވެ.
އިސްރަށްވެހިންނަށް އިސްކަން
- ޓްރާންސިޝަން ޓު ވޯކްގެ ނިޒާމު ތައާރަފްކުރުން
- ވަކި އުމުރަކުން މަތީގެ ފަރާތްތަކަށް ވަކި ވަޒީފާތަކަށް ނުލެވުމަށް އޮންނަ ހުރަސް ނައްތާލުން
- އަމިއްލަ މަސައްކަތްކުރަން ބޭނުންވާ ދޮށީ އުމުރުގެ މީހުންނަށް މާލީ އެހީ ފޯރުކޮށްދިނުން
- ދޮށީ އުމުރުގެ މީހުންނަށް މާލީ އެހީ ދޭ މިންވަރާއި ޕެންޝަން ދިނުމުގެ ނިޒާމު މުރާޖައާކުރުން
- ދޮށީ އުމުރުގެ މީހުންނާބެހޭ ގާނޫނު ފުރިހަމައަށް ތަންފީޒުކުރުން
- ދޮށީ އުމުރުގެ އާބާދީ ބޮޑެތި ރަށްރަށުގައި ދޮށީ އުމުރުގެ މީހުންނަށް މަރުކަޒުތައް/ކްލަބް ގާއިމުކުރުން
- ދޮށީ އުމުރުގެ މީހުންގެ ތެރެއިން ދާންމަތިވާ ފަރާތްތަކަށް ބޭނުންވާނެ އިތުރު އެހީ ފޯރުކޮށްދިނުމުގެ ނިޒާމު ގާއިމުކުރުން
- ދާންމަތިވެފައިވާ ދޮށީ އުމުރުގެ މީހުންނަށް ހާއްސަ ފަރުވާގެ (ޖެރިއަޓްރިކް ކެއާ) ހިދުމަތް ތައާރަފުކުރުން
- ޓާމިނަލް އިލްނަސް ހުންނަ ފަރާތްތަކަށް ދާއިމީ ފަރުވާގެ (ޕެލިއަޓިވް ކެއާ) ހިދުމަތް ތައާރަފުކުރުން
- ދޮށީ އުމުރާ ގުޅޭ ދިރާސާތައް ދިވެހިރާއްޖޭގެ މާހައުލުގައި ކުރާނެ.
- ދޮށީ އުމުރުގެ މީހުންގެ ކައުންސިލް (ނެޝެނަލް ކައުންސިލް އޮން އޭޖިންގް) ގާއިމްކުރުން
ބާރުވެރިވުމުގައި އަންހެނުންނަށް ފަހިކަން
- ގޭގައި ތިބެ މަސައްކަތްކުރާ ފަރާތްތަކަށް މައިކްރޮ ސްކޭލްގެ މަސައްކަތްތައް ދަފްތަރުކުރުން
- އަންހެނުންނަށް ހާއްސަކޮށް މައިކްރޮ ފައިނޭންސް ޕްރޮގްރާމްތައް ތައާރަފްކުރުން
- އަންހެނުންނަށް ހާއްސަ ކުޅިވަރު ކުޅޭ ތަންތަން ގާއިމުކުރުން
- ގެވެށި އަނިޔާއަށް ހުށަހެޅޭ އަންހެނުންނަ ހަދާ ޑީވީ ޝެލްޓަރުގެ ހިދުމަތް ފުރިހަމަކުރުން
- އާއިލާއާ ބެހޭ ގާނޫނު މުރާޖައާކޮށް، ދަރިންގެ ހަރަދުނެގޭ މިންވަރު އިތުރުކުރުން
- ކޯ-ޕޭރަންޓިންގް ނިޒާމެއް އެކުލަވާލުން
- އަންހެނުންނަށް ހާއްސަ ލީގަލް ސަޕޯޓް ދެވޭނެ ނިޒާމެއް ގާއިމުކުރުން
ވަށާލެވޭ ހިމާޔަތާއެކު ކުދިންގެ އަޑު
- ކުޑަކުދިންގެ އޮޕްޝަނަލް ވެކްސިން އާސަންދައިގެ ތެރެއިން ލިބޭނެ އިންތިޒާމު ހަމަޖެއްސުން
- ޗައިލްޑްކެއާ ބެނިފިޓް ތައާރަފްކުރުން.
- ފެމެލީ ފްރެންޑްލީ ވޯކްޕްލޭސް ސަރުކާރުގެ ހުރިހާ އިދާރާއެއްގައި ގާއިމުކުރުން
- ޗައިލްޑް ޕްރޮޓެކްޝަން ވަން ސްޓޮޕް ސެންޓަރުގެ އިންތިޒާމުތައް ހަމަޖެއްސުން
- ޖުވެނައިލް ޑިޓެންޝަން ނިޒާމު މުރާޖާކުރުން
މާނަވީ ބައިވެރިވުމުން ގަދަރުވެރި ދިރިއުޅުން
- ނުކުޅެދުންތެރިކަން ހުންނަ ފަރާތްތަކަށް ވަދެނިކުމެވޭނެހެން ތަންތަން ހެދުން
- ޗައިލްޑް ޑިވެލޮޕްމަންޓް ސެންޓަރު އަދި ޑިސެބިލިޓީ މެނޭޖްމަންޓް އެންޑް ރިހެބިލިޓޭޝަން ސެންޓަރުގެ ހިދުމަތްތައް އަތޮޅުތެރޭގައި ފުޅާކުރުން
- ތެރަޕީ ދޭ ކްލިނިކްތައް މޮނިޓާކުރެވޭނެ ނިޒާމެއް ގާއިމުކޮށް، ހިދުމަތުގެ ފެންވަރު ކަށަވަރުކުރުން
- މޮބައިލް ތެރަޕިސްޓުން ސީދާ ގެއަށް ޒިޔާރަތްކޮށްގެން ތެރަޕީ ދިނުން
- ނުކުޅެދުންތެރިކަން ހުންނަ ފަރާތްތަކަށް ދިރިއުޅުމުގެ ހުނަރު ދަސްކޮށްދިނުމަށް އިންޑިޕެންޑެންޓް ލިވިންގް ޕްރޮގްރާމެއް ފަރުމާކުރުން
- ނުކުޅެދުންތެރިކަން ހުންނަ ކުދިންނަށް ހާއްސަ ވޮކޭޝަނަލް އެޑިއުކޭޝަން ސެންޓަރެއް ގާއިމުކުރުން
- ތެރަޕީ ބަޑީ ސިސްޓަމް ތައާރަފްކުރުން
- ނުކުޅެދުންތެރިކަން ހުންނަ ފަރާތްތަކަށް ވަޒީފާ އަދާކުރެވޭނެ ފުރުސަތު އިތުރުކުރުން
- ނުކުޅެދުންތެރިކަން ހުންނަ ފަރާތްތަކުގެ ބެލެނިވެރިންނަށް ހާއްސަކޮށްގެން ޕޭރަންޓް ސަޕޯޓް ގްރޫޕް އެކުލަވާލުން
މިއީ އެމްޑީޕީގެ މެނިފެސްޓޯގެ އެއް ސިޔާސަތެވެ. މި ސިޔާސަތުތަކުގެ ތެރޭގައި ވަގުތުން ވަގުތަށް އެކަމުގެ ފައިދާ އާންމުވާނެ ކަންކަން އެބަ ހުއްޓެވެ. ކުރިއަށް އޮތީ މި ސިޔާސަތުތައް ވިއްކުމުމެވެ. ރައްޔިތުންނަށް އޮތީ ސިޔާސަތުތައް މިންކޮށް، އަޅާކިޔައި، ވަޒަންކޮށް ވޯޓު ދިނުމެވެ.
