މާލެ ސަރަހައްދުން ގޯތި ދޭން ސަރުކާރުން ހިންގާ "ބިންވެރިޔާ ސްކީމް" އިން ގޯތި ނުލިބޭ ކަމަށް ހައުސިން މިނިސްޓްރީން ކަނޑައަޅާފައި ވަނީ, އުސޫލުގައި ބަޔާން ނުކުރާ ޝަރުތަކަށް ހަވާލާދީ ކަމަށް ކަނޑައަޅައިދިނުމަށް އެދި, ގޯތި ނުލިބުނު މީހަކު ހައި ކޯޓަށް ހުށަހެޅި މައްސަލަ ބޭރުކޮށްލައިފި އެވެ.
ގޯއްޗަށް އެދި ފޯމް ލީ މީހުންގެ ތެރެއިން ގޯތި ނުލިބުނު މީހަކު ހައި ކޯޓަށް ހުށަހެޅި ދުސްތޫރީ މައްސަލާގައިވާ ގޮތުގައި އޭނާއަށް ގޯތި ނުލިބޭނެ ކަމަށް ހައުސިން މިނިސްޓްރީން ބަޔާންކުރާ ސަބަބުގެ ލިޔުމުގައި ހަވާލާދީފައި ވަނީ ގޯތި ދިނުމުގެ އުސޫލުގައި މާލެ ރައްޔިތެއްކަން ބެލުމުގެ މިންގަނޑުގައި ބަޔާން ކޮށްފައި ނެތް އިބާރާތަކަށެވެ.
މާލެ ރައްޔިތެއް ކަން ބެލުމުގެ މިންގަނޑު ބަޔާންކޮށްފައިވަނީ އުސޫލުގެ 11 ވަނަ މާއްދާގެ ހ. ގަ އެވެ. އޭގައި ވަނީ "އެ މީހެއްގެ މަންމަ ނުވަތަ ބައްޕައަކީ މާލެ ރައްޔިތަކަށް ވެފައި ސަރުކާރުން ހިންގާފައިވާ ސިޔާސަތެއްގެ ސަބަބުން ނުވަތަ ކަނޑައެޅިފައިވާ އުސޫލުގެ ސަބަބުން އެހެން ތަނެއްގައި ރަޖިސްޓްރީ ޖެހުމަށް ފަހު މިހާރު މާލޭގެ ރަޖިސްޓްރީގައިވާނަމަ އެ މީހަކު ބަލާނީ މާލޭގެ ރައްޔިތެއްގެ ކަމުގަ" އެވެ.
ހައުސިން މިނިސްޓްރީން އޭނައަށް ފޮނުވި ޖަވާބުގައި ބުނަނީ "ތިޔަ ފަރާތަކީ ކުރިން މާލެ ފިޔަވައި އެހެން ތަނެއްގައި ރަޖިސްޓްރީވެފައިވާ ފަރާތަކަށް ވެފައި، ތިޔަ ފަރާތުގެ މައިންބަފައިންގެ ތެރެއިން އެއްވެސް މީހެއް އުފަންވީއްސުރެން މާލެ ފިޔަވައި އެހެން ތަނެއްގައި ރަޖިސްޓްރީ ވެފައި ނުވާ ފަރާތެއް ގޮތުގައި މިނިސްޓްރީއަށް ސާބިތު ކުރެވިފައި ނުވާތީ" ކަމަށެވެ.
އޭނާ ހުށަހެޅި ދުސްތޫރީ މައްސަލާގައި އެދިފައިވަނީ ގޯތި ލިބުމަށް ޝަރުތު ހަމަނުވި ސަބަބުގެ ގޮތުގައި މިނިސްޓްރީން ދީފައިވާ ޖަވާބުގައި ހިމެނޭ އިބާރާތަކީ އުސޫލުގައި ނުހިމެނޭ އިބާރާތެއް ކަމުގައި ކަނޑައަޅައިދިނުމަށެވެ. އެ އުސޫލު މަނާކޮށްދިނުމުގެ އިތުރަށް، އޭނާއަށް ގޯތި ނުލިބޭ ކަމަށް މިނިސްޓްރީން ކަނޑައަޅާފައި ވަނީ އުސޫލާ ހިލާފަށް ކަމަށް ކަނޑައަޅައިދިނުމަށް ވެސް އޭގައި އެދިފައިވެ އެވެ.
ގެދޮރުވެރިޔާ ކޮމެޓީގެ ޗެއާ އަދި ހައުސިން މިނިސްޓްރީގެ ސްޓޭޓް މިނިސްޓަރު، އަކްރަމް ކަމާލުއްދީން ވެސް ވިދާޅުވި ގޮތުގައި ގޯތި ލިބޭ މީހުންގެ ލިސްޓަށް 800 އެއްހާ ޝަކުވާ ލިބުނު ނަމަވެސް އޭގެ ތެރޭގައި ގިނައީ ގޯތި ދިނުމުގެ އުސޫލަށް ފާޑުކިޔާފައި ހުރި ޝަކުވާތަކެވެ. އެފަދަ ޝަކުވާތައް ބަލާނީ ވެސް ސައްހަ ނޫން ޝަކުވާތައް ގޮތުގައި ކަމަށް އޭނާ ވިދާޅުވެފައިވެ އެވެ.
"މިހާރު ހުރެދާނެ ހިޔާ ފްލެޓަކީ މިލްކެއް ނޫނޭ، ސޯޝަލް ހައުސިން ކަމަކަށް ނުބެލެވޭނޭ، މިހެން ޝަކުވާތަކެއް، އެކަމަކު އުސޫލުގައި ސާފުކޮށް ބަޔާންކޮށްފައި އޮންނާނެ ސޯޝަލް ހައުސިން އޮތް ފަރާތްތަކަށް ނުލިބޭނެކަން،" އަކްރަމް ތަފްސީލްކޮށްދެއްވި އެވެ.
ބިންވެރިޔާ ސްކީމުގެ ދަށުން ގޯތި ދެނީ ހުޅުމާލޭގެ އިތުރުން, ހިއްކުމުގެ މަރުހަލާގައި އޮތް ގުޅިފަޅާއި ގިރާވަރުފަޅުންނެވެ. ސަރުކާރުން ބުނެފައިވާ ގޮތުގައި ހުޅުމާލެއިން 2,200 ގޯތި, ގުޅީފަޅުން 2,000 ގޯތި އަދި ގިރާވަރުން 2,000 ގޯތި ދޭނެ އެވެ.
މިހާރު ގޯތި ލިބޭނެ ކަމަށް ލިސްޓުގައި ބުނެފައިވާ މީހުންނަށް ގޯތި ދެނީ ކޮންތަންތަނަކުން ކަމެއް އަދި ހާމައެެއް ނުކުރެ އެވެ. އޭގެ އުސޫލު ފަހުން ހާމަކުރާނެ ކަމަށް ސަރުކާރުން ބުނެފައިވެ އެވެ.
އެ ސްކީމްގެ ދަށުން ގޯއްޗަށް އެދި 23،088 މީހުންގެ ފަރާތުން، 15،164 އެޕްލިކޭޝަން ހުށައަޅާފައިވެ އެވެ. ވަކިން ހުށަހެޅި ފޯމްތަކާއި ޖޮއިންޓް ފޯމުތައް ހިމެނޭ ގޮތުން ގޯތި ލިބޭ މީހުންގެ ލިސްޓްގައި 10،314 މީހުން ހިމެނެ އެވެ. ބިންވެރިޔާ ސްކީމްގެ ދަށުން ގޯއްޗަށް ހުށަހެޅި ފަރާތްތަކުގެ ތެރެއިން، 19،857 މީހުން ހުށަހެޅި، 12،794 ފޯމު ވަނީ ޝަރުތު ހަމަވެފަ އެވެ.
