ޖުމްހޫރީ ޕާޓީގެ ރިޔާސީ ކެންޑިޑޭޓު އަދި ރައްޔިތުންގެ މަޖިލީހުގެ މާމިގިލި ދާއިރާގެ މެންބަރު ގާސިމް އިބްރާހިމް އެންމެ ފަހުން ކުށުގެ ރެކޯޑު ސާފުކުރަން މިއަދު ހުށަހަޅައިފި އެވެ.
ޖޭޕީގެ ފަރާތުން ރިޔާސީ އިންތިހާބުގައި ވާދަކުރުމަށް, އެ ޕާޓީގެ ލީޑަރު ގާސިމް އިބްރާހީމަށް ވަނީ ޖޫން 9, ގައި ރިޔާސީ ޓިކެޓު އަރުވާފަ އެވެ. ޖުލައި 23، އިން ފެށިގެން ކުރިމަތިލާން ހުޅުވާލާފައި އޮތް ނަމަވެސް އިއްޔެއާ ހަމައަށް ވެސް އޭނާގެ ކުށުގެ ރެކޯޑު ސާފުކުރަން ހުށަހަޅާފައެއް ނުވެ އެވެ.
"އަދަދު" ނޫހަށް ޔަގީންވެފައިވާ ގޮތުގައި، ވިލާ ވިޔަފާރީގެ ވެރިޔަކަށް ވެސް ހުންނެވި ގާސިމްގެ ކުށުގެ ރެކޯޑު ސާފު ކުރަން މިހާރު ވަނީ ހުށަހަޅައިފަ އެވެ. އަދި އޭނާގެ އިންތިހާބީ އެޖެންޓަކަށް ހަމަޖެއްސެވި ކުރީގެ ޓުއަރިޒަމް މިނިސްޓަރު އަލީ ވަހީދުގެ ކުށުގެ ރެކޯޑު ސާފު ކުރުމަށް ވެސް ވަނީ ހުށަހަޅައިފަ އެވެ.
ނަމަވެސް, އަދި ރަނިން މޭޓަކަށް ހަމަޖައްސަވާ ބޭފުޅަކު ސާފެއް ނުވެ އެވެ.
މިދިޔަ ބުދަ ދުވަހު ބޭއްވި ޖޭޕީގެ ކައުންސިލް ބައްދަލުވުމެއްގައި، ގާސިމް ވަނީ އިންތިހާބުގައި އެ ޕާޓީން ވާދަނުކޮށް ރައީސް އިބްރާހިމް މުހައްމަދު ސޯލިހަށް ތާއީދުކުރުމާ ގުޅޭ ގޮތުން ކައުންސިލްގެ ހިޔާލު ހޯދައިފަ އެވެ. މުޅި ކައުންސިލް އިއްތިފާގުވީ ފުރަތަމަ ބުރުގައި ޖޭޕީން ވާދަކުރަން ޖެހޭ ކަމަށެވެ.
ރިޔާސީ އިންތިހާބުތަކުގައި ގާސިމްގެ ދައުރު
ގާސިމް ވަނީ 2008 އަދި 2013 ގެ ރިޔާސީ އިންތިހާބުގައި ވެސް ވާދަކުރައްވައިފަ އެވެ. 2008 ވަނަ އަހަރު ގާސިމަށް ލިބުނީ ވޯޓުލީ މީހުންގެ 15 ޕަސެންޓެވެ. އަދި 2013 ގައި ގާސިމަށް ލިބުނީ ވޯޓުލީ މީހުންގެ 24 ޕަސެންޓެވެ.
ދެ އިންތިހާބުގައި ވެސް ދެ ވަަނަ ބުރަށް ދެވޭ ވަރަށް ގާސިމަށް ވޯޓު ނުލިބުނު ނަމަވެސް އެ ދެ ފަހަރު ވެސް އިންތިހާބު ކާމިޔާބުކުރީ ގާސިމްގެ ތާއީދު އޮތް ކެންޑިޑޭޓެވެ. އަދި ދެވަނަ ބުރުގައި، އެ ދެ އަހަރު ވެސް، ގާސިމް ތާއީދު ކުރެއްވީ ފުރަތަމަ ބުރުގައި ދެވަނައަށް އެންމެ ގިނަ ވޯޓު ލިބުނު ކެންޑިޑޭޓަށެވެ.
ރައީސް މުހައްމަދު ނަޝީދާއި ރައީސް އަބްދުﷲ ޔާމީން ވެސް ސަރުކާރު އެކުލަވާލީ ޖޭޕީއަށް ހިއްސާއެއްދޭ ގޮތަށެވެ.
އެންމެ ފަހުން ބޭއްވި 2018 ވަނަ އަހަރު ރިޔާސީ އިންތިހާބު އޮތް އިރު، ގާސިމް ހިމެނޭހެން އޭރުގެ އިދިކޮޅު ހުރިހާ ލީޑަރުން ތިބީ ޖަލު ހުކުމެއްގައި ނުވަތަ ހުކުމެއް ނެތި ބަންދުގަ އެވެ. އެހެންވެ ގާސިމްގެ ޖޭޕީގެ އިތުރަށް އެމްއާރުއެމާއި އަދާލަތު ޕާޓީން ތާއީދުކުރީ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ސޯލިހަށެވެ.
