އަލަށް އުފެއްދި ދަ ޑިމޮކްރެޓްސްއަށް މިއަހަރުގެ ރިޔާސީ އިންތިހާބު ކާމިޔާބު ވެއްޖެނަމަ, ރާއްޖޭގެ ވެރިކަން ކުރާ ނިޒާމު ބަދަލުކުރުމަށް ފެންނަ ނުފެންނަ ވޯޓެއް ނަގާނެ ކަމަށް އެ ޕާޓީގެ ރިޔާސީ ކެންޑިޑޭޓް އިލްޔާސް ލަބީބް ވިދާޅުވެއްޖެ އެވެ.
އައްޑޫ ސިޓީއަށް ކުރެއްވި ކެމްޕޭން ދަތުރު ނިންމަވާލައްވާ, މާލެ ވަޑައިގެން, ނޫސްވެރިންނާ ބައްދަލުކުރައްވާ އިލްޔާސް ވިދާޅުވީ އެންމެ ފަހުން ނިޒާމު ބަދަލު ކުުރުމަށް ނެގި ވޯޓާ މެދު ވެސް ރައްޔިތުންގެ މެދުގައި ޝައްކުތަކަކާއި, ސުވާލުތަކެއް އުފެދިފައިވާކަން ގަބޫލުކުރައްވާ ކަމަށެވެ.
"2008ގަ ގާނޫނުއަސާސީ އެކުލަވާލުމުގެ ކުރިން ނެގި ފެންނަ ނުފެންނަ ވޯޓާ ދޭތެރޭ ވެސް އެތައް ބަޔަކު ޝައްކުގެ ނަޒަރަކުން ބަލާ. އެއީ ސައްހަ ނަތީޖާތަކެއްތޯ ނޫންތޯ. އަދި މިއަދު ވެސް ސުވާލު އުފައްދާ." ވެލާނާ އިންޓަނޭޝަނަލް އެއާޕޯޓުގައި ހުންނަވާ, އަދަދުން ކުރި ސުވާލަކަށް ޖަވާބު ދެއްވަމުން އިލްޔާސް ވިދާޅުވި އެވެ.
އޭނާ ވިދާޅުވި ގޮތުގައި މިދިޔަ 15 އަހަރު ތެރޭގައި ރާއްޖޭގެ ނިޒާމު މިއޮތް ގޮތާ މެދު އެކި ގޮތްގޮތުން ބަހުސް ކުރެވެ އެވެ. އެ މޭރުމުން ވާހަކަ ދައްކަވަމުން އޭނާ ވަނީ, ޑިމޮކްރެޓްސްގެ ސަރުކާރެއްގައި ނިޒާމު ބަދަލުކުރުމާމެދު ފެންނަ ނުފެންނަ ވޯޓެއް ނެގުމުގެ ފުރުސަތު ފަހިކޮށްދެއްވާނެ ކަމަށް ވިދާޅުވެފަ އެވެ.
"ޑިމޮކްރެޓުންގެ ސަރުކާރެއްގައި އަޅުގަނޑުމެން ރައްޔިތުންނާ ހަމައަށް އެ ފުރުސަތު ހުޅުވައި ދޭނަން. އެ ބޭފުޅުން ބޭނުންވަނީ ކިހިނެތްތޯ ދެނެގަތުމަށް ފެންނަ ނުފެންނަ ވޯޓެއް ނެގުމަށް. އެ ޖާގަ އަޅުގަނޑުމެން ރައްޔިތުންނާ ހަމައަށް ގެންގޮސްދޭނަން." އިލްޔާސް ވިދާޅުވި އެވެ.
އިލްޔާސް ވެލާނާ އިންޓަނޭޝަނަލް އެއާޕޯޓުގައި; ނިޒާމު ބަދަލުކުރުމުގެ ވޯޓެއް ނަންގަވާނެ ކަމަށް ވިދާޅުވި -- ފޮޓޯ: މިރާން/ އަދަދު
ޑިމޮކްރެޓުންގެ ވެރިކަމެއްގައި ނިޒާމު ބަދަލުކުރުމުގެ ވޯޓެއް ނެގުމުގެ ވާހަކަ އިލްޔާސް ދައްކަވާފައިވާއިރު, ރާއްޖެއަށް އެންމެ ރަނގަޅު ވެރިކަމުގެ ނިޒާމަކީ ބަރުލަމާނީ ނިޒާމު ކަމަށް, ޑިމޮކްރެޓުންގ ލީޑު ކުރައްވާ ކުރީގެ ރައީސް ނަޝީދު ގެންދަވަނީ ތަކުރާރުކޮށް ވިދާޅުވަމުންންވެ.
ނަޝީދު ދެކެވަޑައިގަންނަވާ ގޮތުގައި ރައްޔިތުންގެ މަޖިލިހުންގެ މެންބަރުން ރައްޔިތުންނަށް ޖަވާބުދާރީވާ ގޮތަށް އެ މަޖިލިހުން ވެރިކަން ހިންގުމަކީ އެންމެ ބޭނުންތެރި ގޮތެވެ. ރިޔާސީ ނިޒާމުގައި މަޖިލިސް ހިންގަވާ ގޮތް ނަޝީދު ސިފަކުރައްވާފައި ވަނީ "ރައީސުލްޖުމްހޫރިއްޔާ ކޮންޓްރޯލް ހޯއްދަވަން" އުޅޭ މައިދާނެއްގެ ގޮތުގަ އެވެ.
ބަރުލަމާނީ ނިޒާމުގެ ވާހަކަ ދެކެވޭއިރު, ޑިމޮކްރެޓްސްގެ ސިޔާސަތުތަކުގެ ތެރޭގައި ރައްޔިތުންގެ މަޖިލިސް އެކުލެވިގެންވާ ގޮތަށް ބޮޑެތި ބަދަލުތަކެއް ގެންނަން ގާނޫނުއަސާސީއަށް އިސްލާހު ހުށަހެޅުން ހިމެނެ އެވެ.
މިހާރު ހިނގަމުންދާ ރައްޔިތުންގެ މަޖިލީހުގައި 87 މެމްބަރުން ތިއްބަވާއިރު، ސެޕްޓެމްބަރު 9 ގައި ބާއްވާ ރިޔާސީ އިންތިހާބަށް ޑިމޮކްރެޓުން ނެރުނު ސިޔާސަތުގައި މަޖިލީހަށް ގެންނަން ހުށަހަޅާފައިވާ ބަދަލާއެކު ތިއްބަވާނީ ޖުމުލަ 76 މެމްބަރުންނެވެ. އެއީ މިހާރުގެ މަޖިލީހަށް ވުރެ 11 މެމްބަރުން މަދު އަދަދެކެވެ.
ޑިމޮކްރެޓުންގެ ވިސްނުމަކީ އަތޮޅުތަކުންނާއި މާލެއިން އިންތިހާބު ކުރާނީ 55 ގޮނޑި، ރާއްޖެ ހަތަރު ސަރަހައްދަކަށް ބަހާލައި (އުތުރު, ހުޅަނގު, މެދު އަދި ދެކުނު) އަންހެނުންނަށް ހާއްސަ 8 ގޮނޑި، ނުކުޅެދުންތެރިކަން ހުންނަ ފަރާތްތައް ތަމްސީލުކުރުމަށް 2 ގޮނޑި އަދި ޕާޓީތަކަށް ވޯޓު ލިބޭ ނިސްބަތުން ލިބޭ ގޮތަށް 11 ގޮނޑި ހިމެނުމެވެ.
