ރިޔާސީ އިންތިހާބަށް ކެންޑިޑެސީ ފޯމު ހުށަހަޅަން ހަފްތާއަކަށް ވެފައިވާއިރު, އިންތިހާބަށް ކުރިމަތިލާނެ ކަމަށް އިއުލާނު ކޮށްފައިވާ ޖުމްހޫރީ ޕާޓީން ރަނިން މޭޓެއް, އިންތިހާބީ އެޖެންޓެއް އަދި ނުދައްކަ އެވެ.
ޖޭޕީގެ ފަރާތުން ރިޔާސީ އިންތިހާބުގައި ވާދަކުރުމަށް, އެ ޕާޓީގެ ލީޑަރު ގާސިމް އިބްރާހީމަށް ވަނީ ޖޫން 9, ގައި ރިޔާސީ ޓިކެޓު އަރުވާފަ އެވެ. ނަމަވެސް, މިހާތަނަށް އޭނާގެ ކުށުގެ ރިކޯޑު ސާފު ކުރުމަށް ވެސް ޖޭޕީގެ ފަރާތުން ހުށަހަޅާފަ އެއް ނުވެ އެވެ.
އިންތިހާބަށް ކުރިމަތިލާ ކެންޑިޑޭޓް, ރަނިން މޭޓު އަދި އިންތިހާބީ އެޖެންޓުގެ ވެސް ކުށުގެ ރިކޯޑު ސާފުކުރަން ޖެހެ އެވެ. މިހާތަނަށް ގާސިމްގެ ކުށުގެ ރިކޯޑު ސާފު ކުރުމަށް ހުށަހަޅާފައި ނުވާކަން ކަރެކްޝަނަލް ސާވިސަސްއިން ވަނީ "އަދަދު" އަށް ކަށަވަރުކޮށްދީފަ އެވެ.
ޖޭޕީގެ އިންތިހާބީ ތައްޔާރީތަކާ ބެހޭގޮތުން އެ ޕާޓީގެ އިސް ތަރުޖަމާނު އަލީ ސޯލިހުއާ ސުވާލު ކުރުމުން ވިދާޅުވީ, މިވަގުތަށް ދެވޭނެ އަޕްޑޭޓަކީ, ޖޭޕީގެ ކެމްޕޭން ރަށްރަށުގައި ކުރިއަށް ގެންދާ ކަމެވެ. އަދި އިދާރީ ގޮތުން ކުރަންޖެހޭ ކަންކަން ވެސް ކުރަމުންދާ ކަމަށް ވިދާޅުވި އެވެ.
ކެންޑިޑެސީ ފޯމާއި, ރަނިންމޭޓު އަދި އިިންތިހާބީ އެޖެންޓުގެ އިތުރުން ކުށުގެ ރިކޯޑު ސާފު ކުރުމުގެ ވާހަކަ އެހުމުން ވެސް އަލީ ސޯލިހް ވިދާޅުވީ އެކަންކަން ކުރިއަށްދާ ކަމަށެވެ. އެކަންކަމާ ބެހޭ އިތުރު ތަފްސީލެއް އޭނާ ހާމައެއް ނުކުރެއްވި އެވެ.
އިންތިހާބުގެ ތައްޔާރީތަކުގައި ޖޭޕީ ފަހަތުގައި އޮތްއިރު, އެ ޕާޓީގެ ކެންޑިޑޭޓް ގާސިމް ވަނީ ގައުމުގައި ތިއްބެވި އިލްމީ ބޭފުޅުން ނުކުމެވަޑައިގެން، ރިޔާސީ ކެންޑިޑޭޓުންގެ ތެރެއިން އެންމެ ރަނގަޅު ބޭފުޅަކީ ކޮބައިކަން ރައްޔިތުންނަށް ހާމަކޮށްދިނުން މަޖުބޫރުވެއްޖެ ކަމަށް ވިދާޅުވެފަ އެވެ.
"އިންޓަލެކްޗުއަލް ބޭބޭފުޅުންނަށް މި ޒިންމާ އަދާކުރަން މަޖުބޫރު އެބަވޭ މިހާރު އިނގޭތޯ، ދިވެހި ރައްޔިތުންނަށް އެ ބޭފުޅުން އެބަ ދަންނަވަން ޖެހޭ މީއޭ ރަނގަޅު ކެންޑިޑޭޓަކީ، އެއީއޭ ރަނގަޅު ކެންޑިޑޭޓަކީ،" ގާސިމް ވިދާޅުވި އެވެ.
ސެޕްޓެމްބަރު ނުވައެއްގައި ބާއްވާ ރިޔާސީ އިންތިހާބުގައި ވާދަކުރާ ކެންޑިޑޭޓުންގެ ތެރެއިން, ތިން ކެންޑިޑޭޓުން މިހާރު ވަނީ އިންތިހާބީ އެޖެންޓުން ކަނޑައަޅާފަ އެވެ. ރައީސް އިބްރާހިމް މުހައްމަދު ސޯލިހުގެ އިންތިހާބީ އެޖެންޓުގެ ގޮތުގައި ހަމަޖައްސާފައި ވަނީ ކިނބިދޫ ދާއިރާގެ މެންބަރު މުހައްމަދު ނާޝިޒް އެވެ. އަދި ދަނގެތި ދާއިރާގެ މެންބަރު މުހައްމަދު ނާޒިމްގެ އެޖެންޓަކަށް ހަމަޖައްސާފައި ވަނީ ވިލިމާލެ ދާއިރާގެ މެމްބަރު އަހުމަދު އުޝާމެވެ.
މިވަގުތު ޖަލުގައި ހުންނަވައިގެން އިންތިހާބަށް ވާދަކުރައްވާ ކުރީގެ ރައީސް އަބްދުالله ޔާމީންގެ އިންތިހާބީ އެޖެންޓަކީ ޕީޕީއެމްގެ ސެކެޓްރީ ޖެނެރަލް މުހައްމަދު ތޮލާލެވެ. އަދި ރަނިންމޭޓުކަމަށް ހަމަޖެއްސީ އެމަނިކުފާނުގެ ވަކީލު އަދި ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދެވެ.
