ވެއެތުވެދިޔަ ފަސް އަހަރު ސިޔާސީ އެއްވެސް ބޭނުމަކު މީހަކު ހައްޔަރުކޮށްފައިނުވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
ކުރިއަށް އޮތް ރިޔާސީ އިންތިހާބަށް ކެމްޕެއިން ކުރެއްވުމަށް ށ. މިލަންދޫއަށް ވަޑައިގެން މިރޭ ބޭއްވި ޖަލްސާއެއްގައި ވާހަކަ ދައްކަވަމުން ރައީސް ސޯލިހު ވިދާޅުވީ، އެއްވެސް ސިޔާސީ ބޭނުމަކު މީހަކު ހައްޔަރުނުކުރުމުގެ އިތުރުން އެއްވެސް ނޫސްވެރިޔަކު ވެސް އެމަނިކުފާނުގެ ސަރުކާރުގައި ހައްޔަރުކޮށްފައިނުވާ ކަމަށެވެ.
"މި ފަސް އަހަރު ނިމިގެންދަނީ، އެއްވެސް މީހަކު، އެއްވެސް މީހަކު ސިޔާސީ ބޭނުމަކު ހައްޔަރެއް ނުކުރޭ. ނޫސްވެރިޔަކު ޖަލަކަށްނުލާ. ކުއްލި ނުރައްކަލުގެ ހާލަތު އިއުލާނު ކުރާކަށްނުޖެހޭ. އެހެންނަމަވެސް ތަރައްގީގެ މަޝްރޫއުތައް މި ދަނީ ބާރަށް. ސަރުކާރެއް ގައިމުވެސް ފަސް އަހަރު ހިންގައި މި ނިމެނީ،" އެމަނިކުފާނު ވިދާޅުވި އެވެ.
ރައީސް ވިދާޅުވީ ސިޔާސީ އެފަދަ ކަންކަން ކުރުމުގެ ބަދަލުގައި އެމަނިކުފާނުގެ ވެރިކަމުގައި ސަރުކާރުން މަސައްކަތް ކުރީ ތަރައްގީ އާއި އަމާންކަން ގެނައުމަށް ކަމަށެވެ. ސިޔާސީ ހަލަބޮލިކަމުން ރާއްޖެ ދުރުވެފައި އޮތުމަކީ ތަރައްގީ ގެނެވުނު ސަބަބެއް ކަމަށް ވެސް އެމަނިކުފާނު ވިދާޅުވި އެވެ.
"އެންމެ މުހިންމު ކަމަކީ ހަމަޖެހުމާއި ސުލްހަވެރިކަން. ސިޔާސީ ހަމަނުޖެހުމުން އެއްކިބާވެ ތިބެ، ރާއްޖޭގެ ތަރައްގީއަށް މަސައްކަތްކުރަން ފުރުސަތު ލިބުން. ރައްޔިތުން ބޭނުންވެފައި ތިބި އަސާސީ ހައްގުތައް ފޯރުކޮށްދިނުމަށްޓަކައި ގިނަ މަސައްކަތްތަކެއް އަޅުގަނޑުމެންނަށް އޭގެ ސަބަބުން ކުރެވެމުން މިދަނީ،" ރައީސް ސޯލިހު ވިދާޅުވި އެވެ.
ރައީސް ވިދާޅުވީ އެމަނިކުފާނުގެ ސަރުކާރުން ފޯކަސް ކުރީ އިގްތިސާދީ ގޮތުން ރައްޔިތުން ފުދުންތެރިކުރުވަން ކަމަށާއި އޭގެ ނަތީޖާ މިހާރު ވެސް ފެންނަމުންދާ ކަމަށެވެ. އަދި ޒުވާނުންގެ އަތުގައި މިއަދު ފައިސާ އެބަހުރި ކަމަށް ވެސް އެމަނިކުފާނު ވިދާޅުވި އެވެ.
މިލަންދޫގައި ވާހަކަ ދައްކަވަމުން ރައީސް ވަނީ އެ ރަށަށް ކޮށްދެއްވާނެ ބައެއް ކަންކަމުގެ ލިސްޓެއް ވިދާޅުވެފަ އެވެ. އެގޮތުން. އިތުރު ހައުސިން ޔުނިޔުތަކެއް އަޅުއްވާނެ ކަމަށާއި ކުނި މެނޭޖް ކުރާނެ ވަސީލަތެއް ގާއިމް ކުރައްވާނެ ކަމަށާއި ބިން އިތުރުކޮށް ޗަކަ ބިން ހިއްކައި، ރިވެޓްމަންޓު އަޅުއްވާނެ ކަމަށް ވިދާޅުވި އެވެ.
އަންނަ ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ރައީސް ސޯލިހުގެ އިތުރުން ވާދަ ކުރައްވަނީ ޖުމްހޫރީ ޕާޓީގެ ގާސިމް އިބްރާހިމާއި މޯލްޑިވްސް ނެޝަނަލް ޕާޓީގެ މުހައްމަދު ނާޒިމާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އުފެއްދެވި ދަ ޑިމޮކްރެޓްސްގެ ރިޔާސީ ކެންޑިޑޭޓް މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބެވެ.
އެންމެ ބޮޑު އިދިކޮޅު ޕާޓީ ޕްރޮގްރެސިވް ޕާޓީ އޮފް މޯލްޑިވްސް އިން ބުނަނީ އެ ޕާޓީގެ ކެންޑިޑޭޓަކީ ކޮރަޕްޝަންގެ މައްސަލައެއްގައި 11 އަހަރުގެ ޖަލު ހުކުމެއް ތަންފީޒު ކުރައްވަމުންދާ ކުރީ ރައީސް ޔާމީން ކަމަށެވެ.
