ރެއިން ފެށިގެން ވެރި ރަށް މާލޭގައި ހޮޑުލެވޭ ބައްޔެއް ފެތުރެމުންދާތީ އިދިކޮޅު ޕީޕީއެމުން ތާވަލުކޮށްފައި އޮތް އެ ޕާޓީގެ ޖަގަހަ ހުޅުވުމުގެ ޖަލްސާ އެހެން ތާރީހަކަށް ފަސްކޮށްފި އެވެ.
ހޮޑުލެވޭ އަދި ބޭރަށް ހިންގާ މީހުން ކުއްލިއަކަށް ގިނަވެފައިވާތީ އެކަމުގެ ސަބަބު ދަނެގަތުމަށް ހެލްތު ޕްރޮޓެކްޝަން އޮތޯރިޓީންވަނީ މަސައްކަތް ފަށާފަ އެވެ. ބާރަށް ފެތުރެމުންދާ ބައްޔާ ގުޅިގެން މިއަދު ބާއްވަން އޮތް މިނިވަން ދުވަހުގެ ހަރަކާތްތައް ވެސް ވަނީ ފަސްކޮށްފަ އެވެ.
ޕީޕީއެމުން ބުނީ ޖަގަހަ ހުޅުވުން ފަސްކުރީ އާދަޔާ ހިލާފަށް ފެތުރެމުންދާއި ހޮޑުގެ ރޯގާއާހެދި ކުޑަކުދިންނާއި އާންމުންގެ ސިއްހީ ރައްކާތެރިކަމަށްޓަކައި ކަމަށެވެ. އަދި ޖަގަހަ ހުޅުމުގެ ޖަލްސާ ބާއްވާނެ ތާރީހެއް ވީހާ ވެސް އަވަހަކަށް އިއުލާނު ކުރާނެ ކަމަށް ވެސް އެެ ޕާޓީން ބުންޏެވެ.
ހޮޑުލެވޭ އަދި ބޭރަށް ހިންގާ މީހުން ކުއްލިއަކަށް ގިނަވެފައި ވަނީ މިނިވަން ދުވަހުގެ ހަރަކާތްތަކާ ގުޅިގެން ގިނަ ބަޔަކު އެއްތަނަކަށް ޖަމާވަމުންދާ ދަނޑިވަޅެއްގަ އެވެ.
މި ނޫހާ ވާހަކަ ދައްކަމުން އޭޑީކޭ ހޮސްޕިޓަލުގެ މެނޭޖިން ޑަައިރެކްޓަރު އަހުމަދު އަފްއާލް ވިދާޅުވީ ރެއިން ފެށިގެން މިއަދު މެންދުރު 3:00 އާ ހަމައަށް ހޮޑުލެވޭތީ އައި 210 މީހުންނަށް އެ ހޮސްޕިޓަލުން ފަރުވާ ދީފައިވާ ކަމަށެވެ.
ހޮޑުލެވޭތީ ސަރުކާރުން ހިންގާ އައިޖީއެމްއެޗްއިން ވެސް ވަރަށް ގިނަ ބަޔަކު ދަނީ ފަރުވާ ހޯދަމުންނެވެ. ނަމަވެސް އެ ހޮސްޕިޓަލުގެ މީޑިޔާ އޮފިޝަލު ފޯނު ނުނަގާތީ އެތަނުން ފަރުވާ ހޯދި މީހުންގެ އަދަދެއް ނޭނގުނެވެ.
ހޮސްޕިޓަލުގެ އެމަޖެންސީ ރޫމް ސިފަ ކުރައްވަމުން އައިޖީއެމްއެޗްގައި މަސައްކަތް ކުރައްވާ ކުޑަކުދިންނާ ބެހޭ ހާއްސަ ޑޮކްޓަރު އަހުމަދު ފައިސަލް ސޯޝަލް މީޑިޔާގައި ލިޔުއްވާފައި ވަނީ "މުޅި މާލެ [އޮތީ] ހޮޑުލުމުގައި" ކަމަށެވެ.
ބަލި މީހުން ކުއްލިއަކަށް ގިނަވުމުން އެކަމާ ކަންބޮޑުވުން ފާޅު ކުރައްވައި އޭޑީކޭގެ ޗީފް މެޑިކަލް އޮފިސަރު އަބްދުﷲ ނިޔާފް ވަނީ އާންމު ސާފުތާހިރުކަމުގައި ސަމާލުވާން އެދިވަޑައިގަނެފަ އެވެ.
"ހޮޑުލެވޭތީ އަދި މީހުން ބޭރަށް ހިންގާތީ އީއާރްއަށް ދައްކާ މީހުންގެ އަދަދު ކުއްލިއަކަށް ވަރަށް ބޮޑަށް އިތުރުވެއްޖެ. ބޯ ފެނަކީ ސާފު ފެންކަން ޔަގީން ކުރައްވާ. ފެން ކައްކައި، ހިހޫކޮށްގެން ބުއިން އަދި ފިލްޓަރުކޮށްފައި ހުންނަ ފެނަކީ ރައްކާތެރި ގޮތެއް،" ނިޔާފް ވިދާޅުވި އެވެ. "ގިނައިން އަތް ދޮވުމާއި އަމިއްލަ ސާފުތާހިރުކަމަށް ސަމާލުވުން ވެސް މުހިންމު."
