ޕީޕީއެމް/ޕީއެންސީގެ ރިޔާސީ ކެންޑިޑޭޓު އަދި ކުރީގެ ރައީސް އަބްދުﷲ ޔާމީންގެ ކެންޑިޑެސީ ބަލައިގަތުމަށް ގާނޫނީ ޓީމުން ލަފާ ހޯދުމަށް ފަހު އެ ކަމާ މެދު މިއަދު އިރުއޮއްސުމުގެ ކުރިން ގޮތެއް ނިންމާނެ ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.
ޔާމީންގެ ފަރާތުން، އެމަނިކުފާނުގެ ކެންޑިޑެސީ ފޯމު އީސީއަށް ހަވާލުކުރެއްވީ އިންތިހާބީ އެޖެންޓު އަދި ޕީޕީއެމްގެ ސެކްރެޓަރީ ޖެނެރަލް މުހައްމަދު ތޮލާލެވެ. އީސީގެ ފަރާތުން، ފޯމާ ހަވާލުވެވަޑައިގަތީ އެ ކޮމިޝަނުގެ ރައީސް ފުއާދު ތައުފީގެވެ.
އޭގެ ފަހުން ކޮމިޝަނުގެ ނައިބު ރައީސް އިސްމާއީލް ހަބީބު، އެ ތަނަށް ޖަމާވެފައިވާ ޕީޕީއެމް/ޕީއެންސީގެ ސެނެޓު މެމްބަރުންނާ މުހާތަބު ކުރައްވަމުން ވިދާޅުވީ 24 ގަޑިއިރުގެ ތެރޭގައި ކެންޑިޑެސީއާ މެދު ނިންމަވާ ގޮތެއް ހިއްސާ ކުރައްވާނެ ކަމަށެވެ. ގާނޫނުގައި ދީފައި އޮންނަ މުއްދަތަކީ 48 ގަޑިއިރެވެ.
"އިންތިހާބަށް ކުރިމަތިލުމަށް އެދޭ މީހާ، ޝަރުތުތައް ފުރިހަމަވޭތޯ ނުވަތަ ނުވޭތޯ، ގާނޫނީ ގޮތުން އިލެކްޝަންސް ކޮމިޝަނުން ބަލާނެ، އިލެކްޝަންސްގެ ގާނޫނީ ޓީމުން ބެލުމަށް ފަހު ނިންމާ ގޮތެއް 24 ގަޑިއިރު ތެރޭގައި ހާމަނުކުރާނެ،" ހަބީބު ވިދާޅުވި އެވެ.
ކޮމިޝަންގެ ނިންމުމާ މެދު ހިތްހަމަނުޖެހޭނަމަ ޝަރީއަތުގައި ޗެލެންޖު ކުރުމުގެ ފުރުސަތު އޮންނާނެ ކަން ވެސް ހަބީބު ފާހަގަ ކުރެއްވި އެވެ.
ޔާމީން ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އެއީ އެމަނިކުފާނުގެ ވެރިކަމުގައި ހިނގި އެމްއެމްޕީއާރުސީ ބޮޑު ހިޔާނާތުގެ ތެރެއިން، ވ. އާރަށް ކުއްޔަށް ދޫކުރުމުގައި، ޔާމީން ރިޝްވަތު ނަންގައި އެ ފައިސާ ލޯންޑަކުރެއްވި ކަން ސާބިތުވާ ކަމަށް ކްރިމިނަލް ކޯޓުން ކަނޑައެޅުމަށް ފަހުގަ އެވެ.
ޔާމީނަށް އިއްވާފައިވާ ހުކުމް ހައި ކޯޓުގައި ވަނީ އިސްތިއުނާފު ކޮށްފަ އެވެ. އިސްތިއުނާފުގެ ޝަރީއަތް ފަށައި ހަތަރު އަޑުއެހުމެއް ބޭއްވި އެވެ. އީދު ބަންދުގެ ފަހުން ބޭއްވުނީ އެންމެ އަޑުއެހުމެކެވެ. އެ ފަހުން، ފަނޑިޔާރުންގެ ޗުއްޓީ އޮތް ގޮތުން ހައި ކޯޓުގައި އެ ޝަރީއަތް ވަނީ މަޑުޖެހިފަ އެވެ.
ޔާމީންގެ އިސްތިއުނާފީ ހައްގުތަކާއި އިންތިހާބީ ހައްގުތައް ކަށަވަރު ކޮށްދިނުމަށް، އިސްތިއުނާފު ޝަރީއަތް ލަސް ކަމަށް ކަނޑައަޅައިދިނުމަށް އެދި ސުޕްރީމް ކޯޓަށް ދެ ފަހަރު މަތިން ދުސްތޫރީ މައްސަލައެއް ވެސް ހުށަހެޅި އެވެ. ދެ ފަހަރު ވެސް ކޯޓުން ވަނީ މައްސަލަ ބަލައިނުގަތުމަށް ނިންމައިފަ އެވެ.
ގާނޫނީ އަސާސީގައި ބަޔާންކޮށްފައިވާ ރައީސުލްޖުމްހޫރިއްޔާއަށް ވުމުގެ އެއް ޝަރުތަކީ، ޖިނާއީ ކުށެއްކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށް ވުމެވެ.
ގާނޫނު އަސާސީގެ އެ މާއްދާ އޮތް ގޮތުން، ޔާމީނަށް އިއްވާފައިވާ ޖަލު ހުކުމް ދެމިއޮތްހާ ހިނދަކު އެމަނިކުފާނަށް ވާދަނުކުރެވޭނެ ކަމަށް ބައެއް ގާނޫނީ ބޭފުޅުން ދެކެ އެވެ. ނަމަވެސް އެ މާއްދާގައި ބުނާ ހުކުމަކީ އިސްތިއުނާފީ މަރުހަލާތައް ނިމި ކަނޑައެޅޭ ނިހާއީ ހުކުމެއް ގޮތުގައި މާނަކުރަން އެދި ސުޕްރީމް ކޯޓަށް ދުސްތޫރީ މައްސަލައެއް ހުށަހެޅިދާނެ ކަމަށް ވެސް ބައެއް ވަކީލުން ދެކެ އެވެ.
ގާނޫނު އަސާސީގެ އެ މާއްދާ މާނަކުރުމާ މެދު ގާނޫނީ ބަހުސެއް އުފެދިފައިވާ މި ދަނޑިވަޅުގައި ޔާމީންގެ ވަކީލުންގެ ފަރާތުން އަދި އެފަދަ މައްސަލައެއް ސުޕްރީމް ކޯޓަށް ހުށަހަޅާފައެއް ނުވެ އެވެ. ޔާމީންގެ ކެންޑިޑެސީ ބަލައިނުގެންފިނަމަ، ކެންޑިޑެސީގެ މައްސަލަ ސުޕްރީމް ކޯޓަށް ހުށަހަޅާނެ ކަމަށް ބެލެވެ އެވެ.
