ރައްޔިތުންގެ މަޖިލިސް އެކުލެވިގެންވާ ގޮތަށް ބޮޑު ބަދަލެއް ގެނައުމަށް ދަ ޑިމޮކްރެޓްސްގެ "މުޅި ރާއްޖެ މަޖިލިސް: ރާއްޖޭގެ ފަރާތުން ކުރާ ވަކާލާތު" ސިޔާސަތުގައި ކަނޑައަޅައި ރޭ އެ ސިޔާސަތު އާންމުކޮށްފި އެވެ.
މިހާރު ހިނގަމުންދާ ރައްޔިތުންގެ މަޖިލީހުގައި 87 މެމްބަރުން ތިއްބަވާއިރު، ސެޕްޓެމްބަރު 9 ގައި ބާއްވާ ރިޔާސީ އިންތިހާބަށް ޑިމޮކްރެޓުން ނެރުނު ސިޔާސަތުގައި މަޖިލީހަށް ގެންނަން ހުށަހަޅާފައިވާ ބަދަލާއެކު ތިއްބަވާނީ ޖުމުލަ 76 މެމްބަރުންނެވެ. އެއީ އެއީ މިހާރުގެ މަޖިލީހަށް ވުރެ 11 މެމްބަރުން މަދު އަދަދެކެވެ.
ޑިމޮކްރެޓުންގެ ވިސްނުމަކީ އަތޮޅުތަކުންނާއި މާލެއިން އިންތިހާބު ކުރާނީ 55 ގޮނޑި، ރާއްޖެ ހަތަރު ސަރަހައްދަކަށް ބަހާލައި (އުތުރު, ހުޅަނގު, މެދު އަދި ދެކުނު) އަންހެނުންނަށް ހާއްސަ 8 ގޮނޑި، ނުކުޅެދުންތެރިކަން ހުންނަ ފަރާތްތައް ތަމްސީލުކުރުމަށް 2 ގޮނޑި އަދި ޕާޓީތަކަށް ވޯޓު ލިބޭ ނިސްބަތުން ލިބޭ ގޮތަށް 11 ގޮނޑި ހިމެނުމެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު ފަހަތުގައި ހުންނަވައި އުފައްދާފައިވާ ދަ ޑިމޮކްރެޓްސްގެ މި ސިޔާސަތު ނެރުނީ، 2025 ގައި ބާއްވާ މަޖިލީހަށް ދާއިރާތައް އިތުރުވެ ޖުމުލަ 92 މެމްބަރުން ތިއްބަވާނެ ކަމަށް އިލެކްޝަންސް ކޮމިޝަނުން ހާމަކޮށްފައި ވަނިކޮށެވެ.
ޑިމޮކްރެޓުގެ ސިޔާސަތުގައި މެމްބަރުންގެ އަދަދު މަދު ކުރުމާއެކު, މެމްބަރުން ހޮވާ ގޮތަށް ވެސް ބަދަލު ގެންނަން ކަނޑައަޅާފައިވެ އެވެ.
މަޖިލީހުގެ މެމްބަރުން ގަޑިޖެހޭ ގޮތާއި މެންބަރުކަމަށް ކުރިމަތިލާ މީހެއްގެ ކިބައިގައި ހުންނަންޖެހޭ ފެންވަރާއި ޝަރުތުތައް ގާނޫނުގައި ލިޔުމަށް ވެސް ޑިމޮކްރެޓުން ކަނޑައަޅާފައިވެ އެވެ.
ރާއްޖޭގެ ބަރުލަމާނީ ހަޔާތުގައި މަޖިލީހަށް ވާދަކުރާ ފަރާތްތަކުގެ ހާއްސަ ޝަރުތެއްގެ ގޮތުގައި، ވަކި ފެންވަރެއް ހުރުން ގާނޫނީ ގޮތުން ލާޒިމެއް ނުކުރެ އެވެ.
ޑިމޮކްރެޓްސްގެ އާ ސިޔާސަތުގައި ރައްޔިތުންގެ މަޖިލީހުގެ ދައުރުގެ ތެރެއިން މެންބަރަކު ވަކިކުރަން, އެ މެންބަރަކު އިންތިހާބުކުރާ ރައްޔިތުންނަށް ފެނިއްޖެނަމަ, ފެންނަ ނުފެންނަ ވޯޓެއް ނެގޭނެ އިޖުރާއަތްތައް ކަނޑައަޅާނެ ކަމަށް ބުނެފައިވެ އެވެ.
