ރިޔާސީ އިންތިހާބަށް ވާދަ ކުރާނެ ކަމަށް ޑިމޮކްރެޓްސްއިން ބުނަމުންދިޔަ ނަމަވެސް، ކޮމަން ކެންޑިޑޭޓަކު ނެރެން ފުރުސަތު ލިބިއްޖެ ނަމަ އޭގެ ބޭނުން ހިފާނެ ކަމަށާއި އެކަމަކު، އެކަމުގައި ވަކި ގޮތެއް ނުނިމޭ ކަމަށް ޑިމޮކްރެޓްސްގެ ޗެއާޕާސަން ހަސަން ލަތީފު ވިދާޅުވެއްޖެ އެވެ.
ޑިމޮކްރެޓްސްއިން މިރޭ ބޭއްވި ނޫސްވެރިންގެ ބައްދަލުވުމެއްގައި ހަސަން ލަތީފު ވިދާޅުވީ، އެމްޑީޕީން ވަކިވެ ޑިމޮކްރެޓްސް އުފައްދައި ރިޔާސި އިންތިހާބުގައި އެ ޕާޓީން ވާދަ ކުރާނެ ކަމަށް ބުނަމުން އަޔަސް ކޮމަން ކެންޑިޑޭޓޭއްގެ ފުުރުސަތު ލިބިއްޖެ ނަމަ ފުރުސަތުގެ ބޭނުން ހިފާނެ ކަމަށެވެ.
"ދެން އެހެންނަމަވެސް، ތަކުރާރުކޮށް އަޅުގަނޑުމެން ދައްކަމުން ދިޔަ ވާހަކަ އެއީ، މި ހުރިހާ ކަމެއް މަސައްކަތެއް ކުރާ އިރު ވެސް އަޅުގަނޑުމެންނަށް ވެސް ކޮމަން ކެންޑިޑޭޓަކާއެކު މަސައްކަތް ކުރަން ލިބިއްޖެއްޔާ އެ ފުރުސަތު އަޅުގަނޑުމެން، އޭގެ ބޭނުން ހިފާނަމޭ" ހަސަން ވިދާޅުވި އެވެ.
އެކަމަކު، މިހާތަނަށް ކޮޮމަން ކެންޑިޑޭޓަކީ ކާކު ކަމެއް ވެސް ކޮމަން ކެންޑިޑޭޓެއް ހުންނާނެ ކަމެއް ވެސް ދަންނަވަން އަދި އެނގިވަޑައިނުގަންނަވާ ކަމަށް އޭނާ ވިދާޅުވި އެވެ.
ޑިމޮކްރެޓްސްގެ ކެންޑިޑެސީ ހުށަހެޅުމަށްފަހު އެހެން ޕާޓީއަކާ ކޯލިޝަން ހަދައި ކެންޑިޑެސީ އަނބުރާ ގެނައުމާ ގުޅޭ ގޮތުން އޭނާ އެއްވެސް ޖަވާބެއް ނުދެއްވަ އެވެ.
ހަސަން ލަތީފު ވިދާޅުވީ، ޕީޕީއެމް އާއެކު މަޝްވަރާ ކުރަން އެ ޕާޓީގެ ބައެއް މަޖިލިސް މެމްބަރުންނަށް ފޮނުވި މެސެޖުތަކަށް "ގްރީން ސިގްނަލެއް" ލިބިފައިވާ ކަމަށެވެ.
ވެއްޓިފައިވާ ވަޅުގަނޑުން އަރައިގަތުމަށް ޑިމޮކްރެޓްސް އާއެކީ މަސައްކަތް ކުރުމަކީ އެ ބޭފުޅުން ވަރަށް ބޭނުންވާނެ ކަމެއް ކަމަށް ގަބޫލުކުރެވޭ ކަމަށް ވެސް ވިދާޅުވި އެވެ.
އޭނާ ވިދާޅުވީ ރަށްރަށުގައި ވަރަށް ގިނަ ޕީޕީއެމްގެ މެމްބަރުންނާ ބައްދަލުވި ކަމަށާއި ޕީޕީއެމްގެ މެމްބަރުން ތިބީ ރައީސް ސޯލިހު ބަލިކުރަން ވަރަށް ބޮޑު އުންމީދެއްގައި ކަމަށެވެ. އަދި ރައީސް ޔާމީނަށް ވާދަ ކުރެވޭނެ ކަމުގެ ވަރަށް ބޮޑު އުންމީދެއްގައި ކަމަށެވެ.
އެހެންނަމަވެސް، ރައީސް ޔާމީނަށް ވާދަ ކުރެއްވޭނެ ކަމަށް ގަބޫލުފުޅު ނުކުރައްވާ ކަމަށާއި ޑިމޮކްރެޓްސްއާއެކު މަސައްކަތް ކުރުމަކީ ޕީޕީއެމްއަށް މޮޅު ގޮތް ކަމަށް ވިދާޅުވި އެވެ. އެއްކޮށް މަސައްކަތްކޮށްގެން ރައީސް ސޯލިހުގެ ސަރުކާރު "މާ ރަނގަޅަށް ވެސް" ބަލި ކުރެވޭނެ ކަމަށް ހަސަން ލަތީފު ވިދާޅުވި އެވެ.
އޭނާ ވިދާޅުވީ، މިހާރު ވެސް ރަށްރަށުގައި ޕީޕީއެމްގެ އާންމު މެމްބަރުންނާއި ޑިމޮކްރެޓްސްގެ މެމްބަރުން ކަންމަތީ ޖަލްސާތައް ބާއްވައި ސަރުކާރާ ދެކޮޅަށް އެއްކޮށް މަސައްކަތް ކުރަމުންދާ ކަމަށް ވެސް ހަސަން ލަތީފު ވިދާޅުވި އެވެ.
