ގައުމުގައި ތިއްބެވި އިލްމީ ބޭފުޅުން ނުކުމެވަޑައިގެން، ރިޔާސީ ކެންޑިޑޭޓުންގެ ތެރެއިން އެންމެ ރަނގަޅު ބޭފުޅަކީ ކޮބައިކަން ރައްޔިތުންނަށް ހާމަކޮށްދިނުން މަޖުބޫރުވެއްޖެ ކަމަށް ޖުމްހޫރީ ޕާޓީގެ ލީޑަރު އަދި ރިޔާސީ ކެންޑިޑޭޓު ގާސިމް އިބްރާހިމް ވިދާޅުވެއްޖެ އެވެ.
ޖުމްހޫރީ ޕާޓީގެ މީޑިއާއިން އަލަށް ފެށި "ގާސިމްގެ ތަސަައްވުރު 2023" ޕްރޮގުރާމުގައި ވާހަކަ ދައްކަވަމުން ގާސިމް ވިދާޅުވީ ވޯޓު ދިނުމަކީ ކޮންމެ ރައްޔިތަކަށް ވެސް ލިބިފައިވާ އަސާސީ ހައްގެއް ކަމަށާއި ވޯޓު ދެއްވާއިރު، ދެއްވަން ވާނީ އެންމެ ރަނގަޅު ކެންޑިޑޭޓު ދެނެގަތުމަށްފަހު އެ ކެންޑިޑޭޓަކަށް ކަމަށެވެ.
އަދި, އެކަން ކުރުމަށް އެންމެ ފަސޭހަ ގޮތަކީ ގައުމުގައި ތިއްބެވި އިލްމީ ބޭފުޅުން ނުކުންނަވައި ރިޔާސީ ކެންޑިޑޭޓުންގެ އޮޑިޓެއް ކުރައްވައިގެން ކަމަށް އޭނާ ވިދާޅުވި އެވެ.
"އިންޓަލެކްޗުއަލް ބޭބޭފުޅުންނަށް މި ޒިންމާ އަދާކުރަން މަޖުބޫރުވޭ އެބަވޭ މިހާރު އިނގޭތޯ، ދިވެހި ރައްޔިތުންނަށް އެ ބޭފުޅުން އެބަ ދަންނަވަން ޖެހޭ މީއޭ ރަނގަޅު ކެންޑިޑޭޓަކީ، އެއީއޭ ރަނގަޅު ކެންޑިޑޭޓަކީ،" ގާސިމް ވިދާޅުވި އެވެ.
އޭނާ ވިދާޅުވީ ދިވެހި ރާއްޖޭގެ ކުދިބޮޑު އެންމެންނަށާއި ދިވެހި ގައުމަށް ކުުރިއެރުމެއް ހޯދައިދެވޭނީ ރިޔާސީ ކެންޑިޑޭޓުންގެ ތެރެއިން އެންމެ ރަނގަޅު ކެންޑިޑޭޓަކީ މިވެނި މީހެއްކަން ރައްޔިތުންނަށް ދައްކައިދީގެން ކަމަށެވެ.
ގާސިމް ވިދާޅުވީ ދިވެހި ރައްޔިތުން ވޯޓާ މެދު ގޮތެއް ނިންމަން ވާނީ ކެންޑިޑޭޓުންގެ ގޮތުގައި ތިބި މީހުންގެ މާޒީގައި ކަންކަން ކޮށްފައި ހުރިނެތް ގޮތަށް ބެލުމަށް ފަހުގައި ކަމަށެވެ.
މީގެ ކުރީގެ ސަރުކާރުތަކުން ތައުލީމު ހާސިލު ކުރަން ބޭނުންވާ ދަރިވަރުންނަށް ލޯނު ސްކީމަތަކާއި ސްކޮލަޝިޕުތަކުގެ ފުރުސަތުތައް ފަހިކޮށްދީފައި ނުވާއިރު ވެސް އޭނާގެ އެހީތެރިކަމާއެކު ގިނަ އަދަދެއްގެ ކުދިން ތައުލީމު ހާސިލުކޮށްފައިވާ ކަމަށް އޭނާ ވިދާޅުވި އެވެ.
"އަޅުގަނޑުގެ މާޒީގައި އަޅުގަނޑު ކޮށްފައި ހުރި ކަންތައްތަކުގެ ވާހަކަ ދައްކަން ވީމަ އަޅުގަނޑަށް ވަރަށް އުނދަގޫ، އެހެންނަމަވެސް މިއަދު ގައުމު ވެއްޓިގެން މިދާ ހާލަތަށް ބަލާފައި މި ވާހަކަތައް ނުދަންނަވައި ނެތް ވާކަށް ކޮންމެވެސް މިންވަރަކަށް،" ގާސިމް ވިދާޅުވި އެވެ.
އޭނާ އިތުރަށް ވިދާޅުވީ ރާއްޖޭގެ ވެރިކަމަށް އަންނަ މީހެއް ކަނޑައެޅުމަށްޓަކައި ވަކި ނަސަބަކުން އައިސްފައި ހުރި މީހެއްތޯ ނުވަތަ އެމީހެއްގެ ސިފައަށް ނުވަތަ ކުލައަށް ވެސް ބަލާކަށް ނުޖެހޭ ކަމަށާއި ބަލަންޖެހޭނީ އެމީހަކަށް މާޒީގައި ކަންކަން ހާސިލުވެފައިވާ މިންވަރަށް ކަމަށެވެ.
މިރޭގެ ޕްރޮގުރާމުގައި ގާސިމް ވަނީ މީގެ ކުރީގެ ސަރުކާރުތައް ގެނައުމަށްޓަކައި ޖުމްހޫރީ ޕާޓީން ވެދިން އެހީތެރިކަމުގެ ވާހަކަ ތަކުރާރު ކުރައްވައި މި އިންތިހާބުގައި އެ ޕާޓީތަކުން އޭނާއަށް ތާއީދު ކުރުމަށް އަނެއްކާވެސް އެދިވަޑައިގެންފަ އެވެ.
ރިޔާސީ އިންތިހާބުގެ ކެމްޕޭނުގައި ގާސިމް މައިގަނޑު ގޮތެއްގައި ބައިވެރިވަމުން ދަނީ އޮންލައިންކޮށެވެ. އޭނާގެ ބަދަލުގައި ސީދާ ކެމްޕޭން އިވެންޓުތަކުން ފެންނަމުން ދަނީ ޖުމްހޫރީ ޕާޓީގެ އެހެނިހެން ވެރިންނެވެ.
