ވެރި ރަށް މާލޭގެ ހުސް ބިންތަކާއި އެހެނިހެން ތަންތަނުގައި ކެމްޕެއިން ކުރުމުގެ ފުރުސަތު ދެނީ ހަމައެކަނި އިދިކޮޅު ޕްރޮގްރެސިވް ޕާޓީ އޮފް މޯލްޑިވްސްގެ ލީޑަރު އަބްދުﷲ ޔާމީނަށް ކަމަށް މޯލްޑިވްސް ނެޝަނަލް ޕާޓީން ތުހުމަތުކޮށްފި އެވެ.
ހުޅުމާލެއަށް ދާ ބްރިޖުން ފައިބާ ތަނުން ބޮޑުތަކުރުފާނު މަގު ދުވާރު މަތީގައި ހަރުކޮށްފައި ހުރި ޔާމީންގެ މާސިންގާ ޕޯސްޓަރުގެ ފޮޓޯގަނޑަކާއެކު އެމްއެންޕީގެ ނައިބު ލީޑަރު އަހުމަދު އުޝާމް ކުރެއްވި ޓުވީޓެއްގައި ބުނީ، ކެމްޕެއިން ކުރުމުގެ ފުރުސަތު އެހެން ޕާޓީތަކަށް ނުދިނުމަކީ މާލޭ ސިޓީ ކައުންސިލުގެ ބޭއިންސާފު ނިންމުމެއް ކަމަށެވެ.
"އިންތިހާބުތަކުގަ ކެމްޕެއިން ކުރުމުގެ ހަމަހަމަ ފުރުސަތު ހުރިހާ ޕާޓީތަކަށް ވެސް ލިބެންޖެހޭނެ. މާލޭގެ ހުސްބިންތަކުގަ ޕީޕީއެމްގެ ކެމްޕެއިން ޕޯސްޓަރުތައް ހަރުކުރުމުގެ ފުރުސަތު އެޕާޓީއަށް ލިބިފަ އެހެން ޕާޓީތަކަށް އެފުރުސަތު ނުދިނުމަކީ މާލޭ ސިޓީ ކައުންސިލުން ވަރަށް ބޭއިންސާފުން ކުރާ ކަމެއް،" ވިލިމާލެ ދާއިރާގެ މެމްބަރު އުޝާމް ވިދާޅުވި އެވެ.
"މިސަރުކާރުން ބޭއިންސާފުން ކުރާ ކަންކަމުގެ ވާހަކަ ޕީޕީއެމްއިން ތާއަބަދު ދައްކާއިރު، އެޕާޓީގެ ފުރިހަމަ ކޮންޓްރޯލް އޮންނަ މާލޭ ސިޓީ ކައުންސިލުގެ އަމަލުތައް ވެސް ހަމަ އެފަދައިން ހުރުމަކީ ވަރަށް ދެރަ ކަމެއް."
ސިޓީ ކައުންސިލުގެ ތަރުޖަމާނު މަރިޔަމް ޝިއުނާ "އަދަދު" އަށް ބުނީ ކެމްޕޭނު ޕޯސްޓަރު ޖެހުމުގެ ހުއްދައަށް އެދިއްޖެ ނަމަ ކޮންމެ ޕާޓީއަކަށް ވެސް ހުއްދަދޭ ކަމަށެވެ. އެގޮތުން މާލޭގެ ގިނަ ސަރަހައްދުތަކެއްގައި ރައީސް އިބްރާހިމް މުހައްމަދު ސޯލިހުގެ ކެމްޕޭން ޕޯސްޓަރު ޖަހާފައި ހުރިކަން އޭނާ ފާހަގަކުރި އެވެ.
"ޕީޕީއެމް އިން މިސާލަކަށް އެހެން މީހުންނަށްވުރެ ކުރިން ހުށަހެޅީމަ، އެމީހުންނަށް [ސިނަމާލޭ ބްރިޖަށް އަރާ ސަރަހައްދުގައި ޕޯސްޓަރު ޖެހުމުގެ] ފުރުސަތު ދިނީ. މާލޭގައި އެހެން މީހުންގެ ވެސް އަދި ރައީސް އިބޫގެ ވެސް އެހެންމީހުންގެ ވެސް ދޭ. ހަމަ އެ އުސޫލުން ދޭނެ ކޮންމެ ޕާޓީއަކަށް ވެސް" ޝިއުނާ ބުންޏެވެ.
ޝިއުނާ ބުނީ އެމްއެންޕީއިން ވެސް ހުއްދައަށް ހުށަހަޅާފައި އޮތް ނަމަ ހުއްދަ ދީފައި ވާނެ ކަމަށެވެ.
މޭޔަރު ޑރ. މުހައްމަދު މުއިއްޒާއެކު މާލޭ ސިޓީ ކައުންސިލުގައި 19 ކައުންސިލަރުން ތިއްބަވަ އެވެ. އޭގެ ތެރެއިން މަދުވެގެން 13 މީހުންނަކީ އިދިކޮޅު ޕީޕީއެމް މެމްބަރުންނެވެ. މޭޔަރަކީ ޕީޕީއެމްގެ ނައިބު ރައީސް އެވެ.
އަންނަ ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ވާދަ ކުރައްވަނީ ރައީސް އިބްރާހިމް މުހައްމަދު ސޯލިހާއި ޖުމްހޫރީ ޕާޓީގެ ގާސިމް އިބްރާހިމާއި މޯލްޑިވްސް ނެޝަނަލް ޕާޓީގެ މުހައްމަދު ނާޒިމް ކުރިމަތިލައްވަ އެވެ.
ރައްޔިތުންގެ މަޖިލީހުގެ ރައީސް އުފެއްދެވި ދަ ޑިމޮކްރެޓްސްގެ ރިޔާސީ ޕްރައިމަރީއަށް ކުރިމަތިލުމުގެ މުއްދަތު ހަމަވިއިރު، ފޯމު ހުށަހެޅުއްވީ ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބެވެ.
އެންމެ ބޮޑު އިދިކޮޅު ޕާޓީ ޕްރޮގްރެސިވް ޕާޓީ އޮފް މޯލްޑިވްސް އިން ބުނަނީ އެ ޕާޓީގެ ކެންޑިޑޭޓަކީ ކޮރަޕްޝަންގެ މައްސަލައެއްގައި 11 އަހަރުގެ ޖަލު ހުކުމެއް ތަންފީޒު ކުރައްވަމުންދާ ކުރީ ރައީސް ޔާމީން ކަމަށެވެ.
